দুয়ার দুয়ার তেহেঞ গড় রেনাঃ তি-ক লাহা কেদা পুলিশহঁ

আবোওয়াঃ ওয়েব পেজ : ধারতি জাকাত নিৎ চালাঃ কানা করোনা ভাইরাস রেনাঃ হুলৌ চামকাও বত রান মিৎআজার। অনাতে দিশম দিশম  লক ডাউন পানথাকো হাতাও আকাদা। ভারত দিশম রেঁহ অনারেনাঃ অরসংদ পাড়াও গৎ আকানা। অনাতে ভারত সরকারদ সানাম পনৎ রেন মুখিয়া মন্ত্রীক  সাঁও দুড়ুপ পানতে কাতেৎ গে নংকান লক ডাউন  ব্যবস্থায় চালু কেদা। লকডাউন সাঁও সাঁওতেগে যোগাযোগ ব্যবস্থা হঁ বনদয় এনা। মিৎ হড় খন আর মিৎ হড় সাগিঞরে তাঁহেন সে Social Distance মানাও রেনাঃ আইনক জারি কেদা। আর নওয়া আইন যাঁহায় বাতাওআ সে রাপুদায় উনিয়াঃদ জেল-জরিমানা বানার গে হোয় দাড়েয়াঃতায়া মেন তে বাডায় আকানা। নওয়া আইন লাগু তায়ম খন গে হড়দ বাহরে অডকঃক বনদ কেদা। পুলিশ মেন রোড করে নজরক দহয়েদা। এমন চেৎ আতো অড়াঃ করে হঁক টহলেদা। হর করে যাঁহায় অনকাক ঞাম এৎ কওয়া উনকুদ যথাৎ তেলা বাংক এম দাড়েয়াঃ কান খান পুলিশাঃ এড়ে নাসে দাল তল, লুতুর সাব কাতেৎ উঠ বোস এমান চিতারহঁ মিৎ বার জায়গা রেদ ঞেল আকানা। নংকান অক্তে পুরুলিয়া জিলা জয়পুর থানা দামবেড়া আতোরে মিৎ হাহাড়াগঃ লেকান চিতার ঞেল এনা। পুলিশ রেঁগেচ্ নাচার হড় সোররে তিঁগু কাতেৎ চাউলে ডাল,আলু,সুনুম, সাবন এমান রেনাঃ প্যাকেটক চাল আক কানা। পুলিশাঃ নংকানা গড় সপহৎ ঞেলতে এলাকারেন হড়দ আডি আডি সারহাওক চাল আকাদ কোওয়া মেনতে বাডায় আকানা। আর নোওয়ারেন লাউড়িয়া দয়  হোয়ো কানা পুন্দাগ থানারেন A.S.I. মানতান সুরেন্দ্র নাথ সরেন। বাডায় এনা পুন্দাগ থানা পুলিশ ক্যাম্প পাহটা খন নংকানা সুসৌর কামিরেক আঁড়গোওয়াকানা। মানতান সরেন গমকেয়াঃ অড়াঃদ পুরুলিয়া জিলা আড়ষা থানা রেনাঃ জুড়ি আতোরে। নওয়াহঁ বাডায় আকানা মিৎ অক্তে উনিদ ঞুতুমান ফুটবল খেলোডিয়ায় তাঁহেকানা। আর খেলোড অক্তেগে West Bengal Police চাকরিয় ঞাম আকাদা। আরহঁ বাডায় আকানা মানতান সরেন গমকেদ কাটিচ্ বিদাল খনগে হড় এমঃ হেওয়াদ মেনাঃ আকাৎ তায়া। চাকরি ঞাম তায়ম খনগে আয়মা রেঁগেচ্ নাচার গিদারকো অলঃপাড়হাওরে গড়য় এম আগুওয়াকো কানায়। নিৎহঁ নংকাগে যাঁহারেগে তাঁহেন রেঁগেচ্ নাচার হড় রুওয়াঃ হাসোরে গড়য় এমা কোওয়া। বাডায় এনা অনাতেগে নংকান মুহিম অক্তরে রেঁগেচ্ নাচার হড় সামাংরে তিঁগু কাতেৎ আয়াঃ উদার মনে জিউয়ীয় রাড়েচ এৎ তায়া।