ᱵᱮᱝᱜᱚᱞ ᱠᱚᱲᱟ

 

ᱵᱮᱝᱜᱚᱞ ᱠᱚᱲᱟ

ᱥᱨᱤᱠᱟᱱᱛᱚ ᱥᱚᱨᱮᱱ

(᱑)
ᱯᱳᱭᱞᱳ ᱠᱟᱛᱷᱟ

 

ᱢᱟ.ᱱᱢᱤ ᱡᱮ ᱦᱤᱞᱳᱜ ᱠᱷᱚᱱ ᱚᱞᱚᱜ ᱪᱮᱫ ᱠᱚ ᱮᱛᱚᱦᱚᱵ ᱞᱮᱫᱟ, ᱩᱱ ᱦᱤᱞᱳᱜ ᱠᱷᱚᱱ ᱡᱤᱭᱚᱱ ᱠᱟ.ᱦᱱᱤ ᱚᱞ ᱠᱚ ᱮᱛᱚᱦᱚᱵ ᱞᱮᱠᱷᱟᱱ - ᱢᱟ.ᱱᱢᱤ ᱡᱤᱭᱚᱱ ᱨᱮᱱᱟᱜ ᱱᱟᱜᱟᱢ ᱟᱭᱢᱟ ᱵᱟᱲᱟᱭ ᱧᱟᱢ ᱠᱸᱚᱜ-ᱟ᱾ ᱢᱮᱱᱠᱦᱟᱱ ᱱᱮᱛᱟᱨ ᱠᱚ ᱢᱟ.ᱱᱢᱤ ᱡᱟ.ᱱᱤᱪ ᱚᱱᱟᱨᱮ ᱩᱱᱟ.ᱜ ᱥᱚᱲᱚᱢ ᱨᱟᱥᱟ ᱵᱟᱝᱠᱚ ᱧᱟᱢ ᱠᱮᱭᱟ ᱾ ᱯᱟᱨᱚᱢ ᱟᱠᱟᱱ ᱚᱠᱛᱚ ᱨᱮᱭᱟᱜ ᱠᱟᱛᱷᱟ, ᱠᱷᱚᱸᱱᱫᱨᱚᱸᱱᱫ ᱛᱟᱞᱟᱛᱮ ᱧᱟᱢ ᱞᱮᱠᱷᱟᱱ ; ᱚᱱᱟ ᱨᱮᱱᱟᱜ ᱨᱟᱥᱟ ᱫᱚ ᱛᱮᱨᱚᱢ ᱨᱟᱥᱟ ᱠᱷᱚᱱ ᱦᱚ ᱦᱮᱲᱮᱢᱟ । ᱚᱱᱟᱛᱮ ᱟᱫ ᱟᱠᱟᱱ ᱡᱤᱱᱤᱥ ᱯᱟᱱᱡᱟ ᱞᱟ.ᱜᱤᱫ  ᱟᱵᱳᱟᱜ ᱢᱚᱱᱮ ᱜᱷᱟᱱᱮ-ᱜᱷᱟᱱᱮ ᱚᱨᱚᱜ -ᱟ᱾

ᱱᱮᱛᱟᱨ ᱠᱚ ᱜᱤᱫᱨᱟ. ᱛᱤᱥ ᱯᱳᱭᱞᱳ ᱵᱤᱫᱫᱟᱜᱟᱲ ᱠᱚ ᱞᱟᱞᱟᱳ ᱞᱮᱱᱟ, ᱫᱤᱥᱟ.ᱤ ᱪᱚᱠᱚ ᱵᱟᱝ ᱪᱚ ᱾ ᱤᱧ ᱡᱮ ᱦᱤᱞᱳᱜ ᱯᱳᱭᱞᱳ ᱵᱤᱫᱫᱟᱜᱟᱲ ᱤᱧ ᱪᱟᱞᱟᱣ ᱞᱮᱱᱟ - ᱱᱮᱛᱟᱨ ᱦᱚ ᱚᱱᱟ ᱫᱤᱱ  ᱫᱤᱥᱟ. ᱢᱮᱱᱟᱜ ᱛᱤᱧᱟ.᱾ ᱚᱠᱚᱭ ᱥᱟᱳ ᱤᱧ ᱞᱟᱞᱟᱳ ᱞᱮᱱᱟ ᱵᱟ.ᱧ ᱫᱤᱥᱟ.ᱭᱮᱫ ᱨᱮᱦᱚ - ᱯᱳᱭᱞᱳ ᱦᱤᱞᱳᱜ ᱫᱚ ᱜᱟᱢᱪᱷᱟ ᱵᱷᱟᱜᱳᱟ ᱠᱟᱛᱮᱧ ᱞᱟᱞᱟᱳ ᱞᱮᱱᱟ ᱾ ᱦᱚᱲᱢᱚ ᱨᱮᱫᱚ ᱟᱝᱜᱨᱚᱵ ᱫᱚ ᱵᱟᱝ ᱛᱟᱸ ᱦᱮ ᱠᱟᱱᱟ ᱾ ᱢᱤᱫ ᱛᱤᱨᱮ ᱛᱟᱸ ᱦᱮ ᱠᱟᱱᱟ ᱯᱚᱛᱚᱵ, ᱥᱞᱮᱴ ᱟᱨ ᱢᱤᱫ ᱛᱤᱨᱮ ᱛᱟᱸᱦᱮ ᱠᱟᱱᱟ ᱫᱩᱲᱩᱵ ᱞᱟ.ᱜᱤᱫ ᱜᱚᱲᱮ ᱵᱚᱥᱛᱟ᱾

