অকয় লাগিৎ নোওয়া বাঞ্চাও তাঁহেন

আবোওয়াঃ ওয়েব পেজ : নোওয়া কোবিদ -১৯ রে গটা ধারতি জাকাত গে লাই গান আ লক ডাউন রে। আর নোওয়া লক ডাউন খাতির সানামক লেকাগে অড়াঃ রে বন্দি। সরকার পাহ্টাখন বার বার লাইয়গঃ কানা, অড়ারে তাঁহেন পে বাহরে আলোপে অডোকঃ আ। চেদাসে করোনা ভাইরাস খন বাঞ্চা লাগিৎ নোওয়া লক ডাউন গে মিৎ মাত্র বাঞ্চা রেনাঃ হর। মেনখান নোওয়া লক ডাউন খাতির যাঁহায় রেগেচ্  নাচার হড় বাহরে কামি বাংক অডোক দাড়েয়াঃ কানা। যাঁহায়াদ মিৎ মাত্র দিনাম কামি গে বাঞ্চা রেনাঃ হর। উনকোওয়াঃ নিত্ চেৎ লেকা কাতেৎ  মিমিৎটাং দিনক  পারমঃ কানা। জম কাতেৎ মেনাঃ কোওয়া সে বিন জমতে মেনাঃ আকাৎ কোওয়া অকয় তিনাঃ তলাসক দহয়েদা ? নতে আডি হড় নামাল ঝামাল কামি সেন কাতেৎ অন্তেরেগে নওয়া লক ডাউন খাতির আটক কাতেৎ মেনাঃ কোওয়া। উন কোওয়া গে বাং অকয়ে তলাস এ হাতাও আ ? বাডায় আকানা উনকো হড়াঃ নিৎ  কামি বন্দ, জমাহঁ বন্দ। কোম্পানি সে মালিক পাহ্টাখন নাসেনাঃ কুড়াই নাসেনাঃ টাকা-পয়সা এম কাতেৎ আকোওয়াঃ সিলপিঞক সিঞ কাদা। মেনখান অঁডে তাঁহে কাতেৎ আর চেৎক জমা ? চেৎ লেকা কাতেৎ অড়াঃক রুওয়াড় হিজুঃ আ ? নংকা কাতেৎ তাঁহেন মুশকিল গেয়া বাডায় কাতেৎ আয়মা হড়গে তাড়াম কাতেৎ অড়াঃ হিজুঃ ক মহডা য়েনা। অকয়দ ৩০০ কিমি, অকয়দ ৬০০ কিমি, অকয়দ আরহঁ ১০০০ কিমি হর তাড়াম তাড়ামতে লাঁগা কাতেৎ হর করে গেক তাঁহেয়েনা জাতার কাতার। আয়মা কম হড়গে অড়াঃ ক সেটের দাড়েয়াকাদা মেন্তে বাডায় আকানা। উনকু কোওয়া খবর হাতাও হড়দ উকুরক আনাং ? নতে সরকার পাহটা খন রড় আঁজমঃ কানা দিশমরে অক্য় হড়হঁ যেমন রেঁগেচ্ তে আলক গুজুঃ মা। অনাতে রেশন বেবস্থাহঁ চালুও য়াকানা। মেনখান রেশনহঁ ঠিক ঠাক ঞাম এদাক সে বাং অনাহঁ অক্য় তলাশ এ হাতাও আ। আতো অড়াঃরেহঁ ঞেলঃগঃ কানা আয়মা রেঁগেচ্‌ নাচার হড়গে জমাঃ ঞুওয়াতেক আনাট্ রেক পাড়াঃকানা। খবর কাগজ পাথাম করেহঁ মিৎ বার ধাও অনকান চিতার ঝালকাও রাকাপ কানা। অকারেদ বার-পে মাহা বিন জমতে হড় মেনাঃআকাদ কোওয়া। যাঁহা যাঁহা আতোরে যাঁহা যাঁহা জায়গারে নংকান মুহিম চিতার ঞেলঃ কানা অনকান জায়গারে সানাম কওয়াগে উনকু লাগিৎ গড় এম তালাতে সহর সেটেরঃ লাগতি কানা। চেদাসে উনকু বানচাও তাঁহেন মানেগে আমহঁ বানচাও তাঁহেনাম। যাঁহায়দ ইঞাঃ আমাঃ আবোওয়া দুক্‌ বেড়ারে উনদিনক তাঁহেয়াকানা। যাঁহায়দ আবোওয়া সাঁওতাক বানচাও দহ আকাদা, যাঁহায়দ আবোওয়া লায়লাকচার, ধরম-করম ক বাঞ্চাও দহওয়াকাদা। বাজার-সাহার, নামাল-কাছাড় কামি কাতেৎ নোওয়া দিসমক লাহা ইদিয়েদা। যাঁহায়দ বাহা, সহরায়রে, লাকচার আখড়ারে এনেচ্‌-সেরেঞ তালাতে রৌস্কাক চাল আবোনা। উনকুগে তেহেঞ বাড়তি কায়তে মুহিমরেক পাড়াও আকানা। অনাতে তেহেঞ আতো অড়াঃরে ত্রিয়-বানাম, তুমদা-টামাক সাডে বাং আঁজমঃ কানা। রেঁগেচ্‌ খনদ আর চেৎ মারাং-আ ? নিৎ উনকু ঞেল লাগিৎ সাঁওতারেন হড় আডিগেক অভাব গেয়া মেন্তে ঞেলঃগঃ কানা।

তবে নংকান মুহিম অক্তরে মিৎ-বার ক্লাব, গাঁওতা সে মহল কদ সুসার কামিরেক আঁড়্গ গৎ আকানা। আর দুয়ার দুয়ার দাঁড়া কাতে রেঁগেচ্‌ নাচার হড় জমাঃক চাল আকো কানা। মেনখান নিৎ কাথা রাকাপ্‌ কানা পছিম্‌বাংলারে উনা উনা ক্লাব, গাঁওতা মহল সে মাঁডোওয়া এমান সংগঠন মেনাঃ রেঁহ নংকান মুহিম অক্তরে রেঁগেচ্‌ নাচার হড় লাগিৎ অনকান গড় এমঃ কামিরেদ বাংক ঞেলঃগঃ কানা। নিৎ আয়মা হড়াঃ মচারেগে আঁজমঃ কানা তবে চেৎ সংগঠন কদ এখেন এনেচ্‌-সেরেঞ আর মিটিং মিছিল লাগিৎগে বেনাও আকানা ? ঞেল আকানা রেঁগেচ্‌ নাচার হড় বাংখান অকা গাঁওতা সে সংগঠনাঃগে কামি বাং চালাঃআ আর বাং লাহাঃ-আ। অক্ত তাঁহেনতে বাং হুদিস লেখান উনকু রেঁগেচ্‌ নাচার হড় বন ঞাম রুয়াড় কোওয়াতো? কুক্‌লিদ তাঁহেন কান গেয়া। চেদাসে করোনা ভাইরাস বিরুধ্‌রে লাড়হাই কাতে সানামগে মিৎ সাঁওতে বাঞ্চাও হোয় আবনা। বাংখান আপান আপিন বন কুলি জংমা অকয় লাগিৎ নোওয়া জিয়ন বাঞ্চাও তাঁহেনা ??