অনড়হিঁয়ৗ নারায়ন সরেন ‘তড়ে সুতৗম’ আঃ জানাম শায় সেরমা আর মিৎ বার কাথা
যুগ জীয়ন মুরমু
হলা ২৮ অক্টোবর, অনড়হিঁয়ৗ নারায়ন সরেন ‘তড়ে সুতৗম’ আঃ জানাম শায় সেরমা ভৗরি ভরম সালাঃ মানাও এনা বান্দোয়ান মান্ডি ভবন রে। নোওয়া আখড়া দয় সৗহিজুহি লেদা সানতাড়ি লিটারেরি ফোরাম পুরুলিয়া। মেনখান আর মিৎ বার আৎ তুৎ বেগর আর অকারেহঁ অনকা মাছা উনিয়াঃ জানাম মাহা মানাও রেনাঃ চিতৗর আবোক তালারে বাং ঝালকাও রাকাব লেনা। বাং ওয়েবনার তালাতে, বাং শোস্যাল মিডিয়ারে বাং নংকান আখড়া তালাতে ?
তবে উনিয়াঃ শায় সেরমা জানাম মাহা লৗইতে অনলিয়ৗ, অনড়হিঁয়ৗ কো মুদ্রে রাপাচাঃ আঁজমঃ কানা। আদম কদ ১৯২২ খান আদম কদ ১৯২৩ সাল রেনাঃ কাথা কো লৗই এদা। মেনখান মৗহিৎ রেদ অকয়াঃগে এটকে টঁড়ে বাং আঁজম আকানা। এনখান এনহঁ চেদাঃ জানাম মাহা দ অনকা মাছা মানাও বাং ঞেল লেনা।
অনা মেনতে যাঁহা লেকা দুক্ সদর বুঝৗও এনা সাঁওতে সাঁওহেৎ চারচাও রেনাঃ দিনহঁ পালেন বৗই বৗইতে নিপুজ হিজুঃ কান লেকাগে নিৎ ঘানে ঘানে মনেরে গুরলৗঃ কানা।
সানতাড়ি পৗরশিরে আগিল অনলিয়ৗ, অনড়হিঁয়ৗ কো মুদ্রে পোয়লো থকরেন অনড়হিঁয়ৗ লেকাতে নারায়ন সরেন আঃ ঞুতুম ঞুম হালাং গানঃ আ। উনিয়াঃ ছাপাও সদর আকান পুঁথি কো মুদ্রে গিরৗ, কীর্তন কালি ১ আর ২ খন্ড, আষাঢ় বিনতি এমান এমান। অনাকো বেগর বাডায় আকানা নিৎহঁ আয়মা পুঁথি বিন ছাপাওতেগে মেনাঃ আকাদা। অনাকো মুদ্রে উফৗদিয়ৗ, উরনি সেঁগেল, ধৗরতি দু্রৗং, কায়েকটি ইল, ডাহার ধুড়ি, চুরুচ্ চাউলে, মাঠা সুড়ৗ, কিমিনিঞ, ভিনসার মায়াম, হাপড়াম পাঞ্জা আর চাম্পা বাহা এমান। নোওয়াকো তালারে অনল মালা, গাম কৗহনি, হুডিঞ কৗহ্নি আর গায়ান তে গাবান আকানা। এখেন অনড়হিঁয়ৗ সুমুং দ বায় তাঁহে কানা। অনা বেগর উনিদ কৗহনিয়ৗ, গামাম অনলিয়ৗ, গায়ান অনলিয়ৗ, গায়ান বাডোহি মেনেৎ সানাম পাহটারেন গে ঞুতুমান অনলিয়ৗয় তাঁহেকানা।
নংকান মিৎ ঞুতুমান অনড়হিঁয়ৗ আঃ জানাম মাহা মানাও বাতাও রেহঁ ক্লাব সে গাঁওতা কোওয়াঃ অনহেঁড়া দ নিয়ৗধাও হঁ ঞেল এন গেয়া। শোস্যাল মিডিয়া রেহঁ ‘তড়ে সুতৗম’ লৗইতে অনকা মাছা পোস্ট বাং ঞেল লেনা। নঁডে কুকলি রাকাব গে দাড়েয়াঃ আ- তবে চেৎ কোভিড-১৯ খৗতির, ‘তড়ে সুতৗম’ লৗইতে বাডায় বাংতে, উনিয়াঃ জানাম মাহা দিশৗ বাংতে, উনি বাং ওরোমেতে সে আবোক তালারে সানতাড়ি সাঁওতারে অনকা মাছা চেতনা বাংতে? সে অনহেড়াতে ?
ঞেল আকানা সানতাড় সমাজরে বাছাও বাছাও মিৎ-বার অনলিয়ৗ, অনড়হিঁয়ৗ বেগর আর আর ঞুতুমান অনলিয়ৗ, অনড়হিঁয়ৗ কদ অনহেঁড়া গেকো তাঁহে ইদিঃ কানা। নোওয়া কাথা সাব কাতে লৗই গানঃআ নিৎ রেন অনলিয়ৗ, অনড়হিঁয়ৗ কদ হাপেন দিনরেন প-পঁগড়া কোঠেন চেৎ হঁ বাংকো আশঃতে ? মিৎ মারাং কুকলি তাঁহেন কান গেয়া।
অনাবেগর নোওয়াহঁ লৗই গানঃআ যে আবোওয়াঃ সাঁওহেৎ রেয়াঃ যাঁহা নাগাম অনাগে বাংবন হিড়িঞ সায় দা তো ? মেনেৎ সাঁওহেৎ রেনাঃ নাগাম গে বাংবন হিড়িঞ এদা তো ? নাগামে লৗই এদা- যাঁহায় জৗত আকোওয়াঃ জৗত রেনাঃ পৗরশি সাঁওহেৎ কো আদা, ওনকো দকো আদ আ। মুচৗৎরে নোওয়া গে লৗই গানঃ আ তবে চেৎ আবো হঁ নংকা কাতেৎ আদঃ হররে ?? সানাম হড়গে আপনার মনেরে গৗহির কুকলি বন দহ লেখান হেঁ আর বাং তেলা দ ঞামঃ গেয়া।
.webp)
.webp)
