আবোওয়াঃ আদ্ দিসম দ অকারে তাঁহে কানা
 |
| বৈদ্যনাথ হাঁসদা (হুলগৗরিয়ৗ) |
হানে সেদায় তিস খনচং আবোওয়াঃ খেরওয়াল কোওয়াঃ দ মচা মচাতেগে হেচ আগু আকানা বিনতী,বাঁখেড় ,সেরেঞ এমান এমান লেকান কাথা খন মানমী সিরজৗও রেনাঃ নাগাম। আদ আবোওয়াঃ দ অল বেল তেদ বাং তাঁহে কানা। এনরেহঁ ইংরেজ মিশনারীক রোমান হরফতে সানতাড়ী পৗরসিতে পতব ক অল হটঃ আকাদা বিচকম খিরসটান ধরম হতেৎ তে সানতাড়ী সে খেরওয়াল কোওয়াঃ ধরম রেনাঃ ফেডাৎ কাথা দ বাংক অল আকাদা। মেন দ মিশনারীক বাডায় তাঁহেৎ খেরওয়াল কোওয়াঃ ধরম যুদি টুডৗঃগ আ তবে খান খেরওয়াল কদ কেরেসতান ধরম বাংক হাতাও আ। মেন খান খঁনদ রঁনদ কাতে বাডায় ঞাম আকানা হরপ্পা আর মহেঞ্জ দাড়ো রেনাঃ ধিরী রে অল ঞাম লেনা। চেদাঃ বাংমা অনা অকত রেদ কাগজ বাংখান ছাপা যন্ত্র রেনাঃ বন্দেজ বাং তাঁহে কানা,অনাতে হরপ্পা আর মহেঞ্জদাড়ো রেন মানোওয়া দ হাসা বাংখান ধিরি চেতান রেগে ক অল লেদা । অঁনতে হঁ আদ আরয আর অনারয মুদ রে লৗড়হৗই খৗতির আরয ঠেন আব অনারয দক লাগা হচ লেনা বির ডুংরী সেচ্ ক দৗড় লেদা অনাতে অনা অল কদ ক বৗগি হটঃ আদা।বিচকম জিওয়ী বাঞচাও দৗড় দৗড়তে অল কদ বাং বেওহার হতেৎতে লিপিকদ ক হিড়িঞ কেদা। মেনখান অল বাদাল তে বিনতি,বাঁখেড়, কুদুম, ,কৗহ্নী,অনঁড়হে সেরেঞ কদ তাঁহেয়েন গিয়ৗ। অনাতে পালেন অকয় অনঁড়হিয়ৗ চয় গাবান আকাদা হানে তিস রেচ-
"সেদায় যুগ রেহঁ,আঁগিল যুগ রেহঁ
অল দ তাবন তাঁহে কান গে
বৗইরী লৗড়হৗই রেবন হারাওয়েনতে বয়হা
বুরু কঁঘর রেবন চুকু লেন দ
অল হিড়িঞ য়েনা কাথা তাঁহে য়েনা
অল মেনতে রডদ মেনাঃ গেয়া ।।
মেন খান হাপড়াম কোওয়াঃ সেদায় রে পালেন লিপি রেনাঃ চল দ তাঁহে কান গিয়ৗ। বিচকম বাহ্রে রেন বৗইরী তুলুচ্ লৗড়হৗই রেক হারাও লেন তাবনা অনাতে বির , ডৗহি ,ডুংরী ঞির কাতে বুরুরে, সঘাঁরে , গুহৗরেক চোকো লেনা। অনাতে পালেন লিপি দবন হিড়িঞ কেদা। খৗলি তাঁহেয়েনা মচা মচাতে বিনতি,বাঁখেড়, সেরেঞ এমান এমানাঃ অনাতে পালেন নেতারহঁ লুতুর বিৎ কাতে আঁজম লেখান রাঁওয়াঃ আ--
"চৗই চামপা গাড় দ লিলি বিছি
কঁয়ডা বাদোলী গাড় দ লিখন গড়হন
দায়াগে চৗই চামপা বাদোলী কঁয়ডা,
দায়া গে গাড় বন বৗগিয়াদা"।
আদ আবো খেরওয়াল বিরৗদালি কোওয়াঃ আদ্ দিসম দ অকারে তাঁহে কানা অনা রেনাঃ তেলা বাডায় সানা বন খান ঞেল লেগে বন আব দ অকা খন অকা সেৎ ? আদ আবোওয়াঃ গাড় দ তাঁহেকানা হিহিড়ি পিপিড়ি ঠাঁওদ অকারে অনা ইদি কাতে সৗঁড়েসিয়াঃ কোওয়াঃ রাপাচাঃ মেনাঃ আ। যেলেকা Scerce sorad এ মেন আকাদা উতর পছিম সেদ এতহব মেন খান ডালটন নোওয়া মত বাং এ পৗতয়ৗও আকানা । আচ দয় মেন দা উতর পূরুব আসাম সেদ খন গে আবোওয়াঃ সিরজৗও দ ।আরহঁ অকয় কদ ক মেন এদা - হিহিড়ি পিপিড়ি লৗই রেদ বেবিলন । আর আব খেরওয়াল দ আরয খন হঁ লাহা খাইবার বোলান হরতে ভারত তেক বলঃ হেচ লেনা।আদ আবোওয়াঃ দ অল বেল সেদ পুঁথি বানুঃ খৗতির কেবল মাত্র সেরেঞ আর কৗহনী বিনতী তালাতেগে হেচ অৗগু আকানা।
