আবোওয়াঃ ডিজিটাল ডেস্ক- ফেক এসটি সার্টিফিকেট রুখিয়ৗও লৗগিৎ তেখার তেখার কৗমিয়া সভায় সৗহিজুহি ইদিয়েদা পশ্চিমবঙ্গ আদিবাসী কল্যাণ সমিতি। অনকাগে গাপা ১৪ নভেম্বর সিঁগিমাহা হিলঃ মালদা টাউন হল রে উত্তরবঙ্গ রেনাঃ সানাম জেলা লৗইতে পোয়লো কৗমিয়া সভা পোনাঃ তেখারতে হুয় লৗগিদঃ কানা।
নংকান কৗমিয়া সভা তালাতে আদিবাসী কো তালারে আয়মা সাড়া সৗবুদ্ ঞামঃ কানা মেনতে সমিতি পাহটা খনগে আবোরেন খবরিয়ৗকো বাডায় অচো আকাদেয়া। সেচেৎ, চৗকরি খন এহব কাতে নানাহুনৗর জনপ্রতিনিধি লেকান ঠাঁও রেহঁ যেভাবতে অ-আদিবাসী কো সৗরিন আদিবাসী কোওয়াঃ রাখা দহ মেনাঃ ঠাঁওরে রামা কো গৗডিয়াও এদা তাতে আদিবাসী কোওয়াঃ মলংরে ভাবনা রেনাঃ ভাঁজ ঞুরঃ এহব আকানা। মিৎ তঁগে গে অ-আদিবাসী কো তালারে এসটি সার্টিফিকেট এম চালাঃ কানা মেনতে এহব খনগে অভিযোগ আগুওয়াকাদায় সমিতি। নোওয়াকদ আদিবাসীকো আকোওয়াঃ নাশাও রেয়াঃ গে নিশৗন কানা মেনতেকো মনেয়েদা। অনাতে নংকান নিশড়ৗও আর পশড়াও সাঁওতে এড়ে ভুড়ুচ্ অচোঃকান বিরুধ রে আদিবাসী কো ডাঁডাঁ কেটেজ্ কাতে কো লাহা হিজুঃ কানা।
ফেক এসটি সার্টিফিকেট বাখরাতে পনৎ রেনাঃ আয়মা জেলারেন ডিএম, এসডিও, পিও কাম ডিডব্লিউ আপিসারকো সাঁওতে আদিবাসী এম.এল.এ. আর এমপি কোঠেন দরবার কাতেহঁ কাথায় চেৎ লাভ হঁ বাং হুয় আকানা। আদিবাসী এম.এল.এ. আর এমপি কহঁ নোওয়া ইদিকাতেৎ মচা বাংকো রাড়ায়েদা মেনতেহঁ সমিতি অভিযোগ এ রাকাব আকাদা। অনাতে আপনারাঃ হক-আইদৗর আদায় লৗগিৎ আপনার লেকাতেগে লাড়হাই কো এহব আকাদা মেনতেহঁ সমিতি পাহটা খন বাডায় আকানা।
বাডায় আকানা গাপারেনাঃ কৗমিয়া সভারেন মুড়ুৎ কৗমিয়া কিন হোয়োঃ কানা মালদা জেলা চাঁগারেন সভাপতি মশে টুডু আর জয়েন্ট সেক্রেটারী সুনীল হাঁসদা। অনা কৗমিয়া সভারে মুড়ুৎ বাঁখেড়িয়ৗ লেকাতে সেটের তাঁহেন কানাকো পশ্চিমবঙ্গ আদিবাসী কল্যাণ সমিতিরেন সভাপতি বালকরাম সরেন, সেক্রেটারী পার্শাল কিস্কু সাঁওতে এক্সিকিউটিভ মেম্বার মিতন চন্দ্র টুডু।
.webp)
.webp)
