(হুডিঞ মাছা কৗহ্নি)
বুল মুন্ডৗ
- বাড়তাঙ সরেন
বুধন মাষ্টার কোঠা চট খনগেয় কয়ঃ কেদা কুলহী দুয়ৗর সেচ। ঞিদৗ গেল মিৎ টাড়াং হুয়েন রেহঁ আচরেন ঢেনাইচ্ কড়া সরেশ বায় রুয়ৗড় আকানা। উনি লৗগিৎ নিত হঁ 'সরেন বাখোল' রেনাঃ কুলহী দুয়ৗর ঝিজগে মেনাঃ আ। বুধন মাষ্টার আঃ ভাবনা দ আচরেন ঢেনাইচ্ কড়া সরেশ আতেগে। মারাং কড়া অলঃ আকিল সেঁড়াকাতেঃ ইঞ্জিনিয়ার এ তেয়ার আকানা। মেনখান, হুডিঞ কড়া খৗতির তেহেঞ আতো অড়াঃরে বুধন মাষ্টারাঃ মৗন মানত সানাম মালট চাবা আকান তায়া। আপনারাঃ আতোরেন অকয় হঁ চেৎ হঁ বায় মেন দাড়েয়াকো আ। নিতং বুধন মাষ্টার দ আয়াঃ ইস্কুল আর ঘারঞ্জ ছাডা আতো অড়াঃরেন অকয় সাঁওতে গে সৗগৗয় বৗনু তায়া। আতোরেন হড় সাঁওতে রড় রপড় হঁ মুচৗৎ উতৗর আকান তায়া।
মিৎ অক্তে নংকা তাঁহেকানা, বুধন মাষ্টার বেগর বাড়ি টলা আতোরে অকা কৗমিগে বাং গানঃ কান তাঁহেনা। বাপলা বিহৗ, পরব পৗলি, সানাম কৗমিরে বুধন মাষ্টার জপড়াও এ তাঁহেকানা। গোটা টঠারে মিৎ মারাং সাঁওতা সুসৗরিয়ৗ লেকাতে ঞুতুম তাঁহেকান তায়া। আডে টলারেন হড়কোহঁ আডিকো মানত ইদিকান তাঁহেনা। মেনখান, নিতং দ বুধন মাষ্টার দ রাবাং দিনরেন গঁঘা লেকায় বল বায় উতৗরেনা সরেশাঃ কৗরধৗনি খৗতিরতে।
বুধন মাষ্টার তি-রেনাঃ ঘড়ি সেচ এ কয়ঃকেদা, ঞিদৗ গেল বার টাড়াং পারম এনা। বুধন মাষ্টার এরাৎ তেৎ মুঙ্গলী হেচ কাতেঃ বুধনে মেতাঃদেয়া, "এ গো সরেশ আপাৎ , ইঞ দ আডি বতরগেঞ বুঝৗও এদা, চেদাঃ নুই গিদরৗ দয় নংকান কানা ভালা, চেদাঃ কাথা বায় আঁজমেদা "! বুধন মাষ্টার দ আডি দাঁদরৗও আতেয় রড় রুয়ৗড় কেদা, "আম কানাম উনিরেন আসল হুতি, আমাঃ দুলৗড় খৗতিরতে উনি গিদরৗ দয় বৗড়িচ চাবা আকানা ! আমগে উনিয়াঃ বহঃদম বৗড়িচ আকাৎ তায়া। কলেজ বৗগি কাতেঃ দিনৗম গে হান্তে নাতে বল খেলে ঞির বাড়ায় কানা! আর দিনৗম হিলোঃ তালা ঞিদৗ হৗন্ডি ঞু বুল কাতেঃ অড়াঃ এ রুয়ৗড় কানা ! উনি খৗতির সাঁওতারেন হড়ঠেন ইঞাঃ মেৎহা বৗঞ উদুঃ দাড়েয়াঃ কানা ! হড়কো মেমেন কানা, সাঁওতা সুসৗরিয়ৗ বুধন মাষ্টাররেন কড়া দ মিৎ মারাং মাতাল ! ছি !ছি! উনি খৗতির তেহেঞ হটঃরে পৗশি বাবের হরঃ হুয়ুঃ তিঞা "!
সরেশ দ কুলহী দুয়ৗররে তিঙ্গু কাতেঃ উন ঘৗড়িচ আচ এগাঁত আপাতাঃ খৗপৗরিয় আঁজমেৎ কান তাঁহেনা। জিউয়ীরে ঢানমানে আঁগচ্ কেদা সরেশ। উনি দ বুল খনে চেতাও এনা। বৗই বৗইতে অড়াঃ তেয় বলয়েনা সরেশ। লাডাঃ লুডুঃ কোঠারেয় দেজ এনা। আচ্ আপাতাঃ বার জাঁগা হৗড়ুপ কাতে কৗটিচ গিদরৗ লেকা রাঃ রাঃ এ ধুরৗও এনা। রাঃ হমর আতেয় মেন কেদা সরেশ, "ইকৗ কৗঞমে বাবা, ইকৗ কৗঞমে ! "
.webp)
.webp)
