নেতার আদিবাসী হোস্টেল ক আর আদিবাসী পৗঠুয়ৗকঠেন অনা রেয়াঃ অরসং
 |
| সতন কুমার সরেন |
আদিবাসী হোস্টেল দ সানাম কবন বাড়ায় গেয়া অঁডেদ বিন কৗউডি এম কাতেক তাঁহেন কান তাঁহেনা আর তাঁহে কাতে আবরেন আদিবাসী গিদৗর ক অলক পাড়হাওক সেঁড়ায় এৎ তাঁহেনা। আডিগে আবরেন আদিবাসী হোষ্টেলরে তাঁহে কাতে অলঃ ক সেঁড়াও আকাদা । অলঃ সেঁড়়া কাতে তিনাঃ যে চৗকরীক ঞাম আকাদা মিৎ কাথাতে বাং লৗয়ঃ আ। নে হড়হঁ আদিবাসী হোস্টেলরে তাঁহে কাতে গে অলঃদ সেঁড়া হুয় আকানা।
মেনখান নেতার আয়মা আদিবাসী হোস্টেল করেনাঃ যা অবস্থা ঞেল কাতে সে উইহৗর লেখান দায়াগে বুঝৗঃ কানা। অনা রেয়াঃগে মিৎবার কাথা রড় তরাও আঃ কানাঞ । আব নআ পনত্ রেয়াঃ আডি গান আদিবাসী হোস্টেল কগে বন্ধ হররে মেনাঃ আ সে কিছুদ বন্ধ আকান গেয়া। কারন দ হুয়ুঃ কানা পৗহিল যাঁহা হোস্টেল চালাও রেয়াঃ অৗনঅৗরি তাঁহে কানা,অনাদ নেতার দক বদল আকাদা। যেলেকা পৗহিল দ হোস্টেল রেয়াঃ স্টাইপেন্ড কৗউডি দ স্কুল হেডমাস্টারাঃ একাউন্টরে হিজুঃ কান তাঁহেন। মানে স্কুল হেড রে। অনাতে হেডমাস্টার কগে আ্কোওয়াঃ দায়িত্বরে হোস্টেল দক চালাওয়েৎ তাঁহে কানা। মেনখান নেতার অনা অৗনঅৗরিদ BCW দপ্তর এ পালটাও আকাদা। নেতারদ গিদৗর কোওয়াঃ ঞুতুম তেগে গিদৗরাঃ একাউন্ট রেগে হিজুঃ কানা, সের্মারে বার ধাও। চেদাঃ পাল্টাও এনা আদিবাসী হোস্টেল রেয়াঃ অৗনঅৗরি ? বাংমা স্কুলরেন হেডমাস্টারক গিদৗর কোওয়াঃ অনা স্টাইপেন্ড কৗউডি তে গিদৗরক ভৗগিঠিক বাংক জম অচয়েৎ ক তাঁহেনা মেন্তে অভিযোগ রাকাপ্ কান তাঁহেনা। অনাতে অৗনঅৗরিদক পাল্টাও আকাদা মেন্তেগে বাড়ায় ঞাম আকানা। নিৎ কাথাদ হাঁডে নাঁডে আঁজমঃআ হেডমাস্টারক যদি কৗউডিক হান্তে নাতেয়েৎ তাঁহেন তাহলে ব্লকরে মিৎটান কাতে হোস্টেলক ঞেল লৗগিদ অফিসার মেনাঃ কআ উনকুদ চেৎ ক ঞেল এৎ তাঁহেনা? অনাতে অৗডি রকম নংকানা আনাট খৗতির অৗনঅৗরি পাল্টাও এনতে আয়মা স্কুল গে হোস্টেল চালাও রেয়াঃ আঁগিভৗরদ বাংক গঃ এদা।
অনাতে নেতার দ আদিবাসী গিদৗরক চাঁদ কে চাঁদ কৗউডি এম কাতে হোস্টলরে তাঁহেন লাগাও এৎ কোওয়া। আর আকোওয়াঃ স্টাইপেন্ড কৗউডিদ তুরুয় চাঁদো তায়ম হিজুঃ আ, একালতে গিদৗরাঃ একাউন্ট রে। অনা টাকাদ গিদৗর গেক হাতাও আ। অৗডি ভৗগি কাথা, মেনখান আদিবাসী হড় উনৗ কৗউডিতেদ বাক কেটেচ্ আকানা যে চাঁদ চাঁদ টাকা এম কাতে গিদৗর হোস্টেলরেক দহ দাড়েয়াঃকআ। আর কৗউডি আনাট যাঁহায় কোওয়া মেনাঃ আ উনকু গেত আদিবাসী হোষ্টেলরেদ গিদৗরক দহ কোওয়া। অনাতে অৗডি গিদৗরকগে আকরেন আয়ুবাবা হোস্টেল রে বাক দহ দাড়ে আক কানা। কৗউডি বাংক এম দাড়েআঃ খৗতিরতে হোস্টেলক বৗগি অচয়েৎ কোওয়া। এমন চেৎ সাঁগিঞ রেন গিদৗর কদ বাক হেচ সেন দাড়েআঃ খৗতির স্কুল খন হঁক উচৗড় এৎ কোওয়া। সুর সুপুর এম. এস. কে. ,জুনিয়ার স্কুল করেক ভর্তি এৎ কোওয়া। আর অড়াঃ খন গেক হিজুঃ সেনঃ কানা। অনাতে অৗডি অৗদিবৗসী গিদৗর কগে তালা হররে অলঃ ক বৗগিয়েৎ তাবনা। আর বৗগি কাতেৎ উনকু মুদ্রে আয়মাগে গুজুরাট মহরাষ্ট্র কৗমিক চালাঃ কানা। নেতার আয়মা আদিবাসী হোষ্টেলক ঞেল লেখান বুঝৗউ ঞামঃ আ পৗহিল যাঁহা লেকা গিদৗর ক তাঁহেন কান তাঁহেন নেতার অনা রেয়াঃ অদ্ধেক হঁ বাক তাঁহেন কানা। আদ চিকৗতে অল পাড়হাও দক সেঁড়ায় তাবনা। আসল জায়গা রেগে আব দক চাবায়েৎ বনা।
যাঁহারে আবরেন গিদৗর পিদৗর সেচেদঃআ অনা আদিবাসী হোষ্টেল কগে বন্দ কানা। নোওয়াতেদ আদিবাসী কোওয়াঃগে জৗস্তি খুতি হোয়োঃ কানা। নআ কগে সরকার ক চাচালাও এ কান হড় কোওয়াঃ রেয়াড় অড়াঃরে দুড়ুপ কাতে লাসের বুদ্ধি। যাতে আদিবাসী হড় কদ অলঃ পাড়হাঃতে আলক লাহা দাড়েআঃ মা। উনকু দ এনেচ সেরেঞ মাক, অনাকতে ভুলৗও কাক মা। সের্মারে আদিবাসী পাতা হুয়ুঃ মা। আদিবাসী কোওয়াঃ এনেচ সেরেঞ লৗয় লৗগচৗরক উৎনৗউ লৗগিদ কোটি কোটি কৗউডি খরচঃ কানা। মেনখান আদিবাসীক অকালেকাতে ভৗগি অলঃ পাড়হাওক সেঁড়ায়া। অনাদ উকুর ঞেলঃ কানা?
যেমন প্রত্যেক ব্লক রে আদিবাসী পাতা হুয়ুঃ কানা,অনকাগে প্রত্যক ব্লক রে পাতা বাদালতে,অনাক কৗউডি তেগে আদিবাসী গিদৗরক লৗগিত কোচিং রেয়াঃ বেবস্থা লেখান বৗড়িচ হুয় কোওয়াঃ কি ? মেন গানঃ আ তেহেঞ জঙ্গল মহল রেয়াঃ আদিবাসী হোষ্টেল ক বন্দ হররে। নোওয়াক ইদিকাতে দ অকয় হঁ বাক রড় আঁগপ এদা। এটাঃ আডি আয়মা কিছু ইদি কাতেৎ আবরেন নেতাক সে, এম এল এ ,এম পি কদক রড় দারাম এদ রেহঁ, মেনখান আদিবাসী হোস্টেল কঁহ অনকাগে ঞেল লৗগ্তি কানা। আর আবোওয়াঃ আডিগে আদিবাসী গাঁওতা মেনাঃ তাবনা, উনকুওয়াঃহঁ নোওয়াক ইদি কাতে রড় দারাম রেয়াঃ দরকার মেনাঃ আ। ঞেল এৎ গেয়াবন নেস যাঁহায় মৗই বাবুতেক সান্তাড়ী মিডিয়াম তে উচ্চমাধমিক ক পাস কেদা। উনকুওআঃ চেৎ অবস্থা। পনত রে নিৎ ধৗবিচ্ মিৎটানহঁ সান্তাড়ী মিডিয়াম কলেজগে বৗনুঃ আ। অকারেক পাড়হাঃ আ নিতহঁ অনারেয়াঃ ঠিকঠিকানা বৗনুঃ আ। তাহলে বুঝৗও মাবন আব লৗগিদ্ অকয়াঃ তিনৗঃ দায়া দুলৗড় মেনাঃ তায়া? নোওয়াক ইদিকাতে আব আদিবাসী্ক রড় দারাম লৗগিদ্ সানাম গাঁওতাক মিৎ কাতে সানাম পা্কাড়রে আড়াং রাকাব লৗগ্তি কানা। বাংখান আবোওয়াঃ ডাঁডা গেক রৗপুদ এৎ তাবনা ,চিকৗতেবন তিঁগু কেটেজঃ আ? চিকৗতে রেঁগেজ্ নাচার আদিবাসীকরেন গিদৗরক অলঃ পাড়হাওক সেঁড়ায় তাবনা?
.webp)
