সিঁগি মাহা রেনাঃ সাকাম ‘চেরেচ্‌ আড়াং’ লেখা- ৫৪

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com ।

তেহেঞা আখড়ারে যাঁহায় কো সেলেদ্‌ আকান- রিলৗমালা মুরমু, ᱥᱩᱵᱩᱫᱤᱭᱟᱹᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ, ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ, ᱠᱤᱥᱠᱤᱱ ᱫ ᱷ ᱟ ᱢ ᱩᱨᱢ ᱩ, ᱥᱨᱤᱠᱟᱱᱛᱚ ᱥᱚᱨᱮᱱ, সেঁগেল মারমার, বাড়তাঙ সরেন, সুচাঁদ হাঁসদা, কানন হাঁসদা, দুগাই টুডু, সনাতন টুডু, বাবলু সরেন, সম্বরি সরেন, সমর লাল টুডু, সীতেন মান্ডি, বিভূতি ভূষন সরেন, নিতাই টুডু, বাবলু সরেন, গাতে টুওয়ৗর, দুলৗড় বিটি ।

রিলৗমালা মুরুমু, ক্লাস- IV
জেলা - পুরুলিয়া

১।।

ᱦᱤᱡᱩᱜ ᱟᱞᱮ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱚᱛᱮ ᱵᱟᱞᱮᱹ
ᱦᱤᱡᱩᱜ ᱟᱞᱮᱹ ᱾

ᱥᱟᱹᱜᱩᱱ ᱥᱟᱹᱨᱫᱤ
ᱢᱚᱱᱮ ᱵᱷᱟᱹᱨᱛᱤ ᱾

ᱡᱟᱹᱨᱩᱵᱽ ᱧᱩᱦᱩᱢ
ᱛᱟᱦᱟᱢ ᱛᱩᱦᱩᱢ ᱾

ᱥᱤᱸᱜᱤᱭ ᱛᱟᱸᱜᱤᱜ
ᱵᱟᱞᱮᱹ ᱵᱟᱹᱜᱤᱜ ᱾

=====oo=====

২।।

ᱟᱞᱮ ᱢᱟ.ᱭ
ᱜᱳᱯᱮᱥᱣᱚᱨ ᱢᱟ.ᱱᱰᱤ

ᱥᱮᱛᱟᱜ ᱛᱚᱨᱟ ᱟᱞᱮ ᱢᱟ.ᱭ
ᱟᱵ ᱦᱩᱛᱩᱢ ᱠᱟᱛᱮ
ᱚᱞᱚᱜ ᱯᱟᱲᱦᱟᱣ ᱫᱩᱲᱩᱵ ᱦᱚᱫᱚᱜ
ᱟ.ᱠᱤᱞ ᱦᱟᱢᱮᱴ ᱡᱟᱛᱮ |

ᱚᱠᱛᱚ ᱨᱮᱭ ᱚᱞᱚᱜ ᱯᱟᱲᱦᱟᱣ
ᱛᱩᱯᱩ ᱯᱷᱟᱨᱪᱟ,ᱡᱚᱢᱟᱭ
ᱥᱩᱨ ᱨᱮᱜᱮ ᱤᱛᱩᱱ ᱟᱥᱲᱟ
ᱳᱰᱳᱠ ᱛᱚᱨᱟ ᱧᱟᱢᱟᱭ |

ᱢᱟᱪᱮᱫ ᱠᱚᱣᱟᱜ ᱠᱟᱛᱷᱟᱭ ᱟ'ᱡᱚᱢ
ᱞᱩᱛᱩᱨ ᱵᱤᱫ ᱠᱟᱛᱮ
ᱛᱟᱭᱚᱢ ᱫᱟᱨᱟᱢ ᱟᱭᱟᱜ ᱰᱟᱦᱟᱨ
ᱢᱟᱨᱥᱟᱞ ᱦᱩᱭᱩᱜ ᱡᱟᱛᱮ |

