 |
| পদ্মশ্রী হামেটিয়া যমুনা টুডু নিৎ নওয়া লক ডাউনরে রেঁগেচ্ নাচার হড়ক সোররে। |
নংকাগে বাডায় ঞাম এনা পদ্মশ্রী হামেটান যমুনা টুডুহঁ রেঁগেচ নাচার হড় সোররে তিঁগু কাতেৎ রেঁগেচ নাচার হড়ক জমাঃএ চাল আকো কানা। ঝাড়খন্ড পনৎ রেনাঃ চাকুলিয়ারে মেনাঃ ভাৎকুন্ডা অঞ্চল চিয়াবাঁধী আতোরে রেঁগেচ নাচার হড়ক জমাঃ এম কাতেৎ গড়্য় চাল আকো কানা।
আরহঁ বাডায় আকানা নোওয়া কোবিদ-১৯ রে Social Distance মানাও কাতেগে সোর সোপোর আতো করে দাঁড়া দাঁড়াতে রেঁগেচ নাচার হড়ক গড়য় এমা কঃ কানা। নিৎ ধাবিচ্তে বাডায় আকানা মিস্টিকাটা, ভুলুকবিধা, চিনিয়াবাদি, আঁধারিয়া, ল বেড়া, মধুপুর, কাখড়িসোল এমান ১০-১২ গটাং আতোরেন রেঁগেচ নাচার হড় কঠেন গড়্য় সেটের দাড়েয়াকাদা। গড়ঃ এমদঃ তঁগে গে তাঁহেন তায়া যাঁহা তিন দিন লক ডাউন তাঁহেনা। যাঁহায় আতেৎ কামি কানায় উনকু মুদরে রাধিকা মাহাতো, সুমিত্রা মাহাতো, ধানী হাঁসদা, মঞ্জু মাহাতো এমান মেনাঃ আকাৎ কোওয়া।
তেহেঁঞ যমুনা উড়িষ্যা খন ঝারখন্ড দিশম রেনাঃ চাকুলিয়ারে জিতা মানসিং টুডু সাঁও সংসার তায়। উড়িষ্যারেনাঃ হাড়িয়ার বির-বুরু-দারে নাড়ি ঞেলতে চাকুলিয়ারেনাঃ উজাড় আকান বির-বুরুহঁ হাড়িয়ার সানা লেদেয়া। নিৎ চাকুলিয়ারেনাঃ বির-বুরু গটা হাড়িয়ার আকানা । যমুনা আয়াঃ সানা, আয়া কুক্মু পুরুন আকান তায়া। অনালেকাতে উনিদ চালাও এন সেরমা ২০১৯ সালরে ভারত সরকার পদ্মশ্রী শিরপা এম চাল কাতেৎ সারহাও আকাদেয়ায়।
বাডায় ঞাম আকানা বাপ্লা বার চাঁদ ভিত্রিতে জাঁওয়ায় আতোরেনাঃ অনা পুটুর বুরুরে নজর চালাও এন তায়া। গাতে কঠেন আয়াঃ মনের কাথায় সদর কেদা। মিৎ-বার বেগর আর অকয়হঁ বাকো রাজি লেনা। উলটা আচ্ঠেনগে আতো হড়াঃ নজর পাড়াও এনা। ভিনা মেৎ তেক ঞেল কেদেয়া। কাথাদ চেৎহঁ বাং তাঁহে কান তায়া। লাই লেদায় আবোওয়াঃ নোওয়া উজাড় বুরু বন হাড়িয়ার রুওয়াড়া। এক লায় এনায়। মেনখান লালাই বায় বাগিয়াদা। আরহঁ গাতে ঠেন লাই কেদায়। অনকা অনকাতে মিৎদিন গাতেয় সাঁগে কেৎ কওয়ায়। পে সেরমা বুরুক হরহঃ কেদা। বুরু, বুরু লেকা ঞেল এনা। আরহঁ আচ্ চেতান কিছু হড়াঃ হিস্কা – কাঁহিস বাড়তিয়েনা। দিনাম লেকা হড় সালাঃ লাড়হাই–নেওয়া তঁগেয়েন তায়া। আদম হড়াঃ মেনদ নুনদিন খন আলে বুরু রেনাঃ তেলে সাহান – সাকাম আকানা আর আম তেহেঞ আটক রেনদ অকয় কানাম ? নোওয়া বুরুদ চেৎ আম বাবাহাঃ কানা ? সারিগেত আচ্দ অকয়হঁ বাং কানায়। আচ্ বাবাহঁ বাং কান তায়া। আচ্হঁ অনাদয় বাডায়া। নংকাগে আরহঁ টারগেট এনায় চরা চালান কাঠ বেবসায়ী কঠেন। বাডায় আকানা নওয়া বুরু বাঞ্চাও খাতির ২০০৯ সালরে আয়া অড়াঃ কোম্বড়ো হোয় লেন তায়া। এনহঁ বায় দমাও লেনা।
