ধৗরতিপুরি কি লে-লাঁডুরঃ গেয়া ?

ধৗরতিপুরি কি লে-লাঁডুরঃ গেয়া ?

ডাঃ সুরেন্দ্র নাথ মান্ডি

 

যাওগে আঁজমঃআ আবো নোওয়া ধৗরতিপুরি দ কেরমে কেরমেতে দাঃতে উনুম –আঁগেন লৗগিদঃ কানা বৗই বৗইতে ধাসাঃ হররে মহডাওয়াকানা। স্কাইলারক রেনাঃ কাথাবোন আঁজমাকাদা, এমান এমান গ্রহানু করেনাঃ কাথাকহঁ বোন আঁজমাকাদা, যাঁহাকদ ধৗরতিপুরি (পৃথিবী) সোর সোরতে সাঁই সাঁই মাঁডরাও আচুরাকানা সে আচুরঃকান গেয়া ,অকা হিলো জে হাঁ অনাক, ধৗরতিপুরি সাঁও তাপাকিজঃআ, উনদ……..। নোওয়াক উইহৗর লেখান গে হড়ম মায়াম সানাম রেয়াড়-কিঁড়বিৎ উতৗরঃআ।

নে এ নিতো ধৗরতিপুরিরেন সানাম মানওয়া কো কোভিদ-১৯ আজার সাম্ভাড়াও তেবোন হিমসিমঃ কানা,লাখ লাখ মানওয়া বোন হিম সিমঃ কানা, লাখ লাখ মানাওয়াবোন দায়নাশঃ কানা, হাল্লাকঃ কানাবোন নে এ হালে হালেগে আবো নোওয়া পুছিম বাংলারে ‘ আম্ফুন' হয় বৗরডু তেবোন নাজেহাল চাবায়েনা; নতে আবো দিশম তেকো বল গৎ আকানা লাখ লাখ পুহু(পঙ্গপাল/সসরজ), যাঁহায় কদ আবোওয়াঃ আরজাও ফসল ক জম আধিয় তাবোনা,খৗতির সেদায় লেকা আকাল সেটেরঃ কানা হাঁ,ধৗরতি পুরিরে নাহাঃ হাঁ; ধৗরতিপুরিরে নাহাঃ হাঁডে-নাঁডে অৗডি বৗড়তিগে ভুংচাল(ভূমিকম্প) হোয়োঃকানা, বানভাসি হোয়োঃকানা খরা হোয়োঃকানা,সেঁগেল দাঃ বুঁভুকঃ কানা; বাডায় ঞাম কা্না ‘নিসর্গ’ এমান লেকান শায় শায় হয় বারডু দারায় কানা নোওয়া ২০২০সাল রেগে। আয়মা গান প্রাকৃতিক দুর্ঘটন ঘটাঃআ অৗডি লগনতেগে হাঁঃ। আর নোওয়া করেনাঃ অজেদ কাথাচ্‌ মৗনমিগে আকোওয়াঃ নোওয়া দুলৗড় ধৗরতিপুরি লল রুওয়ৗ তেক তাঁড়্গম অচওয়াকাদা। ধৗরতিপুরি থার থারাঃ কানা রুওয়ৗ আজার তে। আঁজমঃ কানা, আবো মানওয়া কো হাঁ অৗডি লগনগে লল যুগ রেবোন বলন কানা আর অনা তায়ম তায়ম গে বরফ রেয়াড় যুগ তেহঁ। তাহলে চেৎ আডা লগনগে ধৗরতিপুরি দ লে-লাঁডুরঃ গেয়া?

ধৗরতিপুরি  লল রেনাঃ অজে কদ চেৎ কানা ?