ᱚ'ᱰᱮ ᱟᱡ ᱨᱮᱱ ᱜᱟᱛᱮ
ᱢᱮᱱᱟᱜ ᱠᱚᱣᱟ ᱥᱟ'ᱜᱮ
ᱢᱤᱫ ᱛᱮ ᱚᱞᱚᱜ ᱯᱟᱲᱦᱟᱣ
ᱪᱮᱫ ᱟᱭ ᱛᱚ'ᱜᱮ |

ᱥᱤᱵᱤᱞ ᱥᱚᱲᱚᱢ ᱨᱚᱲ ᱞᱟ'ᱫᱟ
ᱮᱠᱟᱞ ᱢᱮᱱᱟᱜ ᱛᱟᱭ
ᱥᱩᱠᱷ ᱫᱩᱠᱷ ᱦᱟ.ᱴᱤᱧ ᱛᱟᱞᱟ
ᱚᱠᱛᱚ ᱯᱟᱨᱚᱢ ᱟᱭ |

=====oo=====

৩।।

ᱢᱟᱪᱮᱫ ᱢᱟᱦᱟ ᱫᱤᱥᱟᱹ ᱠᱟᱛᱮ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

ᱥᱮᱯᱴᱮᱢᱵᱚᱨ ᱢᱚᱬᱮ ᱢᱟᱹᱦᱤᱛ
ᱛᱮᱦᱮᱧ ᱢᱟᱥᱮ ᱥᱮᱴᱮᱨᱮᱱ ᱾
ᱨᱟᱹᱥᱠᱟᱹ ᱥᱟᱞᱟᱜ ᱢᱟᱪᱮᱫ ᱢᱟᱦᱟ
ᱫᱮᱵᱚᱱ ᱢᱟᱱᱟᱣᱟ ᱿

ᱢᱟᱪᱮᱫ ᱠᱚᱵᱚᱱ ᱢᱟᱱᱟᱣ ᱠᱚᱣᱟ
ᱚᱞᱚᱜ ᱫᱮᱵᱚᱱ ᱫᱩᱞᱟᱹᱲᱟ ᱾
ᱫᱷᱟᱹᱨᱛᱤ ᱛᱟᱞᱟ ᱢᱟᱪᱮᱫ ᱢᱟᱦᱟ
ᱫᱮᱵᱚᱱ ᱡᱤᱭᱟᱹᱲᱟ ᱿

=====oo=====

৪।।

ᱱᱟᱯᱟᱭ ᱜᱤᱫᱽᱨᱟ.

ᱠᱤᱥᱠᱤᱱᱫᱷᱟ ᱢᱩᱨᱢᱩ

           ᱟᱹᱛᱷᱟᱹᱲᱤ ᱟᱞᱚᱢ ᱛᱟᱯᱟᱢ
          ᱵᱟᱹᱲᱤᱡ   ᱟᱞᱚᱢ ᱢᱮᱱ ᱮᱜᱮᱨ ,
                            ᱛᱚᱵᱮ ᱟᱱᱤᱡ ᱟᱢ
             ᱱᱟᱯᱟᱭ ᱜᱤᱫᱽᱨᱟᱹ ᱢᱮᱛᱟᱢ।

       ᱜᱟᱛᱮ ᱥᱟᱸᱳ ᱟᱞᱚᱢ ᱵᱤᱵᱟᱹᱫ
    ᱟᱢᱟᱜ ᱞᱟᱵ ᱟᱞᱚᱢ ᱧᱮᱞ ᱦᱤᱥᱟᱵ ,
                             ᱛᱚᱵᱮ ᱟᱱᱤᱡ ᱟᱢ
                    ᱡᱚᱛᱚ ᱠᱚ ᱜᱟᱛᱮ ᱠᱟᱢ ।

ᱦᱤᱥᱟᱹ ᱥᱩᱭᱟ. ᱟᱢ ᱟᱞᱚᱢ ᱥᱮᱸᱲᱟᱭ
ᱦᱚᱲ ᱛᱟᱞᱟ ᱟᱞᱚᱢ ᱫᱚᱱ ᱵᱟᱲᱟᱭ ,
ᱛᱚᱵᱮ ᱟᱱᱤᱡ ᱟᱢ
ᱱᱟᱯᱟᱭ ᱜᱤᱫᱽᱨᱟᱹ ᱢᱮᱛᱟᱢ ।

