আযোদিয়ৗ বুরু চাম্পা বাহা বায় আতাং লেদা বিরবাহা
জাহের আয়ো মুরমু
আযোদিয়ৗ বুরু চাম্পা বাহা অকয়টাঃ তিরলৗ সুৎরে রেবেৎ বাং সানায়েয়া। নে হড়াঃ বাডায় বৗনুঃ আন। শিকৗরিয়ৗ কোওয়াঃ সাঁদেশ লেকাতে চাম্পা বাহা গে তাঁহেনা ঘেঁট পটম। আর অনা বাহা গছারে আতাং লৗগিৎ কয়ঃ দারাম হররে কো তাঁহেনা আতোরেন তিনৗঃ মৗই বিটি, দৗই,বৗহুড়িয়ৗ, বুঢি-গ আর আয়ো কো। নংকান মিৎ সাঁদেশ আতেৎগে আযোদিয়ৗ বুরু চট্ খন ‘প্রকৃতি বাঁচাও ও আদিবাসী বাঁচাও মঞ্চ’ রেন রৗসিয়ৗ কো সেটের লেনা পনৎ রিনীচ্ বিরমন্ত্রী বিরবাহা হাঁসদা আঃ অড়াঃতে। মেনখান সেটের কাতেৎ কো বাডায় কেদা বাংমা দিদি অড়াঃ রেগে বৗনু গেয়া। তেরাং সার লেকা কুক্লি হেচ্ এনা অকায়েনায়? অকায় চালাও আকানা? তিনরে রুওয়ৗড়ায়? এমান এমান…। নুনৗ রৗস্কৗ মনেরেনাঃ মনেরেগে রহড়েনা, পটম রেনাঃ চাম্পা বাহা পটম রেগে মশদঃ এহব এনা। অকয় চয় মেন গদ্ কেদা আগু আকাৎ সাঁদেশ দ এম কাতেৎ গেবন রুওয়ৗড়া। সৗরিগে কাথা এম কাতেৎ কাথা বায় দহ লেদা বিরবাহা ? দেলাবন বাডায় লেগে….
কাথাদ তাঁহেকান গেয়া পাটাবিন্ধা পাতারে। নেঁডাহঁ হুয় লেনা সামাং সামাং রপড় তালাতে। আচ্ হঁত কাথায় রড় লেদা আপেয়াঃ রেঁগেচ্ রাবাং বাংপে লৗই আঞ খান চিকৗতিঞ বাডায় ঞামা? নোওয়া কাথা লৗলৗই লৗগিৎ গে নেঁডা মাহারে সেতাঃ খনগে আযোদিয়ৗ বুরু চট্রেন সুপেন, গুলন, ধীরেন আর শ্যাম বাবু তাকোদ সৗতঃ হররে। সাঁগিন দিশম ঝাড়গ্রাম চালাঃ হোয়োঃ। ১৫০-২০০কি.মি. হর। লাহা খন কাথা গটা গে তাঁহেকানা মোটর বাইক র্যালী কাতে চালাঃ হোয়োঃআ মঞ্চ রেন আর গাতেকো আতে।
 |
| পাটাবিন্ধা পাতারে |
উনদ সেতাঃ ৬.৩০মি। বুরু চটরে রাবাং আউরি গৗডিয়ৗঃ রেহঁ হায়াম হায়াম দ রেয়াড় বল গদ্ আকানা। ঠিক অনকান অক্তরেগে বাইক রেনাঃ হর্ন সাডেয়েনা। দেলাবন ঝাড়গ্রাম। বাইক লাড়াওয়েনা। বারলাংগা গাডা ধারে সিরকাবাদ হরতে কাঁসাই গাডারে পুরুলিয়া টাউন রেন গাতেক তাঁগিরেকো তাঁহেকানা। অঁডে নাসেনাঃ টিফিন কাতে সঝহে মানবাজার হরতে শশ্মান কালি ঠেন হুড়া পুঞ্চা রেন গাতেকো সাঁওতে একাল বুরুডি। নঁডে অঁডেরেন মুলুক পারগানা বাবা ‘প্রকৃতি বাঁচাও ও আদিবাসী বাঁচাও মঞ্চ’ রেন সানাম রৗসিয়ৗ কো লৗগিৎ সৗগুন দারাম দাঃ রেনাঃ বন্দেজ এ দহলেদা। অঁডে সিধু-কানু মুঠৗনরে বাহামালা আরাও কাতেৎ আরহঁ জামতোড়িয়ারে সৗগুন দারাম দাঃ তেকো আতাং দারাম কেৎ কোওয়া। মিৎ ঘৗড়িচ্ লাঁগা ফারনাও তায়ম আরহঁ পোড়াডি হরতে বাঁশপাহাড়ি লেকাতে চিটামাটী, চাকাডোবা, বেলপাহাড়ী লেকাতে একালতে শিলদা। চালাঃ হরতে আয়মা হড়াঃ আশীষ থুম কো ঞাম ইদিয়েদা আর কো