যেলেকা হিহিড়ি-পিপিড়ি রেবন জানাম লেন খোঁজ তালাস রেবন হারা বুরু লেন দ। মেন দ হিহিড়ি-পিপিড়ি ঠাঁও দ হাজারিবাগ জেলা রেনাঃ আহুরি পরগনা সে হাজারিবাগ জেলা রে চৗই চামপা পরগনা দ আবোওয়াঃ গে তাঁহেকানা ;জম আকানা বাংমা জাওরা ঞুতুম মিৎ অৗদিবাসী রাজায় তাঁহেকানা । আদ উনি রাজা দ তুড়ুক সাসনিয়ৗ ইবরাহিম আলি সে মালিক আঃ আয়ূর তে তুড়ুক শাসনিয়ৗক সেনা ফৗদ আতেক লাহাহেচ লেনা। মালিক রেদ মহমমদ-বিন-তুঘলক রেন সেনাপতি তাঁহেকানা আর অনা ১৩৫৩ সাল রেগেয় গুর লেনা। অনাতে লৗই গানঃআ ১৩৪০ সালরে গজ্ জাওরাঃআ রাজ পাট এ হাতাও লেদা। আদ হিহিড়ি পিপিড়ি দ চৗই চামপাদ হাজারিবাগ রেনাঃ উতর পুছিম নাখাগে।অঁনডে হঁ বিহার পনত খন অৗডি আয়মা দিকুক বলঃ হেচ এনা। চৗই চামপা ক হেচ এন খৗতির আবোওয়াঃ অৗদ দিসম বন বৗগিয়াদা।
হড় ক লৗইয়ৗ বাংমা মৗনমীক সাঁগে খৗতির আবো খেরওয়াল কদ হিহিড়ি পিপিড়ি বৗগি কাতে হারা রাতা তেক চালাও এনা। অঁনডে জৗতি গে ধাসাও এনা বিচকম মিৎ সি পুরুষ গে। নুকিনদ হারাতা বুরু রেকিন তাঁহেয়েনা ঠাকুরাঃ আশীষ তে। তায়ম দারাম নুকিন মানোওয়া আতেগে মিৎটাং জৗত বন বাঞ্চাও এনা ।
সানাম সানতাড় জৗতি ধবংস রেনাঃ অজে লেকাতে বাংমা উনকু আডি ক বৗড়িচ লেনা।মেন দ 'বৗগৗহি' লেনা সে ঠাকুরাঃ লৗই কাতে মারাং বুরু দেবা-সেবা বাংক করাও এৎ তাঁহেৎ । বোঙগা-বুরু ক ঠাকুর অৗডিয় অৗড়িস বেজার লেনা। অনাতে শাসতি এম লেকাতে মিৎ হাপতা গে 'সেঁগেল দাঃ' এ জাড়ি লেদা যাঁহা দবনমেন।
আদ আবো খেরওয়াল দ হারাতা খন ক চালাও এনা সাসাং বেডা। অঁনডে খন জারপি, জারপি খন আহিরী। অনা তায়ম দ কেনদি,চৗই মুচৗৎ রে চামপাতে। চামপারে কয়েক পুরুষক তাঁহেকানা আর অঁনডে গে তাঁহে তাঁহে তেগে আবোওয়াঃ সাঁওতা,সমাজ বেবসতা দ নাপায় কারতে বেনাও অৗরু য়েনা। আদ নিতঃ আব যাঁহা বোঙগা বুরু, নেয় নীতি, আচার নেমাচার, ধরম করম, মৗঝি অৗরি বন মানাও এদা অনা দ অনাগে। আয় উমৗন বার সায় বছর তাঁহেন তাঁহেনতে তায়ম তায়ম আরহঁ দিকু কোওয়াঃ কচলন সাসেৎ তে বাধ্য কারতে মানভূম রেনাঃ পূরুব নাখা পাঞ্চেৎ সেৎ ক হেচ এনা।অঁনডে হঁ রাজা যখন হিনদু ধরম হাতাও কাতে রাজপুৎএ ছৗটয়ৗর এনা। অনাতে আবোরেন খেরওয়াল দ রৗগি অৗড়িস তে সাঁওতাল পরগনা ক হেচ এনা। অঁনডে খন ছোটনাগপুর এলেকা খন ভারত রেনাঃ আয়মা টঠা রেগেক গিরৗবাস সে ক তাঁহেয়েনা ।
লাঃসাঃ - (নোওয়া অনল অলরে গড় হাতাও হুয় আকানা অনলিয়ৗ মৗন অনিল কঁয়ডাঃ সংস্কৃতির দর্পন আদিবাসী পুঁথি খন ) ।
.webp)