    ᱦᱩᱰᱤᱧ ᱢᱟᱨᱟᱝ ᱟᱞᱚᱢ ᱦᱤᱲᱤᱧ
ᱥᱟᱨᱤ ᱞᱟᱭᱢᱮ ᱟᱢ ᱟᱞᱚᱢ ᱮᱲᱮᱤᱧ ,
                            ᱛᱚᱵᱮ ᱟᱱᱤᱡ ᱟᱢ
                   ᱡᱚᱛᱚ ᱠᱚ ᱜᱟᱛᱮ ᱠᱟᱢ ।

=====oo=====

৫।।
ᱢᱤᱫ ᱠᱤᱥᱟ.ᱲᱟᱜ ᱠᱟ.ᱦᱱᱤ

ᱥᱨᱤᱠᱟᱱᱛᱚ ᱥᱚᱨᱮᱱ

ᱟ.ᱫᱤᱢ ᱥᱟᱱᱛᱟᱲ ᱡᱟᱱᱛᱟᱲ ᱴᱩᱰᱩ
ᱵᱟᱝ ᱮ ᱦᱳᱭ ᱞᱮᱱ ᱨᱩᱥᱤᱠᱟ
ᱚᱱᱟ ᱠᱷᱟᱹᱛᱤᱨ ᱨᱟ.ᱥᱠᱟ. ᱢᱚᱦᱚᱞ
ᱧᱟᱢ ᱠᱮᱫᱟᱭ ᱢᱟᱨᱟᱝ ᱫᱷᱟᱠᱠᱟ᱿

ᱴᱩᱰᱩ ᱠᱚᱲᱟ ᱦᱳᱭ ᱮᱱ ᱛᱟᱭᱟ
        ᱠᱟ.ᱣᱰᱤ ᱨᱮᱱᱟᱜ ᱱᱮᱥᱟ
ᱥᱤᱧ ᱧᱤᱫᱟ.ᱭ ᱵᱷᱟᱵᱱᱟᱜ ᱠᱟᱱᱟ
         ᱪᱤᱠᱟ.ᱭ ᱢᱮᱴᱟᱣ ᱟᱥᱟ᱿

ᱛᱳᱭᱳ ᱧᱩᱛᱩᱢᱟᱱ ᱛᱟᱸᱦᱮ ᱠᱟᱱᱟᱭ
           ᱟ.ᱭᱤᱪ ᱢᱤᱫ ᱜᱟᱛᱮ
ᱥᱟᱵ ᱠᱚ ᱛᱟᱸᱦᱮ ᱫᱷᱤᱨᱤ ᱠᱟᱴᱠᱚᱢ
         ᱟᱭᱟᱜ ᱪᱩᱯᱤ ᱟᱛᱮ᱿

ᱴᱩᱰᱩ ᱠᱚᱲᱟᱭ ᱪᱟᱞᱟᱣ ᱞᱮᱱᱟ
           ᱛᱳᱭᱳ ᱜᱟᱛᱮᱭᱟᱜ ᱚᱲᱟᱜ
ᱟᱢᱲᱟ ᱠᱟᱴᱠᱚᱢ ᱨᱟᱥᱮ ᱡᱚᱢᱛᱮ
            ᱩᱞᱤ ᱫᱟᱜ ᱜᱮ ᱞᱟᱲᱟᱜ᱿

ᱵᱩᱨᱫᱷᱤ ᱫᱤᱥᱟ. ᱰᱷᱮᱨ ᱮᱱ ᱛᱟᱭᱟ
         ᱠᱟᱴᱠᱚᱢ ᱨᱟᱥᱮ ᱡᱚᱢᱛᱮ
ᱤᱫᱤ ᱠᱮᱫᱟᱭ ᱟᱢᱲᱟ ᱟ.ᱴᱤ
          ᱨᱚᱦᱚᱭ ᱞᱟ.ᱜᱤᱫ ᱚᱲᱟᱜ ᱛᱮ᱿
(ᱛᱳᱸᱜᱮ ᱻᱟ...)