গাতেক লাইতে বেনাও রাকাপ্ কেদায় তিরলা সমিতি। উন অক্তে ফরেস্ট রেঞ্জার সাহেব অমরেন্দ্র কুমার সিং গড়্য় এমাৎ কোওয়া। নোকোওয়া কামি ঞেলতে আডি কুশি লেনায় আর সারহাও লেৎ কোওয়ায় । মেনখান এনহঁ চেৎ যমুনা টুডুওয়াঃ আনাট চাবায়েন তায়া? বরং আরহঁ আনাট বাড়তিয়েন তায়া। টার্গেট এনায়। আয়মা হড়াঃ মেৎরেগে সিকিড় এনায়। মিৎদিন অনকাগে আঁজম কেদাক কোপড়া রেল স্টেশন খন আয়মা সারজম দারে পাচারঃ কানা। যমুনা টুডু ঞুত্ ঞুত্ আচ্রেন গাতেক লাইতে চালাওয়ে নায় রড় দারাম লাগিৎ। মেনখান অঁডে সেটের কাতেৎ আচ্কাগে অকাসেন খন চং নংকা চাপাৎ ধিরি হেচ্ এনা সানাম হড়ক ঘায়েল হচঃয়েনা। বাড়তি কায়তে যমুনা টুডু গটায় মায়াং তে হড়ম ডিং ডাবুর এন তায়া। তায়মতে আতো হড় সেন কাতেৎক বাঁঞ্চাও কেদেয়া। আর উনকু ঞুতাৎরে তাঁহেন হড় সালাঃ আতো হড়াঃ নংকা লাড়হাই হোয় এনা গটা রেল স্টেশন মায়াংগে আতুয়েনা। ভাগ্যিস অনা অক্তে রেল গাডি বাং পারম লেন, হড়ম শিহ্রাও আতেৎ মানিচ্ টুডু নওয়া কাথায় লাইকেদা।
নোওয়া ঘটন তায়ম খনগে উনিদ চাকুলিয়া রেন লেডি টারজান মেনতেয় উপরুম এনা। এখেন চাকুলিয়া সুমুংদ বাং ঝাড়খন্ড রেনহঁ লেডি টারজান। নিৎ গটা ভারত দিসম রেন হড় লেডি টারজান মেন্তেক বাডায়েয়া। চেৎ লেডি টারজান উপাধি ঞামদ মচা কাথা কানা? নিৎ ২২ বছর হোয়োঃ কান তায়া নোওয়া বির- বুরু সাঁও জপড়াও মেনায়া। বাডায় আকানা নিৎ ৪০০খনহঁ বাড়তি আয়াঃ তিরলা সমিতি(গ্রুপ) মেনাঃ আকাৎ তায়া। মিমিৎ টাং গ্রুপরে ২০-৩০ গটাং তিরলা মেনাঃ আকাৎ কোওয়া। সানামগে নিছরা মনেতেক কামিয়া। নিৎ ধাবিচ্ সরকারি অনুদান সে গড় অনকা দ বাক ঞাম আকাদা মেন্তেগে বাডায় আকানা।
‘পদ্মশ্রী’ বেগরহঁ মানিচ্ টুডুদ জীয়নরে আয়মা গটাং সারহাও শিরপায় হামেট আকাদা। বাডায় আকান ২০১৩ সালরে ‘National Bravery’ Award আর ২০১৪ রে ‘Godfrey Philips Bravery’ Award এমান এমান। ‘মন কী বাত’ রে দিশম রেন মারাং মন্ত্রী নরেন্দ্র মোদী মানিচ্ টুডু সারহাও কাতেৎ লাই আকাদায় উনিদ ৫০হেক্টর বির-বুরু বাঁঞ্চাও সুমুংদ বাং ১০,০০০ গটাং তিরলা সোতোঃ কাতেৎ বাঁঞ্চাও দহ আকাত্ কোওয়ায়।
মানিচ্ টুডুদ নিৎহঁ বির-বুরুরে দারে রহয়ায় আর দারে বাঁঞ্চাওয়ায়। আর উইহারায় ২২ বছর পারম চালাও আকান দিন রেনাঃ কাথাক। অকারে মিৎ বেড়া আরক লেকা ঠিকা কামি আর মিৎ বেড়াদ বির-বুরুয় ঞেলা। বির-বুরুদ আচ্ঠেন বয়হা লেকাগে আর বাংখান আচ্রেন গিদার মেৎতে ঞেল্ ঞামেয়া। আরহঁয় উইহারা চিকা কাতেৎ নংকা চিকা হোয় এনা আয়াঃহঁ অনা বাডায় বানুঃ তায়া মেন্তে মানিচ্ টুডুয় সদর আকাদা।
.webp)
.webp)
.webp)
