টুওয়ৗর

                                      (হুডিঞ মাছা কৗহনি)   
  

                             টুওয়ৗর                                   

                               

 প্রফেসর নিতাই টুডু

এবাবু ? বাবু ? এ… বাবু ? বেরেদবিন চল। জামা,প্যান্ট,লুগড়িচ্‌-লাপ ঝত সাঁজাও বিন আর ঘেঁটবিন। হাপেসে য়ো,আর মিৎ ঘৗড়িজ জৗপিদ্‌ হচঃ,অৗলিঞ মেসে। গিদৗর জৗপিৎ জৗপিৎ তেগে কিন রড় রুওয়ৗড় কেদা। আরহঁ, নুকিন গিদরৗ একেবারে কাথাগে বাংকিন আঁজমেদা ? আম বাবা চেৎ লেকায় তাঁহেকানা, আবিনা সভাব কঁহ উনি লেকাগে হুয় আকান তাবিনা ? য়ো..গো,মাসে লাই মেসে,বাবাদ চেৎ লেকায় তাঁহে কানা ?

আম বাবা ? আম বাবাদ অৗডি ভাগে হড়গে তাঁহে কানায় বাবু। অকয় সালাঃ হঁ বাং এ খৗপারি কান তাঁহেৎ ? মেনখান,টাকা-পয়সায় ঞাম লেখানগে হাঁডি ভৗটিদয় হিরিয়াঃ  হিরিয়াঃ  কানগে তাঁহেকানা। মাসে ঞেল বিন যখন ইঞিঞ জৗপিদ কাঃআ উন অক্তে লুগড়িচ্‌ ঘেঁট পটম খনগে পয়সায় কুমড়ুয় এৎ তাঁহেৎ। মেনখান, উনৗ ইঞ এগেরে কান তাঁহে রেঁহ ইঞ চেতান রেদ বাংগেয় খৗপারি কান তাঁহেৎ। দাল তলহঁ বায় কেড়ে কান তাঁহে কানা। তবে মাঝে মাঝে গে মেন এৎ তাঁহে-এ  বাবু এগাঁৎ আঁজম এদাম, ইঞিঞ হাঁডি-পৗউরাঞ ঞু দাড়েয়াঃআ। ইঞ মাতাল লিঞ হোয় দাড়েয়াঃআ। মেনখান বাবু তিকিন দ ভাগে ইসকুলরে পাড়হাও কিনমে, আর অৗডিমারাং চাকরি কিন ঞামলেখান পাকা দালান রেলাং তাঁহেনা। তবেঞ লৗই দহ আম কানা বাবু এগাঁৎ," উনদ হাঁডি - পৗউরা ঞুদঞ বৗগি গেয়া "। আর বাংখান হড় চেৎক মেতাঞা ? ঞেলেপে ফানলা টূডু আচরেন গিদৗর খান্দ উপিসৗর আর আচ্‌ খানদ পৗউরা ভৗটিরে। মেনখান আম বাবাদ হাঁডি পৗউরা ঞু ঞুতে টিবি আজার ঞাম কাতেদ এয় বঙ্গা তালায়েনা। কাথাগে অনকা বায় আঁজম লেদা।

চল য়ো,  চল অকা তেবন চালাঃ কানদ? হোয় বাবু,দিশম দিশম  করোনা আজার হেচ্‌  আকানা,অনাতে দিশম অড়াঃ বন রুওয়াড় চালাঃ আ। চল তাহলে য়ো, উডুক লেন গেবন। তাড়াম তাড়ামতে অৗডি সাঁগিঞক তাড়াম আগু কেৎ রেহঁ টেশন দ বাং সেটেরঃ কানা । উনরে মারাং ইচ্‌ এ মেন কেদা - ঊহ্,আর তিমিন সাঁগিঞরে য়ো টেশনদ?  নঃঅয় বাবু,আর মিৎ ঘৗড়িচ্‌ খান গেবন সেটেরঃ আ। চল - চল লগন - লগন তাড়াম বিন্। হানে য়ো ঞেল ঞামঃ কানা টেশন। টেশন ক সেটের এনা। এ বাবু, হাপে নঁডে ইঞ কৗটিজ্ ইঞ জিরৗও লেনগে,অৗডিগে লাঁগাঞ বুঝৗও এদা।

মিৎ ঘৗড়িচ্‌ তায়ম গৗডি সিটি আঁজম এনা। দাদা, হানে রেলগৗডি হিজুঃ কানা গগদ হহ আয় মেসে? য়ো গো য়ো…এগ… গ বেরেদ মেসে,হানে রেলগৗডি হেজ্ এনা? বেরেদ মেসে, য়ো গো বাম রড় এৎ দ! চেদাঃ চেদাঃ বাম রড় এদা ? রড় মেসেয়ো… রড় মেসে।হানে ঞেল মে চেৎ লেকা গৗডি তিগুঁ ওয়াকানা। য়োগো রড় মেসে…….. য়োগো রড় মেসে………য়ো…গো………… ।