=====oo=====

৬।।

মাচেদ্ মাহা

সেঁগেলমারমার

আঁদোড়ঃ কান গটা ভারত মিদ্ টাঙ রাহা
মড়ে সেপ্টেম্বর দ মাচেদ্ মাহা।
আচেদ্ কওয়াঃ আডি রৗসকৗ
মাচেদ্ আতাঙ দারাম
রুমরেক সাজাও দহয়
বাহা বেলুন এমান।
আচেদ্ কদ জহার আকো
চাল আকো কলম
মাচেদ্ কদ সহাগক এমঃ
থুমগেক সলঙ।
জতকোতে মিদ্ সঁগেতে
করাও আক আখড়া
থুতি সেরেঞ এনেচ এমান
হুয়ুঃ নওয়া বাখরা।
মাচেদ্ কদ দুড়ুব দুড়ুব
নওয়াকক ঞেল
আকো নিয়ৗ গিদরৗ কওয়াঃ
তিনৗঃ হেলমেল।
বাহামালাতে সাজাও এ তাঁহেন
সর্বপল্লী রাধাকৃষ্ণন
উইহৗর এয়াক জহার আয়াক
ভারত আয়োরেন ধন।
মাচেদ্ ক লৗইআ নুই পন্ডিতাগ্
জীয়ণ জীবন কাথা
তিনৗঃ গৗখুড় তিনৗঃ মৗহিমান
নুই আগ্ সৗরিয়ৗড় গাথা।
মাচেদ্ ক মেনআ নুই লেকাগে
লাসেরঃ তাপেমা হাতাঙ
আপেয়াঃ এনেম মিদ্ দিন
গটা ভারতক আতাঙ।
রিকৗয় তাবোন পে যতকোতে
লাফাঙ আবোন ভারত
হিসৗসুয়ৗ তাপামকোদ
যতকোতেবন মারত।
রেগেচ্ উরিচ্ যতকোঠেন
পাসনাও আবোন সেচেদ্
হরবোন উদুগৗ জুমিদ্ কাতেদ্
আবো আচেদ্ আর মাচেদ্।
তবেখানগে হুয়ুঃআ
মাচেদ্ মাহা রেনাঃ জস
গটা ধৗরতি দহয়াবোন
গেয়ান তেগে বশ।

=====oo=====

৭।।

জঁডরা

বাড়তাঙ সরেন

জঁডরা অটেজ চেটেপেটে
রাপাঃ লেখানেম
দন দনাতে অটাং পৗসির
আতা লেখানেম।

জঁডরা রাপাঃ খাটার খুটুর
তগজ লেখানেম
জঁডরা আতা রাচাঃ রৗচুঃ
তাপাঃ লেখানেম।

জঁডরা তিকি লুতুয় লুতুয়
তৗবুজ আডি মজ
লৗগুয় পৗগুয় জজম রেদো
দড়হা তেয়েম খজ।

গুণ্ডৗ কাতেঃ সৗতুয় রেদো
সঁধাড় সিবিল গে
লৗডু কাতেঃ জম লেখানেম
লাচ দ বিয়োঃগে।

জঁডরা দাকা মজগে সিবিল
লাগাও লেখান গুড়
জমতেগে বাম ভাগাও গদঃ
লাপেৎ সৗডুর বৗডুর।

জঁডরা লেটো দাড়েয় এমাম

দিনৗম যুদিম জম

হড়মো সাঁওয়ার নাপায় লৗগিৎ

একাল বাচয় কম।

আবো দিশম বাড়গে পেরেচ
জঁডরা তাঁহেলেন
সেদায় বিদৗল রেঙ্গেজ তেতাং
জম বাঞ্চাও লেন ।

=====oo=====

৮।।
চিরচিটিচ

সুচাঁদ হাঁসদা

চিরচিটিচ চিরচিটিচ ,
জমেত কোওয়াম জিনটি পিপড়িচ ,
লেভড়া চাঠা বেডগা লৗটিচ ,
সাবাড় কেতকম কৗটিচ মৗটিচ ৷

বাংদ চালাক বাংদ লেকা ,
বাংদুঞ মেতাম লব ডংকা ,
চেততে আমিঞ তুলৗ জখা ,
সিনৗম আমদ মাগাড় লেকা ৷

