 |
| বান্দোয়ান চিল্হারে কবি গুরুওয়াঃ জানাম মাহা মানাও অক্তরেনাঃ চিতার । |
আবোওয়াঃ ওয়েব পেজ : অঁনড়হিয়া সাধু রামচাঁদ মুরমুওয়াঃ ১২৩ সেরমা পুরাও জানাম মাহা, নিৎ নোওয়া লক ডাউন তালারেহঁ আয়মা জায়গারে অকাকরেদ অড়াঃ অড়াঃ করেগে আডি মানত্ সালাঃক মানাও কেদা মেনতে বাডায় আকানা। অঁনড়হিয়া সাধু রামচাঁদ মুরমুওয়াঃ জানাম আতো কামারবাঁদি রেহঁ সাধু রামচাঁদ মুরমু উইহার বাথান কুমুট পাহ্টা খন কবিয়াঃ মুঠানরে বাহা মালা এম চাল কাতে উনিয়াঃ জানাম মাহাক মানাও কেদা।
অনকাগে বাডায়েনা বান্দোয়ান রেনাঃ চিলহা সাসাং বেডারে অঁনড়হিয়া সাধু রামচাঁদ মুরমুওয়াঃ মুঠানরে বাহা চাল কাতেৎ সাগুন জানাম মাহাক মানাও কেদা। অনা মানত আখড়ারে মানতান কলেন্দ্র নাথ মান্ডি (সিলি পাথাম সাসাপাড়াওয়িচ্), মহাদেব হাঁসদা (তেৎরে পাথাম সাসাপাড়াওয়িচ্),সূর্যকান্ত মুরমু, সতন সরেন, যোগেন্দ্র নাথ টুডু,মায়া রাণী মান্ডি এমান সেটেরক তাঁহেকানা। সাহিজুহিরেদয় তাঁহেকানায় বারহা মুলুক মাঝি পারগানা মহল।
অঁনড়হিয়া সাধু রামচাঁদ মুরমু লাইতে বাডায় আকানা উনিদ তিরিশ দশক রেন কবি তাঁহেলেনায়। নিৎ সান্তাড়ি সাঁওহেদরে কবি গুরু সে মহাকবি লেকাতে সানাম কঠেন উপরুম মেনাঃ তায়া। ভারত দিশম ফুরগাল মাড়াং অনা বিদাল রেন ছট লাট কৈলাশ নাথ কাটজু আয়াঃ আতোরে হেচ্ কাতেৎ অঁনড়হিয়া লেকাতে শিরপা সে সারহাও এ চাল অট আদে তাঁহেকানায়। নুন মাড়াং অঁনড়হিয়া যাঁহায়া সেরেঞ ‘দেবোন তিগুঁন আদিবাসী বীর’ তে বাংলা ,বিহার, উড়িষ্যারে আডি মারাং আঁদোড় সিরজাও লেনা।
উনিয়াঃ অল কদ কাঁমারবাঁদি সাধু রামচাঁদ মুরমু উইহার বাথান বেরেৎ তায়ম খনগে মিৎ মিৎতে পুঁথি ছাপাও সদর এতহব লেনা। ইনা তায়ম উন অক্তরেন পছিম বাংলা সরকার শায় সেরমা জানাম মাহারে ‘সাধু রামচাঁদ মুরমু অনল মালা’ ঞুতুমতে মিৎ পুঁথি ছাপাও সদর কেদায়। অনকাগে অনাতায়ম সারি ধরম সেরেঞ পুঁথি, অল দহ অনড়হেঁ ,লিটা গোডেৎ, সংসার ফেঁদ, ঈশরড় এমান পুঁথিক ছাপাও সদর আকান তায়া।
মেনখান উন মারাং অঁনড়হিয়া হোয় কাতেৎহঁ তেহেঞ উনিয়া জানাম মাহারে জানাম মাহা মানাও রেনাঃ চিতারদ অকারেহঁ অনকা মাছাদ বাং ঞেল লেনা। তবে দিশমরে নিৎ লক ডাউন চালাঃ কান খাতিরগে অকয়হঁ অকয় সালাঃ ঞেপেল ঞাপাম বাং হোয় আকান খাতিরতে কবিয়াঃ জানাম মাহা মানাওরে নেশদ এটকেঁ টঁড়ে হোয় আকানা মেনতেগে আয়মা হড় মতামতক সদর আকাদা।
তবে নে মাড়াং সেরমা করেহঁ ঞেল আকানা অঁনড়হিয়া সাধু রামচাঁদ মুরমুওয়াঃ জানাম মাহা মানাও ইদিকাতেৎদ আয়মা অলনিয়া ,অঁনড়হিয়া, সাঁওদিয়াক মুদরেহঁ অনকা রৌস্কাদ বাং সদর আকানা। ক্লাব সে গাঁওতা কোওয়া হঁ অনকাগে। তবে চেৎ অঁনড়হিয়া সাধু রামচাঁদ মুরমুদ অকা দল সে অকা সংগঠণ রেনহঁ বায় তাহেঁলেন তেগে উনি চেতান নংকান অনহেড়াদ ? মিৎ টাং কুক্লিদ তাঁহেন কান গেয়া।
তবে নংকাগে যদি কবি সাধু রামচাঁদ মুর্মুওয়াঃ জানাম মাহা অনহেড়া তালাতে মানাও ইদি হুয়ুঃআ, এনখান মিৎ দিন হিলঃ সান্তাড় সমাজদ সানতাড়ি সাঁওহেদ খন উন মারাং কবিয় আদেয়া। নোওয়া লাইতে আর চেৎ সন্দেহগে বানু আ মেনতে আয়মা হড় গে আকোওয়াঃ মতামত ক সদর আকাদা।
.webp)
.webp)
