কুইলৗপাল হাটরে ঝালকাও এনা সৗরি সহরায় রেনাং সাপড়াঃ চিতৗর
কিস্কিন্ধ্যা মুরমু ,বান্দোয়ান - বান্দোয়ান থানারে মেনাঃ কুইলৗপাল হাট দ জৗরুম মাহা হিলোঃগে হুয় হিজুঃ কানা । আড়েপাসে রেন দিকু সান্তাড়তে এয়ায় মাহা রেনাঃ লৗকতিয়ান সয়দা কিরিঞ অৗখরিঞা নওয়া হাটরে। লৗকতি আনাঃ কিরিঞ সুর সুপুর অৗতুরেন হড় দিকু সেতাঃ খনগে ঞেল ঞামঃআ নানাহুনৗর দোকান করে। সৗঁগিঞ রেন হঁ যৗসতি হিজুঃ গেয়া।
পারমেন জৗরুম মাহা হিলোঃ হঁ হাট দ অৗডি জমকাও লাগাও লেনা।
এটাঃ মাহা করেনা হাট খন দ নিয়ৗ ঘালঃ আঃদ যুদৗগে চিতৗর ঞেল ঞামেনা। সান্তাড় হপন কোওয়াঃ হৗতি লেকান সৗরি সহরায় সামাংরে দারায় কানা। কৗমি জহড় নেডা বাড়া কতেগে নেডা মাহা দ সহর সেটেরঃআ। অড়াঃ রেনাং লৗকতিয়ান জিনিসপৗতি বাং তাঁহেলেন খান পরব লেকান মাহারে আনাট তেয়ারঃআ। অনাতে নিয়ৗ মাহা রেদ ঘারঞ্জিয়ৗ কড়া হপন কুড়ি হপন কদ সৗরি সহরায় আতাং দারাম লৗগিৎতে ডানডা কেটেচ কাতে সাঁও লেনা।
ঝালকাও রাকাপ এনা সৗরি সহরায় সার সাগুন রেনাঃ লৗকতিয়ান জিনিস কিরিঞ অৗখরিঞ তালাতে। গৗই ডাংরা চুমৗড়া ক লৗগিৎ নাওয়া হাটাঃ, হাপড়াম ক ঞুতুমতে চডর হৗঁডি দহয় লৗগিৎ হাসা টুকুচ্ টুমৗং ,অড়াঃতে নেওতা বারতে পেড়া পৗভরৗ নাওয়া গেঁদাঃ লৗগিৎ গেঁদাঃ গাদানরে তুকুচাঃ ঞামাঃ গৗরুম আকান তাঁহেনা। অনকাগে ঞেল ঞামেনা গৗই কাডা সুনুম সিন্দুর অজঃ আক লৗগিৎ কুঁইডি বৗরু সুনুম সাঁওতে সিন্দুর হাতাও রেনাং তুড়িপিঠি। যাও খনদ হাটাঃ রেনাঃ গনং হঁ যাসতি ১২০-১৫০ হৗবিচ হাতাও কেদা , টুকুচ্ টুমৗং হঁ ১০০-১৩০ টাকা। ঠেমা কৗউডি চাবাঃ কান রে'হঁ অৗডি লৗকতিয়ানঃ দ বহঃ গৗদুর কাতে হাতাও লাগাঃ কানা মেনতে কিরিঞ তেনকো লৗয়েৎ গেয়া।
যাঁহা তিনৗঃ বেড়ায় হৗসুরঃ কানা উনাঃগে কিরিঞ লৗগিৎ কুড়ি কড়া হাটরে তাতাতাউলৗ কো ঞেলেনা। হৗঁডি দহয় রৗনু হ কিরিঞ জগাড় ইদি কেদা। ঞুহুম ঞুহুম রুওয়ৗড়েন হাটতেনকো আপান অৗপিন অড়াঃ চালাঃ মহডা টুকুচ্ ,হাটাঃ,নাওয়া গেঁদাঃ সাঁওতে লৗকতিয়ানাঃ সয়দা কাতে।
রুওয়ৗড়তেন কুড়ি হপন কোওয়াঃ মনে মচা খন আঁজমেনা-
"সৗরি সহরায় দারায় কানা
শৗড়ি দাদা বৗনুঃ তিঞ ,
শৗড়ি দাদা তিসেম কিরিঞৗঞ..... । "
.webp)
.webp)