দেন বৗগিমে লেভড়া চাঠা ,
জমলে এমাম হাটাঃ হাটাঃ ,
আর বাংখান থেপলে কাটা ,
রৗপুৎ তামৗঞ সামাং ডাটা ৷

=====oo=====

৯।।
উনি বেলা ,ইঞ বেলা

কানন হাঁসদা

পুশিয় মেও কেৎ,সেতায় ভুঃ কেৎ
বাঙ গে থিরোঃকান
সেতা —পুশি, সেতা_ পুশি ঝগড়া,
রাঙ্গাও ঢেরোঃ কান ৷

পুশিয় কয়োগ,মান্ডার মুন্ডুর
ভিতর অড়াঃ গায়াং—গুয়ুং
বাহের রেদঃ লাটাব জাড়াঃ
সেতাঃ মেনায় উয়ুং !

তোওয়া দাকা,হাকো কুটি
আরহো অড়া গুডু
ইঞ দ মেনাঞ মটোঃ মটোঃ
তরচরে লুসু পুন্ডু !

উনি বেলা ,ললো দাকা
ইঞ লৗগিৎ বাসকে জজঃ
লৗলিস তেহঞ ,লৗলিস গেয়াঃ
আজম বেন এ ,গো গো ৷

উনিয়া দো চেৎ কৗমি?
হৗটিং খৗলি ঢের
ইঞ দো মেনাঞ ,সারা ঞিন্দৗ
কুম্বড়ো লাগা ঞির !

উনিই জৗপিৎ ,খডর খডর
বাহরে খন ইঞ আজম
ইঞ দো বেঙ্গেৎ,সারা ঞিন্দৗ
বৗনু আকাৎ জজম !

মাসে মৗনমী বিচৗর পেশে
মিত অড়ারে বাস
ভিতরি বাহরে, অনা খৗতির
বাঙ পুরৗঃ আ আশ ?

হহো কাতে লে দুড়ুব বেনা
পানতে কাতে কাথা
আতো টোলা ,সেতা পুশি
হহো আকলে গাপা !

পুশিয় মেও কেৎ,সেতায় ভু কেৎ
বাঙ কিন থিরোকান
সেতা পুশি, সেতা পুশি
ঝগড়া জপড়াও আকান ৷

=====oo=====

১০।।

কাদাম

দুগাই টুডু

আষাড় চাঁদো কতে গেতো
কাদাম বাহাঃ বাছা,
দারে ডৗররে ঞেলঃ আদ
একাল সাসাং মাছা।

ভাদর বঁগা মাহা তেগে
অনা কাঁয়ডে বেলেঃ,
ঞুরুঃ লৗগিৎ তেদ চাপাদ্‌
গিদ্‌রৗ কদ আলে।

ডাটা কতেলে গের এদা
বুলুং মেসাল গেসে,
ডাংতে তেদ গগ তিয়ৗগ
মেনাঃ কাটকম রাসে।

সেবেল আতে জমাকো দমে
সিড়ুপ কাতে সৗরি,
তাঁহেন জখা খজঃ কানকো
আড়তি থোড়া থুড়ি।

আচগে উনি উতু গদায়
হাকো সঁগে বলে,
জমরে ভালা ভাগে বুজুঃ
দিসৗ দহয় হালে।

=====oo=====

১১।।

গিদরৗ মনে

সনাতন টুডু

অকয় বুঝৗও আলেয়াঃ কাথা
গুরলৗওয়ঃ মনে তালা,
হিরিচ্‌ পৗসির মনে তেহেঞ
সামটাওয়ঃ অকা লেকা।

রৗস্কৗ তেহেঞ আদঃ ঝত
কুচি উমের রেনাঃ,
বাংকো উইহৗর অকয় কহঁ
সুসৗর মনে রেনাঃ।

খিলডু এনেচ্‌ রৗস্কৗ লাঁদা
অকয় উইহৗর তেহেঞ,
আয়ো বাবা আকো লৗগিদ্‌
নিজেরাঃ গেকো সেপেঞ।

আলে লৗগিদ্‌ বৗনুঃ অকতো
আয়ো বাবা কোওয়াঃ,
গিদরৗ সালাঃ খিলডু এনেচ্‌
এদরে বুঝৗও কোওয়া।

