আদিবাসী মাহা দিসৗকাতে
বুরুলুকুই
মান্ডি
জাঁহান সাতাম চেতান জখচ্
বৗড়তি কায়তে মেৎ লুতুর রেনাঃ লৗগ্তি পাড়াঃআ, উনগে – দিসম আর বাংখান আয়মা দিসম করেয়াঃ
জুমিদ্ গাঁওতা, মেন্মা রাষ্ট্রসংঘ হতেচ্তে অনা সাতাম চেতান নাপায় কৗমি হোয়োঃ আঁস্তে
আয়মা লেকানাঃ কৗমি কৗস্নি সাবঃআ। আর অনা হতেচ্তেগে
সানাম কোওয়াঃ ঢেঁসাওনা লৗইথৗইতে ঞুমানা দশক সেরমা বাংখান মাহাক ছৗট্য়ারঃ আ। জেলেকা
আবো আদিবাসী কো চেতান নাহাঃ জাঁহা লেকা রিডচ্-রডচ্, আঁদাঃ-কচ্লন, নাহাচার, সিঁয়াজৗরি
চালাঃ কানা,আর বাংখান জাঁহান অজ্তে আবো আদিবাসী কো নিপুজ্ হর্ তেবোন মহডাঃ কানা,
আর বাংখান অনহেলারে মেনাঃ বোনা – অনা খৗতির তেগে আবো দোঃ লৗগিৎতে রাষ্ট্রসংঘ দ নংকান
কৗমিহরা-য় সাব্ আকাদা।
রাষ্ট্রসংঘ – ১৯৯৩ সাল দ
‘জেগেৎ আদিবাসী সেরমা’।
১৯৯৪ খন ২০১৩ সাল দ ‘জেগেৎ
আদিবাসী দশক’ ।
আর ২০১৯ সাল দ
‘জেগেৎ আদিবাসী পারসি সেরমা’ লেকাতেয় ছৗট্য়ার লেদা।
অনকাগে ১৯৯৫ সাল
খন রাষ্ট্রসংঘওয়াঃ দু দেলাতে যাও সেরমাগে তেহেঞাঃ দিন ৯ আগস্ট দ ‘জেগেৎ আদিবাসী মাহা’
লেকাতেবোন মানাও-গুনৗও সে বোন উদ্যাপনেদা। মেনখান, আবো আদিবাসী কোওয়াঃ সানাম সেচ্তে
লাহান্তি লৗগিৎ,নুনাঃ ‘সৗরি-নাসে’, হেঁ ইঞদ ‘সৗরি-নাসে’ গিঞ মেনা, মেন্মা ‘হড় উদুঃ’
কৗমি কৗস্নি সাব্ কাতে আবোওয়াঃ চেৎ লাহান্তি সে পরহ হোয়াকানা ?
আবো আদিবাসী কোওয়াঃ
দ বির-বুরু সাঁও গৗহির সৗগৗই তাবো। বির-বুরু তাপল রে অড়াঃ দুওয়ার কাতে তাঁহেন ,আর চাষ-আবাদ্
লৗগিৎ মেনাঃ তাবোনা সংবিধান স্বীকৃত অৗইদৗর। মেনখান অনা অৗইদৗর-আইন দ আইন লেকাতেগে
মেনাঃ আকাৎআ, বাস্তব রে অনা অৗইদৗর ভুঁজৗও লেকান অৗত্ দ বৗনু আন তাবোনা, সরকার অনা
আইন বাংকো জওয়াও অচ ওয়াঃ কানা; চেদাসে কিছু পুরিবেশ বিদ্ ক মনেয়া- আদিবাসী কো হতেচ্তেগে
সেঁদ্রা-শিকৗরিয়ৗ কোওয়াঃ নুনৗঃ দৌরাত্ম,উৎপাত; আদিবাসী কো হতেচ্তেগে মাওবাদী আস্রা
কো ঞামেদা।
আদিবাসী কো দ
তিনৗঃ সেদায় জুগ জুগ খন বির-বুরু সাঁও গৗহির সৗগৗই তপল কাতে বাঞ্চাও মেনাঃ বোনা। আবো
হঁ থ সসনঃ মৗনমি গে। মেনখান হাহাড়াঃদ,বিরবুরুরেন জিব-জিয়ৗলি,দারে-নৗড়ি লৗগিৎ কিছু পুরিবেশ
বিদ্ কোওয়াঃ মেৎদাঃ জরঃ আ – মেনখান আদিবাসী কো লৗগিৎ উইহৗর ভাবনা দ অকয়াঃ হঁ নিন উডিচ্
বৗনুঃ আনাং। বির-বুরু, দারে-নৗড়ি, জিব-জিয়ৗলি কোওয়াঃ এনেম জে আবোঠেন তিনৗঃ মেনাঃ আনাং,অনা
এটাঃ অ-আদিবাসী কঠেন সেঁড়ায় হোয়োঃ তাবোনা?
