আবোওয়াঃ ওয়েব পেজ্
- তেহেঞ ১৫ আগস্ট,ভারত দিশম ফুরগৗল মাহা। ঞেল্ ঞেল্তে নোওয়া দিশম ফুরগৗল তায়ম ৭৪
সেরমায় পুরৗও কেদা। বাডায় আকানা কোভিড-১৯ খৗতির ইস্কুল, কলেজ বন্দ মেনাঃতে নেশদ পৗঠূওয়ৗক
বাংক সেটের দাড়েয়াঃ কান রেহঁ সানাম জায়গারেগে ফুরগৗল মাহা মানাও হোয় আকানা মেন্তে
বাডায় আকানা। তেহেঞা মাহাদ ভারত দিশম রেন সানাম মৗনমি ঠেনগে মিৎ গরবান মাহা কানা।
ভারত দিশম রেনাঃ
নাগাম খন বাডায়ঃআ ইংরেজ জৗতি ২০০ সেরমা ধুরিয়ৗ নোওয়া দিশমরে রাজপাট ক চালাও লেদা। ব্রিটিশ
ঈস্ট ইন্ডিয়া কোম্পানি ভারত দিশমরে বৗণিজ বেপৗরি লেকাতে হেচ্ কাতে দিন দিনতে ভারত
দিশম রেন মৗনমি চেতান নাহাচার এ এহব কেদা। তায়ম দারাম অনা নাহাচার বাংক সাহাও দাড়েয়াদা
ভারত দিশমরেন মৗনমিক। আর অনাতে মহাত্মা গান্ধী, নেতাজী সুভাষ চন্দ্র বোস, চিত্তরঞ্জন
দাশ এমান গৗখুড়িয়ৗক রড় দারামকো এহব কেদা। কাথা গটায়েনা নোওয়া দিশম খন ইংরেজ বৗঈরীক
লাগা বাহেরক হোয়োঃ আ। দিশম রেন যুওয়ৗন কোওয়াঃ মায়াং ললয়েনা। বিনয়-বাদল-দীনেশ,ক্ষুদিরাম
বোস, প্রফুল্ল চাকী এমান যুওয়ৗনক আকোওয়াঃ জিউয়ি এমঃ হঁ বাংক তায়ম লেনা। কিরিয়ৗকো হাতাও
লেদা, ভারত আয়ো নোকো ইংরেজ শাসনিয়া খন ফুরগৗল তেগে হোয়োঃআ। বাডায় আকানা ভারত দিশম ফুরগৗল
লৗগিৎ তিনৗঃ তিনৗঃ হুলগৗরিয়াআঃ জিউয়ি আধা দিনরে চালাও আকানা অনা রেনাঃ হিসৗব লেখা বৗনুঃআ।
ইনকৗ কাতেৎ ১৯৪৭ সাল রেনাঃ ১৫ আগস্ট তেঁহেঞা মাহারে ভারত দিশম ফুরগৗল লেনা।
মেনখান ভারত দিশম
ফুরগৗল এন তায়ম, ফুরগৗল রেনাঃ আঁশ কুক্মু চেৎ পুরৗও এনা ? যাঁহা কুক্মু মিৎ দিন নোওয়া
দিশম রেন হুলগৗরিয়ৗক ঞেল লেৎ। ভারত দিশম রেনাঃ নাগাম অল এনা। নোওয়া দিশম রেন নাগামিয়ৗকো
আকোলেকা নাগাম ক তেয়ার কেদা। এঁডাঃ তাহেয়েনা কো নোওয়া দিশম রেন আদিম আদিবাসী হড়।
নাগাম রে আদিবাসী হুলগৗরিয়ৗ কোওয়াঃ ঞুতুম অনকা মাছা
বাং অল লেনা। যাঁহায়কো নোকো খন অৗডি মাড়াংরে ইংরেজ সাঁও কো লৗড়হৗই লেনা। ভারত দিশম
ফুরগৗল লৗড়হৗইরে ঞুম লেগ্ কানা বাবা তিলকৗ মুরমু, সিধু-কানু-চাঁদ-ভৈরব, বীরসা মুন্ডা
এমান এমান হুলগৗরিয়ৗ কোওয়াঃ এনেম অৗডি বৗড়তি তাঁহেকানা যাঁহাদ নিৎ আয়মা লেকান মারে
গেজেট করে খন বাডায়ঃ কানা। মেনখান ভারত দিশম রেনাঃ নাগামরে নোকোওয়াঃ এনেম রেনাঃ কাথা
অনকা বাংক অল লেদা।
তেহেঞ উনৗ উনৗ
জায়গারে হুলমাহা মানাও এন রেহঁ আদিবাসী হুলগৗরিয়ৗ কোওয়াঃ ঞুতুম তিনৗঃ জায়গারেক ঞুম
হালাং কেদা? কুক্লি তাঁহেন কান গেয়া। ভারত দিশম রেন আয়মা হড় ঠেন গে নিৎহঁ নোকোদ লাতার
গাঁতাত রেন মেন তেকো লেখা কোওয়া। আয়মা হড়গে নোকোওয়াঃ বাং উপরুম রেনাঃ ভান ক উদুগা।
ইংরেজ ক লাগা
ডিগ্লৗও তায়ম, সংবিধান রেনাঃ নেয়াম লেকাতে নোওয়া দিশম চালু রেনাঃ কাথা। মেনখান আয়মা
দিশম চাচালাও কোগে সংবিধান রেনাঃ নেয়াম বাংক বাতাও লৗগিদঃ কানা। অনাতে ঞেলঃগঃ কানা
আদিবাসী ক চেতান রে পৗহিল লেকাগে নাহাচার চালাও ইদিঃ কানা।
অকা অকা জহঃ খবররে
ঝালকাও রাকাব্ গদঃআ নিৎহঁ ভারত দিশম রেনাঃ নোওয়া কঁড় হানা কঁড় করে বিন জমতে হড়ক গুজুঃ
কানা। বাডায়ঃ কানা আদিবাসীক সংবিধান রেনাঃ হক্-অৗইদৗর তাঁহেন তুলুজ্ অনা অৗইদৗর বাংক
ঞাম এদা। নানাহুনৗর চাকরি হৗটিঞ রেঁহ ঞেলঃ গঃ কানা আয়মা অ-আদিবাসীক সেলেদঃ কানা। আয়মা
জায়গারে আদিবাসীক বির-বুরু, হাসা, দাঃ এমান করে খন ক রেজ্ ভুড়ুজ্ অচঃ কানা। দিশম
ফুরগৗল নুনৗ সেরমা পারম কাতেহঁ ঞেল আকানা আদিবাসীক আয়মা জায়গারে রড় রেনাঃ দাও হঁ বাংক
ঞামা।
অনালেকাতে নিত্
আয়মা হড়াঃ মনেরে কুক্লি রাকাব্ কানা নোওয়াদ চেৎ লেকান ফুরগৗল ? নোওয়া ফুরগৗল লৗগিৎ
গে চেৎ হুলগৗরিয়ৗ কদ ইংরেজ বিরুধ্রেক লৗড়হৗই লেনা ? সিধু-কানু-চাঁদ-ভৈরব, বীরসা মুন্ডা
এমান হুলগৗরিয়ৗ জিউয়েৎ ক তাঁহে লেনখান নওয়া ফুরগৗল ঞেল্তে সাহাও তাঁহে দাড়েয়াঃকেয়া
ক তো ? কুক্লি দ তাঁহেন কান গেয়া।
এনহঁ নিত্ আবো
সানাম কগে ফুরগৗল দিশম রেন নাগারিয়ৗ। অকয় চেৎ এ ঞাম কেৎ,অকয় চেৎ এ আদ্ কেৎ। এনহঁ সেরমা
কে সেরমা তেহেঁঞা মাহারে ভারত দিশম রেনাঃ পে-রং ঝান্ডা দ অটাংঅঃ গে তাঁহেনা হিপিড় হিপিড়……..।
.webp)