বাডায় দাড়েয়াঃ কানা বাংমা নোকোদ বিরমন্ত্রী ঠেনকো চালাঃ কানা। শিলদা সোর ঝাড়গ্রাম রেগে মানতানিয়ৗ বিরবাহা আঃ অড়াঃ। অনা অড়াঃ হর সেনঃ মাড়াং রেগে মিৎ ফুটবল খেলোড ডৗহিরে থাও থাও পুলিশ। অঁডেগে বাইক র্যালী কো আটক কেদা পুলিশ। নঁডে খন লাহাঃ আদ বাং গানঃ আ। গাপালমারাও কাতে বাডায় ঞাম কেদাকো বাংমা মন্ত্রী দ তেহেঞ অড়াঃরে বৗনু গেয়া। আয়াঃ দপ্তর রেনাঃ কৗমি খৗতির কলকাতায় চালাও আকানা। নোওয়া কাথা আঁজম তরা রৗসিয়ৗকো অঁডেগে রৗগি কাঁহিশ কো সদর কেদা। হুনৗং নুন সাঁগিঞ খন হেচ্ কাতে আচ্ সামাং সামাং দুড়ুপ কাতে আযোদিয়া বুরু রেনাঃ সাঁদেশ কো চাল আয় কেয়া। লৗই কেয়াকো ঠূড়গৗ গাডা চেতান পাম্পড স্টোরেজ প্রজেক্ট হুয় লেনখান ২৯৪ হেক্টর বুরুরেনাঃ হাসা ধৗসুড়ঃ আ। অনাবেগর মারাং বুরু ডুংরিরে মারাং থান, পে-পে গটাং জাহের থান রেনাঃ মহর মেটাঃআ। বান্দু গাডা চেতান রেহঁ প্রজেক্ট হোয় লেনখান অঁডেহ আয় উমৗন ৪০০ হেক্টর বুরুহাসা চাবাঃআ। কাঁন্ঠাড় জড় রেহঁ অনকাগে। যাঁহাতেদ বুরু রেনাঃ সাচারহেৎ চিতৗর গে বাং তাঁহেনা। বুরুরেন উনৗ উনৗ জিব-জিয়ৗলি অকারেকো তাঁহেনা? উনৗ চেঁড়ে-চিপরুৎ কোওয়াঃ বাসা বাং তাঁহেনা। বুরুরেনাঃ হৗড়িয়ৗর আদঃ আ। নঁতে সেদায় খন বাঞ্চাও হেচ্ আকান হড় হপনাঃ ‘ল-বির’ বৗইসি সুতৗন টাঁডি রেনাঃ হঁ মহর মেটাঃআ। অনাতে ২০০৬ বির-বুরু রেনাঃ আইন লেকাতে আর আকোওয়াঃ আইদৗর লেকাতে অঁডেরেন হড় যে অনাক প্রজেক্ট বাংকো খজ কানা অনাগে লৗই সদর। নংকান আয়মা কাথা আয়মা দিন খন লৗই রেনাঃ কাথা তাঁহেকান রেহঁ বাংকো লৗই দাড়েয়াকাদা। তেহেঞ অনা দাও ঞাম কাতেহঁ মনের কাথা বাংকো সদর দাড়েয়াদা। সৗরিগে কাথা এম কাতেৎ কাথা বায় দহ লেদা।
হলানাঃ খবররে বাডায় ঞাম এনা বাংমা উনিদ মেমোরেন্ডাম এমঃ রেনাঃ কাথা ওনকো বাকো বাডায় ওচো আকাদে তাঁহেকানা। যাঁহারে তাঁহেনায় অনাদ আচ্ আয়োঃ আঃ অড়াঃ কানা। অড়াঃরে নংকা মেমোরেন্ডাম বাং হোয়োঃআ। তবে ওনকো আয়াঃ দপ্তররে হেচ্ কাতেৎ মেমোরেন্ডাম কো চাল আয় খান একালতে ওনকো মাড়তে ক সাঁওতে কাথায় মেনা।
নিৎ আয়মা হড়াঃ মচারেগে নংকান কাথা আঁজমঃ কানা এনখান আয়াঃ অড়াঃ চালাঃ হররে উনৗঃ পুলিশ অকালেকারকো সেটের এনা? নুকুওয়াঃ চালাঃ হর গেবাং চেদাঃ কো জাঁগেদারাম কেদা? আর দিন দ চেদাঃ নংকা নঁডে পুলিশ বাংকো ঞেলঃগঃ আ? তবে চেৎ পুলিশ দ আকো বুঝ তেগেকো সেটের লেনা ?
নঁতে ‘প্রকৃতি বাঁচাও ও আদিবাসী বাঁচাও মঞ্চ’ রেন রৗসিয়ৗ কোঠেন খন বাডায় ঞাম আকানা বাংমা আকোওয়া কৗমি হরা খন দ মিৎ জাঁগাহঁ বাকো তায়মঃ আ। নোওয়া ইদিকাতেৎ আকোওয়াঃ আন্দোড় জৗরিগে তাঁহেনা।
.webp)