আবো ভারত দিসমরে,
জাঁহারে শায়কাড়া পে-গেল হিঁস বির-বুরু তাঁহেন রেনাঃ কাথা,অঁডে নিতোঃ মেনাঃআকাদা গেল-আরে
হিঁস সুমুং। আদিবাসী কোওয়াঃ তাঁহেন লৗগিৎ আর চাষ আবাদ লৗগিৎ হাসাধুড়ি লৗগ্তিআ শায়কাড়া
বার্ হিঁস লেকা। নিন উডিচ্ হাসা সরকার বায় এম দাড়েয়াঃ কানা? জাঁহা উডিচ্ হাসাধুড়ি
মেনাঃ তাবোন অনাহঁ সরকার-এ রেচ্ এৎ বোনা।
নতে আসাম খন উড়িষ্যা,
বির-বুরু তাপল রেনাঃ হাজার হাজার হেক্টর অত্-হাসা শিল্পপতি কো এমাওয়াকো হোয়োঃ কানা
কারখানা বেনাও লৗগিৎতে। অঁডে আদিবাসী কোওয়াঃ সাহান-সাকাম তুমাল জং রেনাঃ অৗইদৗর বাং
তাঁহেনা। আটাল আটাল ধিরি কুটৗম পসাঃ কাতেৎ, বহঃ রেনাঃ উদ্গৗর দাঃ জাঁগারে জর কাতে,চাষ
লৗগিৎ অড়াঃ দুওয়ৗর লৗগিৎ অত্ খেত্ বন বেনাও জং আকানা- মেনখান তেহেঞদ আবোগে দিসম রেন
ঝতম খন রেঁগেচ্; আর অড়াঃ দুওয়ৗর, অত্-হাসা, ধরম জাহের থান খনবো ছুডৗর অচঃ কানা। চেৎ
হাহাড়া বাং !!
ভারত দিসম রে
এয়ায় টুডৗঃ মড়ে হৗটিঞ সুমুং রাখা দহ, মেনমা সংরক্ষন মেনাঃ তাবোনা সরকারি চৗকরিরে। অনা
লৗগিৎ তেহঁ তেহেঞ তিনৗ কাথা আঁজম হোয়োঃ কানা! আবোওয়াঃ হঁথ কুক্লি –
ভারত দিসম ফুরগৗল
এয়ায় গেল মড়ে সেরমা তায়ম হঁ চেদাঃ সংরক্ষন লৗগ্তি কানা ? চেৎ, আবোওয়াঃ দ লাহান্তি
বাং হোয়াকানা ? বাং হোয়াকান খান চেদাঃ, অকয় ক হতেচ্তে ? আবো লৗগিৎ ডামডাহেঃ সরকারি
প্রকল্প ক চেদাঃ আবোঠেন বাং সেটেরঃআ ?
- চেদাঃ আবো আদিবাসী কদ ছৗতিক জৗতি কোওয়াঃ পৗরসি
কষ্ট হারন কাতে সেঁড়ায় হোয়োঃ তাবোনা, আর ওন কোওয়াঃ পুঁথি পাড়হাও হোয়োঃ তাবোনা ?
- চেদাঃ আবোওয়াঃ
জানাম পৗরসি সান্তাড়িতে প্রাইমারী খন পি.জি/ পি.এইচ্.ডি হৗবিচ্ নিরলৗ অলঃ পড়হন রেনাঃ
দাঁও বাং বো ঞামা ? তবে চেৎ সান্তাড়ি পৗরসি দ ঞুতুম রেগে সংবিধান স্বীকৃতি পৗরসি সুমুং
?
- জাঁহায় আতো-অড়াঃরেন
আদিবাসী গিদ্রৗ, তিস্হঁ দূরগৗ পূজৗ মন্ডপ তে বায় সেটের দাড়েয়াকাদা, উনি গিদ্রৗ চিকৗতে
‘দূরগৗ পূজৗ’ ইদিকাতে রচনা-য় অ-লা ?
- চেদাঃ আবো আদিবাসী
কোরেন গিদ্রৗ কদ বাহা-কারাম-দাঁসায়-সহরায়-জাহের জানথাড়, মাঘ সিম-এরঃসিম ইদিকাতে রচনা অল্ রেনাঃ দাঁও বাং কো ঞামা ?
[ নোওয়া অনল রে মানতিয়া
গৌরী টুডু-ওয়াঃ উইহার-ভাবনা নাসেনাঃ সদ্ড়েয়াকানা।]
.webp)
