আবোওয়াঃ ডিজিটাল ডেস্ক- সানতাড়ী উইকিপিডিয়া পে-সেরমা পুরৗও রেনাঃ কনফারেন্স হলা ৩ আগস্ট ওয়েবনার তালাতে সৗগুন সৗরিয়েনা। নোওয়া গাপালমারাও দ ২ আগস্ট হিলঃ গে হুয়ুঃ রেনাঃ কাথা তাঁহে কানা মেনখান ইলেক্ট্রিকেল আর টেকনিকেল আনাট খৗতির বাং হুয় লেন তাঁহে- মেনতেগে বাডায় আকানা। নোওয়া গাপালমারাও রেনাঃ মুড়ুৎ যঁশ গে তাঁহে কানা বাংমা আরহঁ চেৎ লেকারে সানতাড়ি পৗরসি নিতৗ ডিজিটাল রে কো জগাও জতন দহয়া।
অনাবেগর সানতাড়ী উইকিপিডিয়া আঃ হাপেন দিন রেনাঃ কুকমু চেৎ কানা, আর নিৎ ধৗবিচ্ অনা কুকমু গেবাং তিনৗ গান সৗরিয়াকানা, নিৎ ধৗবিচ্ তিনৗ গান অনলিয়ৗ কো সানতাড়ী উইকিপিডিয়ারেকো অলেৎ কানা, চেৎ লেকারে মিৎ টাং অনলিয়ৗ উইকিপিডিয়ারে অল দাড়েয়াঃ আয় নংকান আয়মা কাথা চেতান গালচিয়ৗ কো লৗই সদর আকাদা।
ওয়েবনার খন গে বাডায়েনা বাংলাদেশ, ভারত আর নেপাল দিশমরেন আয়মা কন্ট্রিবিউটর কো সেলেদ্ লেনা আর ওনকো কো চেৎ লেকাকাতে সানতাড়ী উইকিপিডিয়া রেকো কৗমি কানা। ওনকো সানাম গে উইকিপিডিয়া চেতান আরজাও আকান আকোওয়াঃ উইহৗর-ভাবনা দিশম হড় তালারেকো সদর কেদা।
নোওয়া গাপালমারাও আখড়াদ পোন হৗটিঞ তে হৗটিঞ লেনা যেলেকা- সানতাড়ী উইকিপিডিয়া রেনাঃ জানাম হারাবুরু, উইকিপিডিয়া গেয়ান লাড়াওনা দারায়তে কুড়ি হপন কেটেজঃ রেয়াঃ দাড়ে, সানতাড়ী উইকিপিডিয়া গেয়ান লাড়াওনা রে যুওয়ৗন কো লৗগিদ্ দাও আর সানতাড়ী উইকিপিডিয়া রেনাঃ উইহৗর আর কুকমু। ঞেল আকানা নোওয়া পোনোন হৗটিঞ খনগে কন্ট্রিবিউটর কো আডি নাপায়তে আকোওয়াঃ কাথা কো দিশম হড় তালারে কো শেয়ার আকাদা।
গাপালমারাও তালা খনগে বাডায় এনা বাংমা উইকিপিডিয়া রেনাঃ কৗমি হরা দ ২০১২ সাল খনগে এহব আকানা মেনখান অনাগে ধৗরতি জাকাত রেদ সিকরিতি ঞাম কেদায় ২০১৮ সাল রেনাঃ ২ আগস্ট হিলোঃ। বাডায় আকানা সানতাড়ী উইকিপিডিয়া দ মিৎ রাড়া গেয়ান পুঁথি কানা। উইকিপিডিয়া রেনাঃ অল কদ দাঃতে বাং লহদঃআ, বাং অড়েজঃআ মেনেৎ উইকিপিডিয়া রেনাঃ জতন জগাও দাড়ে দ আডি ঢের গেয়া। নোওয়াহঁ বাডায় আকানা বাংমা নোওয়ারেদ বিন পয়সাতেগে অল হোয়োঃ আ আর বিন পয়সাতেগে গেয়ান হঁ ঞামঃআ।
মুচৗৎ রে সানতাড়ী উইকিপিডিয়া আরহঁ কেটেজ্ লৗগিৎ আরহঁ জেগেত জাকাত রে হাপেন মারাং ঠাঁও এ ঞাম, অনা লৗগিৎ সানাম অনলিয়ৗ কোঠেন সানতাড়ী উইকিপিডিয়ারে অল লৗগিৎ আরদাশ হঁক দহ অটো কাদা সাঁওতে নোওয়া ওয়েবনার তালাতে আয়মা অনলিয়ৗগে হাপেন উইকিপিডিয়ারে অল রেনাঃ রৗস্কৗ কো সদরা মেনতে সানতাড়ী উইকিপিডিয়া চাচালাওয়িয়ৗকো আঁশ কো দহ কেদা।
.webp)
.webp)
