দারে রহয় তালাতে মানাওয়েনা অনলিয়ৗ গোমস্তা প্রসাদ সরেনাঃ সৗগুন জানাম মাহা

আবোওয়াঃ ডিজিটাল ডেক্স-    গৗখুড়ান অনলিয়ৗ অনড়হিয়ৗ সেরেঞ গাবানিয়ৗ গোমস্তা প্রসাদ সরেনাঃ সৗগুন জানাম মাহা মানাওয়েনা পুরুলিয়ৗ জেলা রেনাঃ বান্দোয়ান জাপাঃ খেরওয়ালডিরে। হলা ২র জুন জৗরুম মাহা হিলোঃ বৗসিয়ৗম বেড়া ইরৗল বাজাঃ অকতে সানতালি লিটারেরি ফোরাম আঃ সৗহিজুহিতে নে-হালেগে বঁগা তালা আকান গোমস্তা প্রসাদ সরেন আঃ সৗগুন জানাম মাহাকো মানাও কেদা। বাডায়েনা বঁগা তালায়েন তায়ম নোওয়াগে পোয়লো জানাম মাহা অনলিয়ৗ সরেনাঃ মানাও এনা।

 

জানাম মাহা মানাও আখড়ারে মারাং পেড়া লেকাতে সেটের এ তাঁহে কানা অনলিয়ৗ মানতান সারদা প্রসাদ কিস্কু ( খেরওয়াল বৗসিয়ৗ ) মৗনৗন পেড়া লেকাতে 'সিলি 'পাথাম রেন সিরৗ সাসাপড়াওইচ্ মানতান কলেন্দ্রনাথ মান্ডি নেওতা পেড়া লেকাতে 'জুমিৎ আড়াং' পাথাম রেন সাসাপড়াওইচ্ মানতৗনিয়ৗ তনুশ্রী  হাঁসদাঃ, গড় সাসাপড়াওইচ্ উত্তম কুমার মুরমু সাঁওতে সিতেন মান্ডি আর রতন হাঁসদাঃ।

 

 মারাং পেড়াওয়াঃ তি'তে পোহা দারে রহয় তালাতে অনলিয়ৗ আঃ জানাম মাহা রেনাঃ আখড়া কৗমিহরা এহব এনা।   আখড়ারে অনলিয়ৗ আঃ জিয়ন আর সাঁওহেৎ রে উনিয়াঃ এনেম লৗইতে অড়ে অড়পাত গালমারাও হোয়েনা। অনা সাঁওতে উনিয়াঃ সেরেঞ আর অনড়হেঁ লৗই তেহঁ গৗখুড়িয়াকো আড়তি তরা কেদা। সাঁওহেৎ চেতান অসাম্ভেড় এনেম খৗতির নোওয়া জানাম মাহা আখড়া রেগে "গোমস্তা প্রসাদ সরেন স্মৃতি রক্ষা কমিটি " মেনতে মিৎ কুমুট তেয়ার এনা ।

 

আখড়ারে সেটের তাঁহে লেনাকো অনলিয়ৗ রেন হপন কিমিন সাঁওতে গড়ম কড়াকুড়িকো। আর সুর সৗগিঞ খনকো সেটের লেনা আয়মা সাঁওহেৎ দুলৗড়িয়ৗ অনলিয়ৗ অনড়হিয়ৗকো। এহব খন মুচৗৎ হৗবিচ আখড়ারেন বৗইসি লেকাতে তাঁহে কানায় 'তেতরে 'পাথাম রেন সাসাপড়াওইচ্ মানতান মহাদেব হাঁসদাঃ।

 

  মুচৗৎরে, সানতালি লিটারেরি ফোরাম রেন সেক্রেটারি মানতান অরুন কুমার সরেন সেটের লেন সানামকো গুন মানাও জহার আর সারহাও এ চালাৎ কওয়া ।