গব্ব গড়ং সড়ং সড়ং

 (হুডিঞ কাহনি)

গব্ব গড়ং সড়ং সড়ং

গুলন চন্দ্র মুরমু

(আযোদিয়ৗ বুরু; বিষ্টু কুমাং ঠেন ইঞ তুমাল ঞাম আকাদ)

 

পাহিল ঞঃরে মিদ কিঁষৗড় এ তাঁহে কানা । কিষৗড় দ ধন দরিব টাকা পয়সা হরঃ বাঁদে সানাম লেকাতে উরুন পুরুন লেনায় । তবে উনি কিঁষৗড় রেন দ মিদ টাং গে সাধের বেটায় তাঁহে কানা । কিঁষৗড় দ হাড়াম ইদিয়েন খান গিদরৗ হঁয় হারা জুওয়ৗন এন তায়া । গিদরৗ হাঃ মা দমে গরব তায় , চেৎ গে বায় কৗমি বাড়ায়া , অলঃ পাড়হাঃ হঁয় বাগি কেদা ! এঁগাৎ আপাৎ আঃ কাথা দ বায় আজম বাড়ায়া ।

আদ কিষৗড় দ আডি ভাবিৎ রে পাড়াও এনতে যাঁহাতিস পাসেৎ বাগি হট আয় ,অনা দিশৗতে গিদরৗ তায় এ লৗই হটয়ায় কানা বুদ্ধি ক ,যাতে জোগাও হট আকাদ ধন খন হঁ আরহঁ গিদরৗ তায়দয় ধন  বাড়তি মা .....আদয় লৗই আয় কানা ..."এ বেটা যাঁহা তিস হাপেন ইঞ বাঞ তাঁহেন খান জম ঞুয়াম ..গব্ব গড়ং সড়ং সড়ং....আর বাড়গেরে হাট এম লাগাও আ,আর গড়ারেম গাডায়া,অনা গাডারে টুকুচ এম তপায়া! তবে তুপুনেম চালাঃ খানদ বাঁধ ঘাটরে বাং কাতেৎ বিনা ঘাট রেম তুপুনা ! জিল কম আগুয় খান , সানাম ক কুটি কুটি পে  জম আ ,আর হাকু কম কিরিঞ ক খান লাপেৎ পিছু বারেয়া পেয়া কাতেৎ হাকু বহঃ ঞামঃ মা আর দিনৗমগে নাওয়া নাওয়া থারি রেপে  জম আ .. হই ! ...এন্তে রেহঁ যদি বাম বুজ দাড়েঃ খান পেয়া বহঃ হড় ঠেনেম চালাঃ আ ! লৗই লৗইতে হাড়াম দয় গচ এনা !  অনা তায়ম সানাম আঁগিভার গিদরৗ হাঃ তারেন রে ঞুর এনখান কিষৗড় এ লৗই হট আকাদ কাথা রেনাঃ কাথা লেকাতে কৗমি এতহব এনা.....

গব্ব গড়ং সড়ং সড়ং জম ঞু কাথা বুজ বুজতে থাকাও এনখান তওয়া দাহে মেশা দাকা দিন গে জম ঞু ক এতহব কেদা, নতে সুর সুপুর আতু করে ঢোল এ পিটাও হচকেদা বাড়গে রে হাট লাগাও লাগিদ , আর নানা হুনৗর এনেজ সেরেঞ হুই চ লাগিদ টাকা পয়সা খরচ কাতেৎ এ ভাড়া আগু কোওয়া ! গড়ারে টুকুচ তপা লাগিদ দমে টুকুচ এ কিরিঞা, বাঁধ ঘাট তুপুন এ চালাঃ খান ঘাট রেগে তুপু কাতেৎ এ হিজুঃ আ , আর ঘাট রে যাঁহা বাং যাঁহায় হিড়িং হট কাঃ আ, আর অড়াঃ হেজ  কাতেৎ এ দিশৗয়া ,পাঁজায় চালাঃ আ আর বায় ঞাম রুওয়াড়া !