মিৎ টেন রিপোর্ট খন বাডায়ঃ কানা-১৮৮১খন ১৯২০ সাল হৗবিচ্‌ লল এলাং রেয়াঃ গড়্‌ বাড়হাও হার তাঁহে কানা ০.৪ ডিগ্রি সেলসিয়াস। ১৯২০ খন ১৯৭০ সাল হৗবিচ্‌ বাড়হাও  রেয়াঃ হার পৗহিলাঃ এনাং খন আরহঁ বৗড়তি ০.৪ ডিগ্রি সেলসিয়াস।১৯৭০ খন ২০০০ সাল হৗবিচ্‌ এনাং বাড়হাও রেয়াঃ হার দ ০.৫ খন ০.৭ ডিগ্রি সেলসিয়াস হৗবিচ্‌। নোওয়া রেয়াঃ অজেদ কানা বির বুরু উজৗড়। দারে ক পুরিবেশ খন দূষিত কার্বন-ডাই-অক্সাইড হাতাও কাতে অক্সিজেন ক সারভারা,অনা অক্সিজেন হাতাও কাতে আবোদ বাঁঞ্চাও বো তাঁহেনা। নতে কলকারখানা, মটরগৗডি এমান খন তেয়ারঃ দূষন, যাঁহারে কার্বন-ডাই-অক্সাইড সাঁও সাঁওতে আরহঁ বিষ আন  কার্বন মনোক্সাইডরে অৎ রেনাঃ এলাং তৗকিচ্‌ কাতে আরহঁ  ধৗরতিপুরি রেগে পাসনা, যাঁহা দক মেতাঃ কান গ্রিন হাউস এফেক্ট। অনা হতেচ্‌তেগে দিন কে দিন নুনৗঃ এলাং বৗড়তি কানা ধৗরতিপুরিরে।

এয়ার কন্ডিশন, রেফ্রিজারেটর এমান যন্ত্র করেয়াঃ বেওহার যাঁহা তিনৗ: বৗড়তি কানা উনৗগে পুরিবেশ ক্লোরোফ্লুরোকার্বন (সি এফ সি) রেয়াঃ পুরিমান বৗড়তিঃ কানা। সি এফ সি রেয়াঃ তারাসতে পুরিবেশ চেতান থাররে তাঁহেন  “ওজন লেয়ার”রে আয়মা হুডিঞ হুডিঞ ভুগাঃ তেয়ারঃ কানা। নংকা কাতে “ওজন লেয়ার” ছিতির বিতির হোয় কাতে বেড়া খন অৗডি বৗড়তি পরিমানতে “আল্ট্রা ভায়োলেট” রে ধৗরতিপুরিতে বলন কানা। খৗতির নাহাঃ দ ২ খন ৪ ডিগ্রি সেলসিয়াস এলাং সেরমা কে সেরমা বৗড়তিঃ কানা। নোওয়া ক সাঁও সাঁওতে মৗনমি নাহাঃ জাঁহা তিনৗ আধুনিক ইলেক্ট্রনিক গ্যাজেট ক   মেনমা –টিভি, মোবাইল, আইপড, কম্পিউটার, এমান এমান বোন বেওহারেদা উনৗঃগে বৗড়তিঃ কানা প্রকৃতি-পুরিবেশ দূষন (Electro Polution), এনতে নোওয়াক বেওহারতে মিৎ লেকানাঃ বিজলি-তারাস সিরজৗআ।

এমান এমান পুরিবেশ দূষন খৗতির ঘটা কানা সুনৗমি, আয়লা, এল-নিনো, আম্পুন এমান হয় বারডু। ধৗরতিপুরি বৗড়তি ললঃ কান খৗতির হিমালয় করেনা বরফ সে বরফ দিশম রেয়াঃ বরফ  ক গালাও কাতে যেলেকা জলক্কার তেয়ার দাড়েয়াআ, অনকাগে  রিতিচ্‌ রাবাং যুগ হঁ হেচ্‌ দাড়েয়াআ। খান অকালেকাতে আবো জিউয়িয়ৗন কো বাঞ্চাও বো তাঁহে দাড়েয়াআ ? নংকান আওহান খন দোগোঃ লৗগিৎ তেদো পারমানবিক শক্তি, সৌরশক্তি, জল শক্তি, বায়ু শক্তি এমান রেয়াঃ বেওহার বৗড়তিয় হোয়োঃ তাবোনা আর বির বুরু, দারে-নৗড়ি অৎ-হাসা বাঞ্চাও দহ হোয়ো তাবোনা।