 

ᱟᱞᱮ ᱟᱛᱳ ᱧᱩᱛᱩᱢ ᱫᱚ ᱵᱚᱱᱠᱟᱴᱟ ᱾ ᱥᱚᱨᱠᱟᱨᱟᱜ ᱠᱷᱟᱛᱟ ᱨᱮ ᱱᱚᱭᱟ ᱜᱮ ᱚᱞ ᱢᱮᱱᱟᱜ ᱻᱟ᱾ ᱢᱮᱱᱠᱦᱟᱱ ᱱᱚᱣᱟ ᱥᱳᱨ -ᱥᱳᱯᱳᱨ ᱟᱛᱳ ᱦᱚᱲᱫᱚ 'ᱵᱟᱜᱵᱟᱡᱟᱨ 'ᱠᱚ ᱞᱟ.ᱤ-ᱟ᱾ ᱟᱛᱳ ᱨᱮᱫᱚ ᱮᱠᱮᱱ ᱥᱚᱨᱮᱱ ᱠᱚ ᱜᱮ ᱢᱮᱱᱟᱜ ᱠᱚᱭᱟ ᱾ ᱢᱮᱱᱠᱦᱟᱱ ᱡᱚᱛᱚ ᱥᱚᱨᱮᱱ ᱫᱚ ᱟᱞᱮᱨᱮᱱ ᱫᱚ ᱠᱚ ᱵᱟᱝ ᱠᱟᱱᱟ ᱾ ᱤᱧ ᱜᱚᱲᱚᱢᱵᱟ ᱛᱟᱠᱚ ᱫᱚ ᱯᱳᱱ ᱵᱚᱭᱦᱟ ᱠᱚ ᱛᱟᱸᱦᱮ ᱠᱟᱱᱟ ᱾ ᱱᱮᱛᱟᱨ ᱫᱚ ᱩᱱᱠᱩ ᱜᱮ ᱵᱟ.ᱰ ᱠᱟᱛᱮ ᱮᱭᱟᱭ - ᱤᱨᱟ.ᱞ ᱚᱲᱟᱜ ᱠᱚ ᱦᱳᱭ ᱟᱠᱟᱱᱟ ᱾ ᱵᱟᱦᱟ - ᱥᱚᱦᱨᱟᱭ ᱱᱮᱛᱟᱨ ᱦᱚ ᱢᱤᱫᱴᱷᱮᱱ ᱜᱮ ᱾ ᱟᱛᱳᱨᱮᱱ ᱮᱴᱟᱜ ᱥᱚᱨᱮᱱ ᱠᱚᱭᱟᱜ ᱫᱚ ᱵᱷᱮᱜᱟᱨ ᱡᱟᱦᱮᱨᱛᱷᱟᱱ ᱢᱮᱱᱟᱜ ᱻᱟ ᱾

 