ইনা তায়ম জিল ক দ দমে দমে কিরিঞায় ....অনে যে যত হড় কুটি কুটি ক হাটিঞ রে পাড়াঃ মা, অনকাগে হাকু হঁ দমে দমে কিরিং ক য়াই , চেদাঃ সে বহঃ বারেয়া পেয়া কাতেৎ হুয়ুঃ মা....ইনকা ইনকাতে নয় ছয় কাতেৎ ধন সম্পত্তি চাবা উতৗরর এন তায়া...! আদ পেয়া বহঃ হড় আডি দিন পাঁজা পাঁজাতে থাকাও চাবা আকানায়..! 

আদ মিদ দিন চেদ মনে তেচং সুর অড়াঃ ঠেন এ চালাওয়না কাকা সৗগৗই হড় ঠেন...আদয় কুলি এ কানা.....হেঁ কাকা পেয়া বহঃ হড় দ অকারিঞ ঞাম কোওয়া.....? আদয় লাই আদেয়া......এ বাবু তিকিন তিকিন বাঁধ আড়ে চালাঃ মে হাঁ...বাঁধ আড়েরেকো দুড়ুপ জেডের কঃ আ উনকু হাড়াম হড় ক....উনকু গেকো মেতা কোওয়া পেয়া বহঃ হড় দ । বারেয়া গন্ঠে আর বহঃ ক মিৎঠেন কাঃ আ,অনাতে পেয়া বহঃ লেকা ক ঞেলঃ আ...! দসার হিলোঃ আদয় চালাওয়েনতে কুলিয় বাড়ায়েৎ কোয়ায় ..আদ ক মেতায় কানা...চিকৗয়েনাম বাবু ....আদয় লাই আকো কানা ...ইঞ বাবা যাঁহা ক কাথায় লৗই হট আকাদিঞৗ সানাম গেঞ কৗমি পুরৗও কেদা..এন রেহঁ..সানামাঃ চাবায়েন তিঞা...নিৎ দ চেদ ইঞ চিকৗয়া..? আদ ক কুলিয়ে কানা...চেদ কয় মেতাৎ মে তাঁহেদ.......আদ গব্ব গড়ং খন সানামাঃ এ লৗই মুচাদ কেদা ! আদ ক মেতায় কানা অনে ত বাবু আডি  মঁজ কাথায় লাই হট আকাদ মে তাঁহেদ.....আমগে উল্টা উল্টাম কৗমি আকাদা....!

অনা ক কাথা রেনাঃ মানে কদ হুয়ুঃ কানা.....দিনৗমগে দাঃ মাড়ি আড়াঃ তিকি ক গে সড়ং সড়ং পে জম ঞুয়া দমে আলপে হাবুয় ডাবুয় আ, বাড়গে রেদ দমে সব্জী ক চাষ মে , হাট লেকা বাড়গে খন গেকো কিরিঞ কিরিঞ তেকো ইদি তামা..! আর টাকা পয়সা দ টুকুচ রে সাঁভাও কাতেৎ  গড়ারেম তপা কেয়া,যাতে কুম্ব্ড়ু ক বাংক পাঁজা ঞাম কেয়া! আর জিল কদ কমগেম কিরিঞা অনাগে রুতি রুতিম কুটি কাতেৎ পে হাটিঞ কেয়া...আর হাকু কদ চুনৗ হাকু কম কিরিঞ কোওয়া, উনকু দ মিদ লাপেদরে আডিগৗন হাকুওয়াঃ বহঃ ঞামঃ আ আর পাতড়া করেগেপে জম কেয়া  , থারি কিরিঞ খরচ দ বাং হুই কঃ আ..! চেদ গে বাং চাবা ক আ, আরহঁ ধন সাঁগে কঃ তামা...অনা তেকো মেন আ, ভালি কাতেৎ শিখনৗৎতঃমে তবে ত আসল কাথা কদম বুজ আ! জতম...সড়ং সড়ং চাবা কাদা বেচারা.....হায়...হায়....!