আবোওয়াঃ ডিজিটাল ডেস্ক- সুদীপ টুডু ঞুতুমান মিৎ মাচেৎ আয়াঃ ওপরোম এম কাতেহঁ
সাইকেল কোম্বড়ো মনে কাতে দাল কাতেকো মায়াম ঝির ঝর কেদেয়া মালদারে। নংকান হাহাড়া ঘটনতে
এয়ায় গটাং আদিবাসী সংগঠন কো হলা ২২ অক্টোবর রাঁগাওনা মিছিল আর জাঁদরেল রড়দারাম তালাতে
মালদা ৩৪ নং জাতীয় সড়ক কো জাঁগে দারাম কেদা।।
বাডায় আকানা বাংমা ১৭ অক্টোবর, মালঞ্চপল্লী সাবওয়ে গেট সামাংরে
নংকান ঘটন ঘটাও আকানা। অনা ঘটন রেগে মানিকোড় হাই স্কুল রেন মাচেৎ সুদীপ টুডু মালদা
মেডিকেল কলেজ এন্ড হসপিটাল রে মিৎ হাসোঃ কান
পেড়া ঞেল কাতে আয়াঃ গৗডি হসপিটাল সোররে দহ হট কাতে তাড়াম তেগে মালঞ্চপল্লী রে
আর মিৎ পেড়া হিরিয় চালাও লেনা। অঁডে খন রুওয়ৗড়ঃ অক্তে গে অনা জায়গারে ৩ নং ওয়ার্ড রেন
কো-অর্ডিনেটর সাঁওতে মারে কাউন্সিলার পরিতোষ চৌধুরী আর আচরেন দলবল লৗইতে সুদীপ টুডু
সাইকেল কোম্বড়ো মনে কাতে বেধড়ক দাল কেদেয়া।
বাডায় আকানা উনি কাউন্সিলার আচ্তে মাচেৎ গোমকেয়াঃ কলার সাব
কাতে আয়াঃ অড়াঃ সোর হিড় হিড় এ অর আগু কেদেয়া। উনরে সুদীপ বাবু আয়াঃ মাচেৎ ওপরোম এম
কাতেহঁ রেহাই বায় ঞাম লেদা। নওয়া হঁ বাডায় আকানা টুডু পৗরিশ আঁজম সাঁওতে উনি কাউন্সিলার
আরহঁয় গার্জাও এনা- নেশাখোর, মাতাল, সানতাড় জৗতিরেন কোম্বড়ো মাচেৎ এমান তেয়াঃ রড় সিঁড়িচ্
সাঁওতে আরহঁ দাল। দাল দালতে বহঃ ক দাল রচদ্ কেৎ তায়া। এখেন অনা সুমুং দ বাং, দাল গিতিচ্
কাতে কাউন্সিলার পরিতোষ চৌধুরী আচ্রেন আসুল সেতায় লিলকৗও কাদেয়া উনি সুদীপ বাবুওয়াঃ
মায়ামতে গাবাও আকান হড়ম সেন। সেতা গেরতে সুদীপ বাবু আরহঁয় মায়াম ঝির ঝরয়েনায়। উনরে
অঁডেরেন আদম মাচেৎ কো জখম আকান সুদীপ বাবু ওরোম কাতে মালদা মেডিকেল কলেজ এন্ড হসপিটাল
রেকো ভুরতি কেদেয়া।
নোওয়া ঘটন রেনাঃ কডরা রড় দারাম আর কাউন্সিলার পরিতোষ চৌধুরী
সাঁওতে আচ্রেন দলবল কো যাতে সংবিধান রেনাঃ ধারা লেকাতে শাসেৎ কো ঞাম অনা লৗগিৎ হলা
আদিবাসী সংগঠন কো রাঁগাওনা মিছিল তালাতে মালদা শাহার রেনাঃ ৩৪ নং রোড ক জাঁগে দারাম
কেদা।
বাডায় আকানা পছিম বাংলা রেনাঃ আয়মা জিলৗ খন সাঁওতে ঝাড়খন্ড,
উড়িষ্যা খন হঁ হাজার হাজার হড় দোমেল দোমেল সহর সেটের কাতে রাঁগাওনা মিছিল তালাতে গটা
মালদা জিলৗ কো থামগাড়ি লেদা। নোওয়াহঁ ঞেল আকানা বাংমা নোওয়া ঘটন ইদিকাতে আর জাঁহানা
অ-ঘটন আলো সিরজৗঃ অনা লৗইতে দাঃ কামান, টিয়ার গ্যাস সাঁওতে আডি আয়মা গটাং পুলিশ গটায়
গে তেয়ার কো তাঁহেকানা। নোওয়া হঁ বাডায় আকানা বাংমা আরহঁ আডি আয়মা হিজুঃ কান হড়, হররে
পুলিশ আটক কাতে বাংকো বল অচো আকাৎ কোওয়া।
নিৎ আয়মা হড়াঃ মচা রেগে আঁজমঃ কানা- নোওয়া দিশম রেন আদিম হড় হুয় কাতেৎ হঁ আদিবাসী হড় চেতান রেগে নংকান নিরঘিন ঘটন হাঁডে নাঁডে গে ঞেলঃ গঃ কানা। আদিবাসী হড় কো নিশড়ৗও অচোঃ কানা। আদিবাসী তিরলৗ চেতান রেহঁ মিৎ গে ভরম নাসাও লেকান বে-বৗড়িচ্ ঘটন হুয় ইদিঃ কান গেয়া। এনহঁ ঞেলঃ কানা কৗয়ধী কো যথাৎ শাসেৎ বাংকো ঞাম এদা। সুদীপ টুডুওয়াঃ নওয়া ঘটন রেহঁ সৗরিগে কৗয়ধী কো শাসেৎ কো ঞামা থ ? সে আদিবাসী কো দাল আকাদেতে হিঁয়ৗ খালাস কো ঞামা। নোওয়া গে নিৎ ঞেল লৗগিৎ আয়মা হড় কয়ঃরে মেনাঃ আকাৎ কোওয়া। নঁতে নংকান কুকলি হঁ রাকাব কানা নোওয়া পনৎ রে, নোওয়া দিশম রে আদিবাসী কো সৗরিগে নিরাপত্তা রে মেনাঃ আকাৎ কোওয়া ??
.webp)
.webp)
