বির-বুরু দারে কগে বাবাঞ্চাও কো
 |
| ডাঃ সুরেন্দ্রনাথ মান্ডি |
আবো দিসম রেদ জুলাই, মেনমা আষাড় –শান দ দাঃ জাপুৎ চাঁদো কানা। অনা খৗতির নওয়া চাঁদোরেগে জৗস্তি কায়তে দারে কবোন রহয়া। জুলাই চাঁদোরেগে বির-বুরু পারাব সে ‘বন মহোৎসব’ বো পালাওয়া,দারে রহয় হাপ্তা বো পালাওয়া। উসুল জায়গারে সাঁগে দারেকো হারাবুরুদ বির-বুরু বো মেতাঃআ।
যত হড়গে বো বাডায়া পুরিবেশ রে দারেক রেনাঃ এনেমদ তিনাঃ গান মেনাআ। এনতে ধৗরতি পুরিরে দারেক বাং তাঁহে লেন খান মিৎ ডঁডেক হঁ জিউয়িয়ৗন ক অহ বাঞ্চাও বোন তাঁহে দাড়েয়াঃআ। এনতে দারেক যাঁহা অক্সিজেন হয় কো আড়াগা, অনা হড়মরে সাঁহেৎ খৗড় জং আন রেগে আবো জিউয়িয়ৗন ক বাঞ্চাও বো তাঁহেনা, আর আবোওয়াঃ হড়ম খন যাঁহা বিষ আন হয় কার্বন-ডাই-অক্সাইড অডকঃ আঃ অনা দারে নৗড়ি কো চেপেচ্ শিঠৗয়া।
মৗনমি কোওয়াঃ বাঞ্চাও তাঁহেন লৗগিৎ হড়ম রে যাঁহা জমাঃ ঞুওয়াঃ করেনাঃ লৗগ্তিয়াবোনা , অনা করেনাঃ রেহেৎ দ মেন খান একালতে দারে কগে। ঞুয় দাঃ চেৎ লেকা এপেল হেঁৎতে দারে ক খন বো ঞামা, অনকা এটাঃ যাঁহানা জমাঃ ঞুওয়াঃ কঁহ – চেৎ পৗঊরা,হাঁডি,তওয়া, জিল, জ, বেলে,আনাজপৗতি,দাকা, দৗল,রান মুরগৗন, এমান এমান; সেতোং-জৗপুৎ-রেয়াড়-লাজাও খন দাপালঃ লৗগিৎ অড়াঃ দুওয়ৗর, লুগ্ড়িচ লাপো –চেৎ বাংকো সারভার আবোনা দারে নৗড়ি ! অনাতে দারে কদ জিউয়িয়ৗন কোওয়াঃ জিউয়ি কান গেয়া। আবো আদিবাসী কঠেন মা মিমিৎ দারে ‘বঁগা’ কান গে। দারে রূপতে বঁগা ক রহয় সে তিঁগু তাঁহেনা আবোক কো বাঞ্চাও লৗগিৎ তেগে, লৗগ্তিরে দারে দেজঃ লাহারে আর দারে খন আঁড়গো তায়ম আবোদ দারে বন জোহারাআ,দারে কঠেন মেনমা বঁগা কঠেন ইকৗ হাতাও খৗতিরগে। আবোরেন বাবাঞ্চাও কদ মেন মা বঁগা কদ , দারে রূপ তেগে মেনাঃ কোওয়া আর অনাতেগে দারে বাংখান দারে বুটৗরেদ বন বঁগা-বুরুওয়াআ? দারে কো, মেনমা বির-বুরু সাঁও আবোওয়াঃ দ গৗহির সৗগৗই তাবোন। মৗনমি লাতা বাঞ্চাও তাঁহেন রে বির-বুরু দারে করেয়াঃ নুনৗ এনেম দ আবোরেন অৗগিল হাপ্ড়াম ক তিস সেদায় খন চং কো তেবাঃ ঞাম আকাৎ, অনাতেগে বির-বুরু করে কো গিরৗবৗসিয়েৎ তাঁহেন। নেতার হঁ জৗস্তি আদিবাসী কোওয়াঃ গিরৗবাস তাবোদ বির-বুরু জাপাঃ করেগে। এন্তে দারে-নৗড়ি বেগর আবোদ অহ গে বাঞ্চাও বো তাঁহে দাড়েয়াআ।