=====oo=====

১২।।

তুয়ু

বাবলু সরেন

দিনগে হিজুঃ আলে টলা
সিমে পাঁজা ক
গৗই গড়া,কাডা গড়া
গটায় পাঁজা ক ৷

অকা রেহঁ বাং ঞামতে
রুওয়ৗড় চালাঃ তুয়ু
জম বাংতে হড়ম সানাম
রুওয়ৗ হৗসু হুয়ুঃ ৷

আদ নেতার বায় ঞেলঃ
আলে টলা করে
পাছে আদ বৗনুঃ এয়া
নওয়া দিশম রে ৷৷

=====oo=====

১৩।।
গিদরৗ বৗউলি

সম্বরি সরেন

এ বৗবু হপন বৗবু
আল বৗবু রাঃ
সিম চুপি পাঃ
আম বাবা দয়
সেন আকানা
কাডা চুপি মাঃ ৷৷

=====oo=====

১৪।।

কু়ঁইডি বিলি

সমর লাল টুডু

এ বাবু কুঁইডি বিলি
বই্ খাতা আর কা়লি
জম্ জম্ আডি ভৗলি
জেরেদ্ জেরেদ্ জিউয়ী মৗলি ।

এ বাবু কুঁইডি বিলি
দারে লাতার উনকু চিলি
তেরে তেসে এহের্ জিকি পৗঠুওয়ৗক খৗলি
ক ক সে্ঁড়ায়াক নে এ হৗলি।

এ বাবু কুঁইডি বিলি
হাড়াম মাচেৎ চেৎ কুলি ?
ঞেল আকাপে হাসা ঠিলি
কুলিয়েৎলে আলে ঠেলা ঠিলি ।

এ বাবু কু্ঁইডি বিলি
লৗবিৎ অনা হাসা চিলি
রাপাঃ যতনমে বেড়া তাঁহেন দেলা দেলি
বাংখান দ কাঁড়া লেকাম্ ঝৗলিঃ ।

এ বাবু কুঁইডি বিলি
আডি সড়ম আডি ভৗলি ।
কুঁইডি সুনুম অজঃ লেখান্
হড়ম জৗলি,
দালায়্ দালায়্ হারাঃ জিয়ন কুলি ।

এ বাবু কুইডি বিলি
আলম লেটয় গাডা বৗলি,
জিয়ন দুলখিরেদ আলম্ থৗলিঃ
বাংখান হাপেন দুকেম ঞামা খৗলি ।

=====oo=====

১৫।।

পুসি

সীতেন মাণ্ডি

পুসি পুসি পুসি
হৗকু জমতে কুশি
বাবু সাঁও গাতে কাতে
আলম এড়েয়েয়া জেতে।

আলে বাবুয়াঃ ইতাঃৎ দাকা
আলম জম তায়া
আঙ্গা তরা বেরেৎ কাতে
অনাগে ঞেলায় লাহা।

বাড়ায় খানে উনি
জম আকাদায় পুসি
বাবুয়াঃ দমে রৗগি
বায় মেতামা ভৗগি।

গুডু চুটিয়ৗ সাব কম
খিলডু খিলডু তে
লল তোয়া লে এমামা
মারা়ং বৗটিতে।।

আম দ পুসি আলম চালাঃ
ঞিদৗ হড়াঃ অড়াঃ
বা়ংক কুশিয়াম যত হড়
আমাঃ মেৎ জুলুঃ তে।

=====oo=====

১৬।।
ঢেরদ আলম খেলঃ

বিভূতি ভূষণ সরেন

ভাদর বঁগা সিঁগৗড় বেড়া
দা-দাঃ কানে অৗডি,
জেলেঞ পিডৗরে সানাম গিদৗর
চালাও এদা গৗডি।

রেল গৗডি ধক পক---
লাহা তায়মক তাড়াম,
মচা তেক রড় সাডেয়া
আবগে বাবু হাড়াম।

খেল খেলতে বেড়ায় হৗসুরঃ
তাহুঁ বাংক লাঁগাঃ,
পাড়হাও-জম তায়ম জৗপিদ্
বা-ক দিশৗয় আঁগাঃ।

