আবোওয়াঃ ওয়েব পেজ : দারায় কান ৫ আগস্ট রাম মন্দির বেনাও সৗগুন কৗমিরে জাহের গাড় রেনা হাসাঃক খজ্ আকাদা,বিশ্ব হিন্দু পরিষদ।
ডগররে বাডায় আকানা অযোধ্যারে রাম মন্দিরকো বেনাও এদা, আর দারায় কান ৫ আগস্ট,২০২০হিৎ হিলোঃ বুনিয়ৗদ্ সৗগুন বঁগা-বুরু মাহাকো নেঁডা আকাদা আর অনা মাহা মুদ্রে ভিনৗ ভিনৗ বঁগা ঠাঁও, সৗগুন ঠাঁও রেনাঃ হাসা আর ঞুতুমান গাডা নৗই রেনাঃ দাঃ জাওরা মিৎ কাতে অযোধ্যাক সেটেরা।আর অনা সাঁওতে বিহার, বেঙ্গল, ঝাড়খন্ড, উড়িষ্যা, আসাম পনৎ রে যাঁহা যাঁহা আতো করে আদিবাসী মেনাঃকো সানাম আতো জাহের গাড় রেনাঃ হাসা হঁ ইদি রেনাঃ কাথা লৗই সদর আকানা। নোওয়ারে বিশ্ব হিন্দু পরিষদ রেন কৗমিয়ৗ কদ নোওয়াক জোগাড় সাম্টাও কাতে অনা নেঁডা মাহারে কো সেটেরাঃ।
অনালেকাতে ভারত জাকাত মাঝি পারগানা মহল পাহটা খন দিসম পারানিক বাবা রাম চন্দ্র মুরমুদ মিৎ চিঠি সাকাম তালাতে দিসম রেন সানাম পনৎ বাবা কো সাঁওতে সানাম হড় কো বাডায় অচ আর সন্তর আকাৎ কোওয়া যে রাম মন্দির বেনাও ঞুতুম তে অকা জাহের গাড় রেনাঃ হাসাগে আলোপে এমা কোওয়া। অনা চিঠিরে দিসম পারানিক বাবা নোওয়া কাথা হঁয় সদর আকাদা যে জাহের গাড় রেনাঃ হাসা এম মানেগে হাপেন হিন্দু মেন্তে ক লেখা বনা। আর হঁয় তঁগে য়াকাদা যাঁহাদ ২০১১ সাল রেনাঃ সেনসাস রে ঞেল আকানা আয়মা আদিবাসী সান্তাড় হড়গে হিন্দু ক অল অচ ওয়াকাদা। অনাতে নিয়ৗ ২০২১ সাল রেনাঃ সেনসাস রেহঁ মিৎ লেকান চাল ক গিডি য়াকাদা। বাডায় আকানা নোওয়া সেনসাস রে ৮৫% খনহঁ বৗড়তি হিন্দু ক উদুঃ দাড়েয়াঃকো খান গে হাপেন ভারত দিসমদ হিন্দু রাষ্ট্র মেন্তে লেখা আ।
অনাতে আয়মা হড়াঃ মচারেগে নিৎ আঁজমঃ কানা ভারত দিসম মিৎ দিন হিন্দু রাষ্ট্র হুয় লেনখান হাপেন – “জাত্ তাম ধরম তাম উরুম উরুম তাম” মেন্তে তিনাঃ এম গারজাঃআ, মা গারজা মে। কাথা রাকাপ্ কানা নংকান মুহিম অক্ত রে আদিবাসীকো তালারে কি জুমিদ্ হিজুঃআ? সে সৗরি সারনা মারে ঘাও গে আরহঁ ক গৗদুর গৗদুরাঃআ। কুক্লি রাকাপ্ কানা হাপেন উন দিন তে সৗরি সে সারনা ধরম বাঞ্চাও তাঁহেনাতো? অকয় কদক রড় এদা বৗরাহি বাবের খন হঁ আইন বাবেরদ কেটেজ্ গেয়া।
আয়মা হড়াঃ বতর দ নোওয়া কানা মেন্তেক মনেয়েদা যে নিৎ আদিবাসী সংগঠন কোওয়াঃ যা হালে ডালে আবস্থা নংকান অক্তরে জুমিদঃ রেনাঃ চেৎ আহ্লা গে বাংক ঞেল ঞামেদা। আদম হড়দ ক মেন এদা নিৎ নোওয়াগে আদিবাসী কঠেন জুমিদঃ রেনা মারাং দাও সেটেরাকানা। আদিবাসীক নোওয়া দাওক পুচুজ্ অচ লেখান আদ তিসহঁ বাং রুওয়ৗড়া।
অনাক দিসৗতে পারানিক বাবাদ আর মিৎ ধাও সানামকো এ দিসৗ রুওয়ৗড় আকাৎ কোওয়া যে ভারত দিসমরে আদিবাসীকো লৗগিৎ যাঁহা আইন রাখা দহ মেনাঃআ মেনেৎ C.N.T. Act 1908, S.P.T. Act 1949, PESA Act 1996,Forest Right Act 2001, Land Aquasition Act 2013 অনা সাঁওতে সংবিধান লেকাতে যাঁহা বন্দেজ 5 th Scheduie আর এটাঃ এটাঃ হক-অৗইদৗর সে Reservation সানামাঃগে যায়যুগ লেকা চাবা উতৗরঃআ। আয়মা হড়াঃ মচারেগে আঁজমঃ কানা নোওয়া লক্ ডাঊন গে পাশেৎ বিশ্ব হিন্দু পরিষদ দ আদিবাসীক মুচৗৎ কাকো রেনাঃ পৗউড়িয় গিডিয়াকাদ? উনদ হাপেন জাহের গাড় রেনাঃ হাসাদ চেদাঃ আমাঃ জাহের গাড় রেনাঃ চিতৗর গে তাঁহেনা সে বাং – মেন্তেহঁ আয়মা হড়গে দিশ-হুদিশ রেনাঃ কাথাকগে নিত্ হাঁডে নাঁডেক থুতি গালচ্ বাডায়েদা।
.webp)
