কিস্কিন্ধ্যা মুরমু,বান্দোয়ান - ফুরগৗল লৗড়হৗই রেন নাগামিয়ৗ বিরবান্টা মুদরে তিলকৗ মুরমু( মৗঝি)য়াঃ হঁ আডিগান এনেম মেনাঃ আকাৎ তায়া। অনাতে জানাম মাহারে মৗন মানৎ সালাঃ দিশা উইহৗর কেদেয়া কো আয়মা টঠারে। এনেচ সেরেঞ খেলোড হেপরাও তালাতে ভারি ভরম সালাঃ আয়মা স্কুল, কলেজ, বিশ্ববিদ্যালয়, গাঁওতা রেহঁ মানাও উনিয়া জানাম মাহা মানাও সৗহিজুহি এনা। নঁতে সানতালি লিটারেরি ফোরামাঃ কুরুমুটুতে ১১ ফেব্রুয়ারি ২০২২ হিলোঃ তারাসিঞ মিৎ টাড়াং অকতে পুরুলিয়ৗ জেলা রেয়াঃ বান্দোয়ান বাস স্ট্যান্ড সোর যোগেন্দ্র নাথ টুডু আঃ অড়াঃরে বিরবান্টায়াঃ ২৭৩ আনাঃ সাগুন জানাম মাহা মানাও হুয় পারমেনা ।
আখড়ারে মারাং পেড়া লেকাতে সেটেরে তাঁহে কানা গৗখুড়ান অনলিয়ৗ অনড়হিয়ৗ মানতান গোমস্তা প্রসাদ সরেন ,মৗনান পেড়া লেকাতে সেটের তাঁহে কানাকিন অনড়হিয়ৗ মানতান সীতেন মান্ডি আর মানতান রামদাস মান্ডি।
জানাম মাহা মানাও আখড়ারে ভারত রেনাঃ ফুরগৗল লৗড়হৗইরে তিলকৗ মুরমুয়াঃ এনেম লৗইতে গাপালমারাওরে সেলেৎ লেনাকো "সিলি" পাথাম রেন সিরৗ সা-সাপড়াওয়িচ মানতান কলেন্দ্র নাথ মান্ডি গংকে সাঁওতে অনড়হিয়ৗ সতন কুমার সরেন , অনড়হিয়ৗ বঙ্কিমচন্দ্র হেম্ব্রম ,অনড়হিয়ৗ সুধীর কুমার মুরমু ,বান্দোয়ান মৗঝি বাবা মানতান যোগেন্দ্র নাথ টুডু। সাঁওহেৎ দরদিয়ৗ দুলৗড়িয়ৗ লেকাতে আঁজম সাঁগেরে তাঁহে কানাকো আয়মা স্কুল কলেজ রেন পৗঠুওয়ৗ মৗই বৗবু তাক।
তিলকৗ মুরমু জানাম মাহা ইদি কাতে গাপালমারাওরে মানতান কলেন্দ্র নাথ মান্ডি গংকে দয় লৗই কেদা যে,"১৮৫৭ সাল আডি লাহারে মিৎটাং লৗড়হৗই হুয় লেনা। যাঁহা দ তিলকৗ মুরমু অৗয়ুরতে। সিপৗহি বিদ্রোহ খন আডি মাড়াং তাঁহে কানা। মেনখান ফুরগৗল লৗড়হৗই রেন পোইলো নাগামিয়ৗ লেকাতে তিলকৗ মুরমুয়াঃ ঞুতুম দ বাং হেচ লেনা। মঙ্গল পান্ডেগে পোইলো স্বাধীনতা সংগ্রামী কো মেতায় কানা পৗহিল উতৗরিচ্। নওয়া ইদি কাতে দ তজবিচ্ রেনাঃ লৗকতি মেনাঃআঃ নিত হঁ"।
ইতুন আসড়া,বিদ্যাগাড়,বিশ্ববিদ্যালয়,গাঁওতা আয়মা ঠাঁওরেগে মুঠৗন বেনাও আকানা সাঁওতে তিলকৗ মুরমুয়াঃ ঞুতুমতে ছৗটিয়ৗর আকানা সে নিৎহঁ দিসৗ উইহৗর কাতে আয়মা ক্লাব , ইতুন আসড়া করেনাঃ ঞুতুমগে বিরবান্টা ঞুতুমতে বেরেৎ কানা। আখড়ারেনাঃ গালচরে নংকান কাথাগে রাকাপ সৗরিয়েনা ।
আখড়া চালাওয়িচ লেকাতে তাঁহে কানায় "তেতরে" পাথাম সাসাপড়াওয়িচ মানতান মহাদেব হাঁসদাঃ । আডি মজ আখড়া চালাও কেৎ তায়নম সেটের আকান সানাম কগে গুনমানাও সারহাও চাল আৎ কোওয়ায় সানতালি লিটারেরি ফোরাম রেন সেক্রেটারি মানতান অরুন কুমার সরেন। সাঁওতে আখড়া কৗমিহরা হঁয় থুকুম তরা কেদা ।
.webp)
.webp)