বির-বুরু দাড়ে নৗড়ি কদ এখেন জমাঃ ঞুওয়াঃ সে সাঁহেৎ লৗগিৎ অক্সিজেন হয় সুমুং দ বাংকো সারভারা –আকাল, বানভাসি আর হাসা ধাসাও সে গালাও টেকাও দারাম কাতেৎ হয়-হিঁসিৎ (আবহাওয়া) নাপায় দহয়, মেনমা পুরিবেশ রেনাঃ ঢিংকৗ ঢৗওয়াঃ ঠিক বজায় কো দহয়া ।
মেনখান নাহাঃ কুমুনিয়ৗ হড় কদ অনা কো বির-বুরু,দাড়ে নৗড়ি উজৗড় লৗগিৎ কো কেক্ড়েয়াকানা,সৗরি-নাসে শশনঃ(?) লৗগিৎতে, লাভ জং লৗগিৎতে। অনকান হড় কদ বাংকো বুজ্ দাড়েয়াঃ কানা যে , মিমিৎটাং দারে মাঃ মানে গে আপনারাঃ হটঃ মাঃ।
‘গ্রীন হাউস এফেক্ট’ খৗতির তেহঁ বি্র-বুরু, দারে নৗড়ি উজৗড়ঃ কানা। ‘গ্রীন হাউস এফেক্ট’ দ কানা মৗনমি দারায়তে তেয়ারাঃ লল-সিতোং রেনাঃ এঁটকেটঁড়ে। আয়মা আয়মা কাঠ,কয়লা আর পেট্রোলিয়াম রাপাঃ খৗতিরগে লল সিতোং পুরিবেশ রে বৗড়তিঃ কানা আর অনারেনাঃ অরসং পাড়াঃ কানা দাড়ে নৗড়ি ক চেতান। দাড়ে নৗড়ি উজৗড় সুমুং দ বাং , বির-বুরু দাড়ে নৗড়ি সাঁও গৗহিরতে জপড়াও মেনাঃ কো জীব-জিয়ৗলি, জিন্টি পিপ্ড়ি কোওয়াঃহঁ মহর মেটাঃ কানা,খৗতির পুরিবেশ রেয়াঃ হেরফের হোয়োঃকানা। আর অনা কদ দিনৗম দিন হিলোঃ বোন ঞেল জং, আইকৗউ জং কানা। এনতে অক্তরে লৗগ্তি মাহা বাং দাঃ জৗড়িঃ কানা,বাংখান দমেগে সেতোং, দমেগে বাংখান একাল গে রাবাং বাং , বানভাসি, আকাল,মহামারী আজার এমান এমান মা নিতো বোন ঞেল আইকৗঊ এৎগে।
আবো কো চেঁহ্গাওয়ঃ রেগে নোওয়াকো মুহিম খন দ রিহৗই বো ঞাম দাড়েয়াঃআ বির-বুরু দাড়ে নৗড়ি করেয়াঃ কাথা রাকাপ্ কাতেৎ কিরয়ৗ বোন হাতাওয়া – মিমিৎটাং দারে মিমিৎটাং জিউয়ি। অনাতে সানাম কগে কম সে কম সেরমারে মিৎটান কাতে দারে রহয় আর যতন-জগাও-বাঞ্চাওয়াবন। চেদাঃসে আবো বাঞ্চঃ লৗগিৎতে জমাঃ ঞুওয়াঃ অক্সিজেন,রান-মুরগৗন, চাষ আবাদ লৗগিৎ দাঃ , দাঃ লৗগিৎ রিমিল, রিমিল গাড়হাও লৗগিৎ সাঁগে দারে কদ একালতে লৗগ্তিঃ কানা। বির-বুরু দাড়ে নৗড়ি বাঞ্চাও তাঁহেন লেনখান সানাম কোওয়াঃ জিউয়ি বাঞ্চাও তাঁহেনা।
.webp)
