আবোওয়াঃ ডিজিটাল ডেস্ক- হলা ১৫ আগস্ট, পুরুলিয়া জেলা আড়ষা থানারেয়াঃ পিস্কৗ পাহাড়ি আতোরে মাঝি বাবা আঃ হহতে ভারত জাকাত মাঝি পারগানা মহল, পছিম বর্ধমান জেলা কুমুট আর জেলা আসেকা আঃ গড়তে মিৎ অল ইতুন (মিশন ২০২৫ অলচিকি) আসড়া উঢৗওয়েনা। বাডায় আকানা অনা আতোরে সাঁগে হড় মেনাঃ কো খৗতিরগে অঁডেদ সানতাড়ী মিডিয়াম অলচিকিতেগে হাপেন অলঃপাড়হাও হোয়োঃআ।
ভারত দিশম ফুরগৗল কাতে ৭৫ সেরমা পুরৗও এন রেহঁ সানতাড়ী মিডিয়াম বিরদৗগাড় দ লেখা ঠঃ গে ঞেল ঞামঃ কানা। নোওয়ারে সরকারাঃ আয়মা লেকান অনহেঁড়া মেনাঃ মেনতে আয়মা আদিবাসী সংগঠন গে নিৎ সরকার বাহাদুর সেনগে তি-কো উদুঃ এদা। মেনখান নঁতে আসেকা, মাঝি পারগানা মহল লেকান আয়মা সংগঠন গে দারায় কান ২০২৫ ভিতরিতে শায়কাড়া হড় গে অলচিকি তেকো অলঃ মা নংকান কৗমিরেকো ছুটৗও আকানা। আর অনকানাঃগে মিৎ কৗমিহরা ঞেল এনা নোওয়া পাহাড়ি আতোরে।
আরহঁ বাডায় আকানা বাংমা অনা আতোরে বিরদৗ গাড় বেরেদ্ রাকাব্ লৗগিৎ রাধারানী হাঁসদা ঞুতুমান অনা আতোরেন মিৎ বৗহুড়িয়ৗ, গিদৗর-পিদৗর খন এহব কাতে আতোরেন সানাম হড় অলচিকি চেদঃ লৗগিৎ উদ্গৗও এ এম আকাৎ কোওয়া। আর অনা উদ্গৗও রেনাঃ জের তেগে আতোরেন সানাম হড় অলচিকি চেচেৎ লৗগিৎ কো লাহা হেচ্ আকানা। অনালেকাতেগে হলা ভারত জাকাত মাঝি পারগানা মহল, পছিম বর্ধমান জেলা কুমুট, জেলা আসেকা আর পাহাড়ি আতো হড়াঃ কুরুমুটুতে হুলগৗরিয়ৗ খেলু মুরমু অল ইতুন আসড়া ( নোওয়াদ প্রস্তাব লেকাতে) ঞুতুমতে মিৎ বিরদৗগাড় কো উঢৗও কেদা। তবে ইতুন আসড়ারেনাঃ ঞুতুম দ তায়ম দারাম আতো মঁড়ে হড় গেকো গটা বুটৗয়া মেনতেগে বাডায় আকানা।
আখড়ারে অলচিকি ইতৗ পারচাও লৗগিৎ পছিম বর্ধমান জেলা কুমুট পাহটা খন আতো মাঝি বাবা আর উনিরেন সাপাপ তিকো তি-রে ‘অল ইতৗ” পুঁথিকো চাল আৎ কোওয়া।
নোওয়া সৗগুনৗন আখড়ারে সেটের কো তাঁহেকানা ভারত জাকাত মাঝি পারগানা মহল, পছিম বর্ধমান জেলা পারগানা বাবা মানতান সিদ্ধার্থ মান্ডি, পুরুলিয়া জেলা আযোদিয়ৗ দিহরি বাবা মানতান শ্যামসুন্দর মান্ডি, পপনৎ গোডেৎ মানতান বিপিন বেশরা,বাঘমুন্ডি মুলুক পারগানা নকুল বাস্কে, আযোদিয়ৗ পীড় পারগানা গুলন মুরমু, মাচেৎ সুপেন হেম্ব্রম,পাহাড়ি আতো মাঝি বাবা প্রেমচাঁদ মান্ডি, আতো সুসৗরিয়ৗ রামচাঁদ মান্ডি, সাঁওতে আয়মা মাঝি হপন আর মাঝি হপন এরাকো।
মুচৗৎরে আখড়া কৗমিহরা পুরৗও কাতেৎ আতোরেন সানাম হড়গে রৗস্কৗ মনেতে অড়াঃ কো রুওয়ৗড় চালাও এনা।
.webp)
.webp)
