দাঃ সুনুম
- বাড়তাঙ সরেন
 |
ধেদ্রে কুম্বৗ অড়াঃ খনগে খুক্ খুক্ তে রৗদু হাড়াম কুলহী সেচ এ কয়ঃকেদা। তুমদৗ টামাক আতে তাড়োকো ওডোং ইদিয়ি কানা। উনিয়াঃ গচ মৗড়ি দ পুঁন্ড মারকিন তেকো পটম আকাদা। অনা চেতানরে মিৎবার বাহা দহ মেনাঃআ। পুন হড় দ পারকম গঃকাতেঃ কো লাহা আকানা। ওনকো লাহারে কুডৗম নায়কে দ ডাণ্ডারে হাটাঃ আর জজম তিরে ঠিলি সিপিঞ কাতেঃ কিডৎ-মাডেৎ এ তাড়াম ইদিয়েদা। তায়ম তায়মতে আতোহড় আর দিশম পেড়া। আতোরেন হাড়াম হড়কোওয়াঃ দুখৗলি সেরেঞ রাহা আজম এনা- "কুলহী দুয়ৗরহঁ সিঞ গেয়া, বাড়গে দুয়ৗরহঁ সিঞ গেয়া, তিহিঞ দিন দ বাবাতিঞ দ, অকা দুয়ৗরতেয় ওডোং চালাওয়েন"। তাড়োরেন তুরুয় সেরমারেন কড়া গিদরৗ দ আচ মামাওয়াঃ তিরে সাপ্কাতে,অৗডি মিরলুং আতে বৗই বৗইতে আতো হড়ে পাঁজা ইদিয়েৎ কোওয়া।
বতল খন হপন বৗটিরে পৗউরৗ দুল দুলতে রৗদু হাড়ামে দিশৗকেদা, তেহেঞ মিৎ চাঁদোরে জজ টলা আতোরেন মড়ে মড়ে হড়কো হানাপুরীয়েনা। বাংদ আতো গে বৗড়িজ আকান, বাংদ ডৗন যুগিনগেকো বৗড়তি আকান, অনাতে আতোরে নংকা বে-বৗড়িজ হুয়ুঃকান ভালা ! রৗদু হাড়াম তেহেঞ মিৎ চাঁদো জাড়াও কাতেঃ আটেৎএ হরহ আকাদা। বড়পাহাড়ি মোড়তে ধিরি কুটৗম হঁ বায় সেন দাড়েয়াঃ কানা। মিৎ হাপ্তা লাহা রামপুরহাট হাসপাতাল খন রানে আগু লেদা। মেনখান অনা রানহঁ বাং উদুঃ কানতায়া। রাগদা হাড়ামলেকা আতোরেন মড়ে তুরুয় হড়কো জাড়াও আকানা। মিৎ বার হড়াঃ হালত দ অৗডি বৗড়িজ গেয়া। বতর রেনাঃ মিৎ কুড়হৗতে জজ টলা আতো দ দাপাল পটম আকানা। রাগদা হাড়াম হঁ মনেরে বতর বল আকাদেয়া।
দশার হিলোঃ মৗঝহি থান সামাংরে গোটা আতোরেন হড়কো জাওরা আকানা, আতো কৗমি জুৎ ওচোয় লৗগিৎ। মিৎ শায় কাতেঃ কো চাঁদা ভেজা আকাদা। অঝা ঠেনকো সেনঃআ দাঃ সুনুম লৗগিৎ। দোষকো পাঁজায়া।
সানাম কাথা আঁজমকাতেঃ আশা দিদিমুনি মালতিয় সেটেরেনা বৗইসী তালারে। আতোরেন হড় বুঝৗওরেনাঃ এ রিকৗ কেদা, আতো বৗড়িজ রেনাঃ আসল কারনে লৗয় সদর কেদা। ধিরি রেনাঃ গুঁন্ডৗ ধুড়ি সাঁহেৎ আদের খৗতির কড়ামরে 'সিলিকোসিস' লেকান আজার হুয়ুঃ কানা। অনা সাঁওতে পৗউরৗ ঞুতে টি.বি.আজারহঁ বৗড়তিঃ কানা। তবে নওয়া লৗগিৎ ডাক্তার হেনাঃ কোওয়া, রান হেনাঃআ। মেনখান আতোরেন হড় দ মালতি দিদি মুনিয়াঃ কাথা বাংকো আঁজম লেদা। ওনকো দ আকোওয়াঃ গোটা উরিচ কাথা লেকা অঝা ঠেনকো মহডায়েনা দাঃ সুনুম লৗগিৎ। রৗদু হাড়াম দ ঠেঁগা তিরুপ তিরুপতে মালতি দিদিমুনিয়ে পাঁজা কেদেয়া মিৎ ফারচা ডাহারতে……।
.webp)
.webp)
