দাঁসায় পরব ( বার )

 (পোয়লো হৗটিঞ তায়ম)

দাঁসায় পরব ( বার )

মহাদেব হাঁসদা

কুক্‌লি হিজুঃ আ দাঁসায় সেরেঞরে। হায়রে হায়রে তে, হায় হায় দ চেদাঃ কো সেরেঞা। আডি হড় দ দাঁশায় দ দুক রেয়াঃ পরব কানা মেন্‌তে কো লৗলৗই কানা। সেদায় বাংমা খেরোওয়াল কোরেন হুদুড় দুর্গা ঞুতুমান মিৎ রাজায় তাঁহেকানা। আর্য কো রেন মিৎ কুড়ি হপন ঠেন উনি দয় গচ্‌ অচো আকানা। -অনা দিসৗতে হড় হপন নিৎ হঁ হায়রে হায়রে কাতে দাঁসায় দাঁড়ান কো অডোকঃ আ। 

আরহঁ আদম কো দ কো মেনা- আয়নম কাজল ঞুতুমান বারয়া কুড়ি হপন হিঁসৗলিয়ৗ আর্য- কো আতকির লেৎ কিনৗ। উনিকিন পাঁজা অডোক গে কানা দাঁসায় দাঁড়ান দ।

ভুয়াং দ বাংমা, লৗড়হৗই রেয়াঃ সাপাপ্‌ কানা। মেনখান নোওয়া কিন বারয়া ‘মত’ তুলৗজখা লেখান অকাহঁ মনেরে পুরতুক বাং হোয়োঃ আ। চেদাঃসে দাঁসায় সেরেঞ রে, বঁগা বুরু রে, ঝাড়নি মান্তার রে অকাঠেন হঁ দুক রেয়াঃ চিতৗর বাং ঝালকাও আকানা। সানতাল পরগনা খন এহব কাতে নঁতে বীরভূম, মালদহ, দিনাজপুর, পুরুলিয়া হৗবিচ্‌ দাঁসায় সেরেঞ  অক্তে “ হায়রে হায়রে” বাং মেন কাতে, “হৗরি হৗরি” কো মেনা। “হায়রে হায়রে” আর “হৗরি হৗরি” দ মিৎ কাথা বাং কানা। আসল রে নোওয়াদ রাহারেনাঃ তাল কানা। জেলেকা ঝুমুর সেরেঞ রে “ও মরি, হায়রে হায়” কো বাঁখেড়া। ঠিক অনকাগে নোওয়াহঁ। 

নঁতে, উত্তর পাহ্‌টা রেন হড় হপন দ দাঁসায় এনেচ্‌ রে ভুয়াং বাংকো বেওহারা। কাঁসা করতাল তেয়াঃ তাল তেকো এনেচ্‌ সেরেঞা। অনাদ ‘লবয়’ এনেচ্‌ কো মেতাঃ আ। ভুয়াং এনেচ্‌ আর লবয় এনেচ্‌ দ মিৎ গেয়া- একেন রাহা তেৎ জুদৗওয়া। অনকাগে হুদুড় দুর্গা সে দেবী দুর্গা আঃ কৗহ্‌নি সাঁও দাঁসায় পরব রেয়াঃ যাঁহান সৗগৗই দ বৗনুঃ আকাদা। 

দাঁসায় সেরেঞ – দাঁসায় সেরেঞ রেদ আয়মা গুরু কোওয়াঃ ঞুতুম ঞামঃ আ। জেলেকা কারমু গুরু, ভুয়াং গুরু, মারাং গুরু, সিদ্‌ গুরু, গানডু গুরু, লবয় গুরু,সিদো গুর্‌ রাড়ো গুরু, রহ্‌ড়া গুরু, চেমেঞ গুরু, মসৎ গুরু, ধরম গুরু এমান। গুরু আর চেলা কোওয়াঃ কুলি আর তেলা তালাতে দাঁসায় সেরেঞ সদর আকানা। জেলেকা-

 চেতে লৗগিৎ গুরু হো, ভুয়াং সাডে কান?

চেতে লৗগিৎ গুরু হো, কাঁসা রাঁওয়া কান? 

দেশ দাঁড়ান চেলাহো, ভুয়াং সাডে কান

দিশম সাঁঘার চেলা হো, কাঁসা রাঁওয়া কান।

দেশ রেদ গুরু হো, চেৎ কো ঞাম দ?

দিশম রেদ গুরু হো, চেৎ কো ঞামঃ দ?

দেশ রেদ চেলা হো,সুনুমে সিঁদুর দ 

দিশম রেদ চেলা হো, আয়নম কাজল দ।

 

আতাং তালাং গুরু হো, সুনুমে সিঁদুর দ

তেলায় তালাং গুরু হো, আয়নম কাজল দ। 

( নোওয়া তায়ম মুচৗৎ হৗটিঞ রে)