আবোওয়াঃ ওয়েব পেজ- খবর সাকাম খন বাডায় ঞাম আকানা বাংমা আচ্ আচ্তে কুং-ফুঃ সেড়াঁ কাতে ঝত হড়াঃ তাক এ লাগাও কেদা কেশিয়াড়িরেন মৗই হেমাল মুরমু। আরহঁ বাডায় আকানা বাংমা উনিদ নিৎ নোওয়া কুং-ফুঃ রেনাঃ সেচেতেদ্ হাতাও কাতে আপ্নার জাঁগাতে তিঁগু কেটেজঃ রেনাঃ এ রিকৗয়েদা।
হেমাল পছিম মেদিনীপুর কেশিয়াড়ি রেনাঃ নছিপুর আদিবাসী হাই স্কুল খন উচ্চমাধ্যমিক পাশ কাতে নিত তিরলৗ কলেজ রেন পৗঠুওয়ৗ। বাবা ব্যাঙ্ক রেন কৗমিয়ৗ আর আয়োদ বিরদৗ গাড়রেন মাচেতানি কানায় মেন্তে বাডায় আকানা।
বাডায় আকানা হুডিঞ খনগে কাথায় একলা একলা অড়াঃরে তাঁহে তাঁহেতে টিভি রে কার্টুন ঞেল কাতে মনে অর কেৎ তায়ায় মার্শাল আর্টস সেন। কুং-ফুঃ হোয়োঃ কানা চীনরীতি রেনাঃ মার্শাল আর্টস। চীন দিশম রে চীনা- লৗড়হৗই রেনাঃ সাজাও মেনেৎ নোওয়া মার্শাল আর্টস যুগ যুগ ধরিয়ৗ চীনারীতি লেকাতে হুয় হিজুঃ কানা।
বাডায় আকানা বার সেরমা ধরিয়ৗ হেমাল নোওয়া কুং-ফুঃ সেঁড়ায়েদায়। জেলা আর পনৎ থক্ করেনাঃ হেপ্রাও করে সেলেদ্ কাতেহঁ শিরপায় হামেট আকাদা। মিৎ সেচেতেদিয়ৗ ঠেন খন সেচেতেদ্ হাতাও কাতে ২০১৮ সালরে মিৎ হেপ্রাও রে পোয়লো ঠাঁও এ হামেট লেদা মেন্তেহঁ বাডায় আকানা। অনা সাল রেগে কলকাতা পুলিশ বেনিয়াপুকুর আঃ সাপ্ড়াওনাঃ হেপ্রাও রে দসার ঠাঁও এ ঞাম লেদা হেমাল।
হেমালাঃ কাথা খন বাডায় আকানা বাংমা নিতৗ পুরিস্থিতিরে সানাম কুড়ি গিদৗর কোওয়াঃগে আপ্নার জাঁগাতে তিঁগু কেটেজঃ হোয়োঃ লৗগ্তি কানা। অনা লেকাতে মার্শাল আর্টস রেনাঃ এনেম আডি বৗড়তি গেয়া। নোওয়াহঁ বাডায় আকানা বাংমা মারাং কাতে হেমাল দিসম লৗগিৎ এ কৗমিয়ৗ, বিশেষ কায়তে সান্তাড় কুড়ি গিদৗর কো চেতান কৗমি রেনাঃ আঁশ মেনাঃ তায়া।
.webp)
.webp)