অলঃ দুড়ুপ অকত্ রেমা
আঁগপ অডকঃ খৗলি,
ঢের খেল বাড়া লেখান
পাড়হাঃ বাং হুয়ু ভৗলি।

আখির জিয়ন নাপায় লৗগিৎ
' ঢেরদ আলম খেলঃ, '
গাতে সঁগে খেলদ খেলমে
বৗড়তি দ আলম মেলঃ ।

=====oo=====

১৭।।

কুবু বুঢি

নিতাই টুডু

বয়েস খৗতির ইঞ দ আডি
কুকুজ আকানাঞ ।
কুকুজ খৗতির ইঞ অনাতে
কুবু বুঢি ক মেতাঞ।

বয়েস লেনখান, উবহঁ পাঁডুঃ
হড় হঁক কুকুজ চাবাঃ।
কুকুজ কাতেৎ তাড়াম জখেজ
হাপেন হাপা গেচম সাবা।

বয়েস খৗতির, পাঁডু খৗতির
জুয়ৗন অক্তঞ উইহৗরাঞ।
পাঁডু উবক ঞেল ঞাম খৗতির
ডাঁহিড়ি বুঢিক মেতাঞ।।

গিদরৗ কক মেতাকওয়া
ডাঁহিড়ি বুঢি কানায়।
কুবু বুঢি সাঁওক ঞাপাম লেনখান
হানতে নাতে ক দৗড় বাড়ায়।।

পাঁডু রেহঞ, কুবু রেহঞ
ভাগে হড়গে কানাঞ।
এজা বাবু, আলপে বতরঃ
ইঞদ আপেয়িজ্ গড়ম বুঢি কানাঞ।

=====oo=====

১৮।।
বতর

বাবলু সরেন

হপন বাবুয় মেনকেদা বাটোল বেনাও আঞপে !
চিলিচয় টুটিয়ে
অকয়চয় বাজাওয়ে
নওয়াগেত বতরদ।

হপন বাবুয় মেনকেদা আঃ-সার বেনাও আঞপে !
চিলিচয় তুঞে
অকয়চয় হাড়ার আয়
নওয়াগেত বতরদ।

হপন বাবুয় মেনকেদা দেশলাই এমৗঞপে !
চিলিচয় রাপাগে
অকারেচয় জেরেদা
নওয়াগেত বতরদ।

=====oo=====

১৯।। 
বৗড় বাহা 
গাতে টুওয়ৗর

আলপে মাগা বৗড় বাহা
               নডে আলেয়াঃ আখড়া
চামফেড় আকান নাপায় চরক
               উমুল অৗডি গোমহেড়া ।
দারে পেরেজ সাকাম আকান
                      ডৗর পেরেজ বাহা
নানা হুনৗর চেঁড়ে নডে
                 আঁদোড় কাঃ ক রাহা ।
কাটিচ কাটিচ গিদরৗ আলে
                   নডে গেলেয় ডেরায়
গুটি টুটি খুড়য়ৗ কৗঠি
                     নডে গেলে সেঁড়ায় ।
দকান দৗনি বাহু জাঁওয়ায়
                       বৗলি অড়াঃ খেল
ইসিন আলে বাসাং আলে
                          উতুয়ালে জেল ।
মামা ভৗগৗন হাতম কুমৗং
                    পেড়া ক'লে হিপিরিঃ
মিৎ ঘৗড়িতে মেলঃ আলে
           আর ঘৗড়িতেলে খৗপৗরিঃ ।
রাঃ লাঁদা রৗসকৗ রমজ
                      তিনৗঃ হরি বিকল
সেতাঃ তিকিন তারাসিঞ
                       বৗনঃ নডে নিচল ।
আলেয়িচগে গাতে কানায়
                          বৗড় বাহা দারে
সেতাঃ সিঁগৗড় চেরেজ লেয়ায়
                       তিনৗঃ হারেফারে ।
উনিয়াঃ হঁ জিউয়ী মেনাঃ
                     হাসোয় লেরে রাগা
সানাম কতে মেনেৎ দলে
                       আল গেপে মাগা ।