ᱟᱞᱮᱭᱟᱜ ᱚᱲᱟᱜ ᱫᱚ ᱠᱷᱟᱛᱲᱟ -ᱥᱤᱢᱞᱟ.ᱯᱟᱞ ᱨᱳᱰ ᱡᱟᱯᱟᱜ -ᱨᱮ᱾ ᱰᱟᱨᱟᱨ ᱛᱮ ᱪᱮᱫ ᱜᱟ.ᱰᱤ ᱯᱟᱨᱚᱢᱚᱜ ᱠᱟᱱᱟ, ᱚᱲᱟᱜ ᱠᱷᱚᱱ ᱜᱮ ᱧᱮᱞ - ᱧᱟᱸᱢᱚᱜ ᱻᱟ᱾ ᱟᱞᱮᱭᱟᱜ ᱵᱟᱥ ᱥᱴᱮᱱᱰ ᱨᱮᱱᱟᱜ ᱧᱩᱛᱩᱢ ᱵᱚᱱᱠᱟᱴᱟ ᱾ ᱱᱚᱰᱮ ᱫᱚ ᱮᱠᱥᱯᱨᱮᱥ, ᱞᱳᱠᱟᱞ ᱡᱚᱛᱚ ᱞᱮᱠᱟᱱ ᱜᱟ.ᱰᱤ ᱜᱮ ᱛᱮᱸᱜᱳᱱᱟ ᱾ ᱟᱨ ᱯᱩᱪᱷᱤᱢ ᱥᱮᱫ ᱨᱮᱦᱚ ᱟᱨ ᱢᱤᱫᱴᱟᱝ ᱵᱟᱥ ᱥᱴᱮᱱᱰ ᱢᱮᱱᱟᱜ ᱻᱟ, ᱚᱱᱟ ᱫᱚ ᱢᱚᱭᱱᱟ ᱢᱳᱬ ᱠᱚ ᱢᱮᱛᱟᱜ ᱟ ᱾ ᱱᱚᱰᱮ ᱫᱚ ᱞᱳᱠᱟᱞ ᱜᱟ.ᱰᱤ ᱠᱚ ᱛᱮᱸ ᱜᱳᱱᱟ ᱾

 

ᱱᱚᱭᱟ ᱵᱚᱱᱠᱟᱴᱟ ᱢᱳᱬ ᱨᱮ ᱢᱤᱫ ᱚᱠᱛᱮ ᱪᱮᱞᱮᱦᱚ ᱵᱟᱝ ᱠᱚ ᱛᱟᱸᱦᱮ  ᱠᱟᱱᱟ ᱾ᱛᱟᱸᱦᱮ ᱠᱟᱱᱟᱭ ᱢᱤᱫ ᱦᱟᱲᱟᱢ ᱾ ᱱᱩᱭ -ᱟᱜ ᱧᱩᱛᱩᱢ ᱠᱤᱥᱴᱚ ᱫᱟᱥ ᱾ ᱱᱩᱭ ᱜᱮ ᱱᱚᱰᱮ ᱯᱳᱭᱞᱳ ᱪᱟ ᱫᱩᱠᱟᱱᱮ ᱠᱷᱩᱞᱟ.ᱣ ᱞᱮᱫᱟ ᱾ᱱᱩᱭ-ᱟᱜ ᱧᱩᱛᱩᱢ ᱞᱮᱠᱟᱛᱮ, ᱱᱚᱭᱟ ᱢᱳᱬ ᱫᱚ ᱠᱤᱥᱴᱚ ᱢᱳᱬᱞᱮ ᱞᱟ.ᱤᱻᱟ᱾

ᱱᱩᱭ -ᱟᱜ ᱚᱲᱟᱜ ᱫᱚ ᱵᱚᱱᱠᱟᱴᱟ ᱵᱟᱢᱲᱮ ᱴᱚᱞᱟ ᱥᱮᱫ ᱨᱮ ᱾ ᱱᱩᱭ ᱫᱚ ᱱᱚᱰᱮᱜᱮ ᱫᱟᱠᱟ ᱩᱛᱩᱭ ᱤᱥᱤᱱᱟ ᱟᱨ ᱧᱤᱫᱟ.ᱭ ᱛᱟᱸᱦᱮᱱᱟ ᱾ ᱟᱡ ᱵᱟ.ᱦᱩ ᱛᱤᱠᱤᱱ ᱵᱮᱲᱟ ᱫᱤᱱᱟ.ᱢᱮ ᱦᱤᱡᱩᱜᱻᱟ᱾ ᱥᱟᱳᱛᱮ ᱜᱚᱲᱚᱢ ᱠᱚᱲᱟᱦᱚᱭ ᱟ.ᱜᱩ ᱫᱟᱨᱟᱭᱮᱭᱟ ᱾ ᱩᱱᱤ ᱥᱟᱳ ᱥᱟᱨᱟᱫᱤᱱ  ᱪᱚᱜ - ᱪᱮᱨᱮᱪ ᱠᱟᱛᱮ ᱚᱠᱛᱚ ᱯᱟᱨᱚᱢᱚᱜ ᱟ ᱾ ᱛᱤᱠᱤᱱ ᱵᱮᱲᱟ ᱫᱚ ᱩᱱᱟ.ᱜ ᱠᱷᱚᱫᱫᱮᱨ ᱵᱟᱝᱠᱚ ᱦᱤᱡᱩᱜᱻᱟ᱾ ᱚᱱᱟᱛᱮ ᱩᱱᱠᱩ ᱯᱮ ᱦᱚᱲ, ᱪᱮᱲᱮ ᱞᱮᱠᱟ ᱪᱮᱨᱚ - ᱵᱮᱨᱚ ᱠᱟᱛᱮ ᱫᱤᱱ ᱠᱚ ᱵᱤᱛᱟ.ᱣ ᱛᱟᱸᱦᱮ ᱾

