আবোওয়াঃ ডিজিটাল ডেস্ক- ভারত জাকাত মাঝি পারগানা মহলাঃ দশার আনাঃ দিশম মাড়তে মিদুন সাপড়াও আকানা আযোদিয়ৗ বুরু চটরে। নোওয়া মিদুন গাপা-মেয়াং ১৩ আর ১৪ নভেম্বর দিশম মাড়তে কো আতেৎ পুরুলিয়া জেলা রেনাঃ আযোদিয়ৗ বুরু চটরে সৗখি সভা লৗগিদঃ কানা। নোওয়া মাড়াং চালাওয়েন সেরমা ঝাড়খন্ড রেনাঃ হাজারিবাগ জেলারে পোয়লো দিশম মাড়তে মিদুন সৗখি সভা লেনা।
বাডায় আকানা নংকান মিদুন মহল ঠেন আডি লৗকতিয়ানাঃ কানা মেনতে মহল হঁয় মনেয়াকাদা। নোওয়া মিদুন তালাতেগে ঠাড় গটাঃ আ দারায়কান সেরমা রেনাঃ মহলাঃ কৗমিহরাকো। নোওয়া মিদুন রেগে পুরুলিয়া জেলারে হোয় লৗগিদঃ কান পনৎ মিদুন রেনাঃ ঠাঁও আর মাহা হঁ সদর তরা আ। অনাবেগর আযোদিয়ৗ বুরু লৗইতে মহলাঃ হাপেন দিন রেনাঃ উইহৗর ভাবনা সাঁওতে অঁডে যাঁহা ঠুড়গৗ প্রজেক্ট বেনাও রাকাব কান সাঁওতে বীরভূম জেলা রেনাঃ দেউচাপাচামি রে কোল ব্লক বেনাও রাকাব কান, নোওয়াকিন রেনাঃ আনাট ইদিকাতেহঁ মহল নোওয়া মাড়তে মিদুন রেগে গাপালমারাও এ দহয়া মেনতেহঁ বাডায় আকানা।
দাঃ-হাসা-বির বাঞ্চাও সাঁওতে বির-বুরু আইদৗর-২০০৬ আইন লগন লৗগু অচোয় রেনাঃ কাথা হঁ রাকাবা মিদুন রে। চেদাসে আদিবাসী বাঞ্চাও কো লৗগিৎ আদিবাসী সংগঠন কোগে লাহা হোয়োঃ তাকোওয়া। নোওয়া কাথা মনে কাতেগে মহল নিৎ আযোদিয়ৗ বুরু আর বীরভূম রেনাঃ দেউচাপাচামি রুখিয়ৗও লৗগিৎ আরহঁ গৗহির উইহৗর ভাবনায়েদায় মেনতেহঁ বাডায় আকানা।
নঁতে পনৎ সরকার পাহটা খন বীরভূম জেলা রেনাঃ দেউচাপাচামি এলাকারেন হড় লাগা ডিগলৗও অচোঃকান কো লৗগিৎ ‘পূনরবাসন’ প্যাকেজ এ বাঁখেড় আকাদা মেনখান অনা এলাকারেন হড় মহলাঃ সাঁওতে আরহঁ এটাঃ এটাঃ গণসংগঠন কোওয়াঃ গড়তে প্যাকেজ হাতাওরে আউরি কো রেবেনঃ আ। অজে লেকাতে বাডায় আকানা বাংমা সরকার আঃ বাঁখেড় সাঁও বাস্তবরে আডি ফারাক তাঁহেনা। চেদাঃসে নোওয়া মাড়াং হঁ আয়মা জায়গারেগে অনারেনাঃ অরসং আডি বে-বৗড়িচ্ গে ঞেল আকানা মেনতে মহল দৗবীয় রাকাব আকাদা। মেনখান আদ বাং- মহল তাঁহেন তে অকা জায়গারেন আদিবাসী কোগে বায় হালে ডালে অচো আকোওয়া মেনতেহঁ মহল পাহটা খনগে বাডায় ঞাম আকনা। নোওয়া কো ইদিকাতেৎ গাপালমারাও হোয়োঃ কান খৗতির আযোদিয়ৗ বুরু মাড়তে মিদুন রেনাঃ মিৎ আলাদা রূপ এ ঞাম লৗগিদঃ কানা।
নোওয়া মাড়তে মিদুন রে পনৎ রেনাঃ আয়মা জেলা খন সাঁওতে আর আর পনৎ খনহঁ পারগানা বাবাকো সহর সেটের কাতে দিশম মাড়তে মিদুন কো সৗখি সভায়া।
.webp)
.webp)