 

ᱱᱩᱭ ᱠᱤᱥᱴᱚ ᱫᱟᱥ ᱟᱜ, ᱢᱤᱫ- ᱵᱟᱨ ᱡᱚᱢ ᱡᱤᱱᱤᱥ ᱫᱚ ᱫᱤᱥᱟ. ᱞᱮᱠᱟᱱᱟᱜ ᱾ ᱱᱩᱭ ᱫᱚ ᱪᱷᱳᱞᱟ ᱛᱮᱠᱮᱭ ᱟ.ᱠᱨᱤᱧ ᱛᱟᱸᱦᱮ ᱾ ᱟᱨ ᱚᱱᱟ ᱪᱷᱳᱞᱟ ᱥᱩᱱᱩᱢ ᱨᱮ ᱵᱷᱟ.ᱡᱤ ᱠᱟᱛᱮ ᱟ.ᱰᱤ ᱪᱮᱦᱨᱟ ᱥᱮᱵᱮᱞ ᱛᱟᱸᱦᱮ ᱾ ᱢᱤᱫᱴᱟᱝ ᱵᱟᱨᱭᱟᱢ ᱠᱚᱴᱚᱜ ᱞᱮᱠᱷᱟᱱ - ᱟᱨᱦᱚ ᱠᱚᱴᱚᱜ ᱜᱮ ᱵᱩᱡᱷᱟ.ᱣ ᱢᱮᱭᱟ ᱾ ᱩᱱ ᱡᱚᱠᱷᱚᱡ ᱱᱚᱭᱟ ᱪᱷᱳᱞᱟ ᱛᱮᱠᱮ, ᱞᱟ.ᱰᱩ ᱠᱷᱚᱱ ᱦᱚ ᱦᱮᱲᱮᱢ ᱠᱟᱱ ᱛᱟᱸᱦᱮ ᱾ ᱟᱛᱳ ᱠᱚᱨᱮᱱ ᱢᱟᱦᱨᱟ ᱜᱤᱫᱨᱟ. ᱠᱚ, ᱥᱟᱦᱟᱱ ᱦᱟᱞᱟᱝ ᱠᱟᱛᱮ ᱠᱚ ᱟ.ᱜᱩ ᱟᱭ ᱛᱟᱸ ᱦᱮ ᱾ ᱟᱨ ᱚᱱᱟ ᱵᱟᱫᱟᱞ ᱛᱮ ᱩᱱᱤ ᱫᱚ ᱪᱷᱳᱞᱟ ᱛᱮᱠᱮᱭ ᱮᱢᱟ ᱠᱚ ᱛᱟᱸᱦᱮ ᱾ ᱟᱨ ᱢᱟᱡᱟᱱ ᱥᱮᱫ ᱫᱚ ᱪᱚᱯᱮ ᱵᱮᱱᱟᱶ ᱛᱟᱸᱦᱮ ᱾ ᱢᱤᱫ ᱵᱟᱨ ᱫᱤᱱ ᱫᱚ ᱜᱷᱩᱜᱱᱤ ᱠᱚᱭ ᱵᱮᱱᱟᱶ ᱛᱟᱸᱦᱮ ᱾ ᱟᱨ ᱠᱮᱠᱽ ᱠᱚᱦᱚᱭ ᱟᱠᱟ ᱠᱟᱜ ᱛᱟᱸᱦᱮ ᱾ ᱚᱱᱟᱠᱚ ᱧᱮᱞ ᱠᱟᱛᱮ, ᱩᱞᱤ ᱫᱟᱜ ᱥᱟᱨᱥᱟᱶ ᱠᱟᱛᱮ - ᱢᱚᱪᱟ ᱨᱮᱜᱮ ᱦᱟᱭᱮᱫᱚ ᱛᱟᱸᱦᱮ ᱾

( ᱛᱳᱸᱜᱮ ᱛᱟᱸᱦᱮᱱᱟ.......)