(হুডিঞ মাছা প্রতিবেদন )
মিৎটাং দারে, মিৎটাং জিউয়ী
কিস্কিন্ধ্যা মুরমু
দারে দ মৗনমি জিউয়ী হারাবুরুয়রে সারাবেড়া রেন গাতে। বির বুরু দারে নৗড়ি হৗলি হৗরিয়ৗড় সাকাম তেয়ার
এদায় অক্সিজেন,সাঁহেৎ কাতেব হাতাওয়েদা। সাচারহে রেনাং কার্বন- ডাই- অক্সাইড হাতাও রুওয়ৗড় এদায়। অক্সিজেন, সাঁহেৎ হাতাও কাতে মৗনমি টুঁডৗং কানাব ধৗরতি বসমতারে। অক্সিজেন মেনাঃতে মানওয়া বিরৗদালি হঁ টেকাও মেনাঃ -আ। দারেগে জিউয়ীয় জিওয়েৎ হারায়েৎ কানা। দারে নৗড়ি বেগর মৗনমি জিয়ন অহগে জিয়ৗও কঃআ।
নিরৗয় লাহাসেন লাহায় রেহঁ দারে ঠেনখন ঞামঃ জ-বাহা গেলে-বিলি,আড়াঃ,সাহান- সাকাম, লৗকতিরে বেওহার, এমানতেয়াঃ বেনাও লৗগিৎ কাঠ। কাঠ ঞামঃ কানতে আয়মা লেকান বেওহাররে লাগাঃ কানা। রহয় তাঁহে লেনখান অৎ হাসা খৎ আ,হাসা বায় লে বোহেল অচয়া ,হয় দাঃ জৗপুৎ জৗসতি কায় হুয়ুঃআ, বানভাসি হঁয় টেকাও দারামা। আবহাওয়া হয় দাঃ জৗড়ি রুখিয়ৗ দহয়া। আর হঁ দারে খনগে আয়মা লেকান গুনৗন রেহেৎ সিন্দেৎ তে রোগ আজার লৗগিৎ রান মুরগৗন ঞামঃ কানা। জিওয়েৎ জিয়নরে বানচাও লৗগিতে ইসিন বাসাং সাহান পাতড়া ফুড়ুঃ দাতৗনি দারে খনগে ঞাম উশৗস আকানাবন। কিরিঞ আখরিঞ কাতে হঁ কৗওডি আয় হুয়ুঃ কানা।
নিৎ দিসমরে সাগাল সাগাল মৗনমি বন সাঁগে আকানা , অনকা অৎ হাসা জম ঞুয়াঃ বাং যৗসতি কানা। দিনৗম দিনগে বেওহার লৗগিৎ আয়মা মারাং দারে মাঃ উজৗড় এদা। বির বুরু করেনা দারে কহঁ এতাং চাবাঃ কানা। উমুল গাজাড় জ জৗলি চাবাঃ কানতে বির জিব জিয়ৗলি কহঁ জমা লাগাৎ আতো অড়াঃতেক হিজু কানা। খেৎ বৗদ বৗইহৗড় রেনাং হুড়ু জঁডরা এমান ক দায়নাশ খুতি কাঃ কানা। যৗসতি হুডুর
বিজলি সাঁওতে হয় লল কানা। বৗড়তি সিতুং এদায়,অৗনৗড়ি রোগ আজারতে হড়ম জিউয়ী খিজলৗঃ কানা ।
যাঁহা লেকা দারে নৗড়ি মাঃ উজৗড়ঃ কানা অনকা লেকা দ বাং বৗড়তি কানা। অনাতে দারে চারা রহয় বলয় ইদি লাগাও আ। বাংখান দারে এতাং চাবাঃতে মৗনমি নিরৗয়রে দুখ দারায়া। জিয়ন বিতৗওরে আডি এটকে টঁড়ে রামফা এসেৎ তাবনায় ।
যাও সেরমাগে দারে রহয় হুয়ুঃ আ, আওড়ি অৗথৗড়ি দারে মাঃ গিডি কাঃদ বাং বুগিয়ৗ। সানাম কগে নিজেরাঃ আওতানরে দারে রহয় লৗকতি। দিসম নাগরিয়ৗ লেকাতে দারে রহয় লেকান কৗমিরে সেলেৎ কাতে হারাবুরুয় মাবন । মিৎটাং দারে খান মিৎটাং জিউয়ী বানচাও আ, সাঁগে দারে খান সাঁগে জিবৗ জৗতি জিওয়েৎ তাঁহেনা। যেলেকা নিৎ আবহাওয়া বনদল কানা ,আকাল, বানভৗসি, হুডুর ঠের চেটের ,সাঁহেৎ আনাট, জারাল সিতুংতে অৎ ললঃ কানা ধৗরতি জিব জিউয়ী জিওয়েৎ দহয় খান আরহঁ দারে রহয়রে কুরুমুটু হুয়ুঃআ ।
নিয়ৗ সেরমা 'সাচারহে মাহা' (পরিবেশ দিবস) রেনাং থিম "বাস্ত্ততন্রের পুনরুদ্ধার " ঠাড়গটা আকাদা।
দারে বাং রহয় লেখান, 'বনমহোৎসব', 'বৃক্ষরোপণ সপ্তাহ' মানাও পালাও কাতে যস দ বাংপুরনঃ পুরৗউ- আ। কুরুমুটু আতে সানাম কগে আঁঙ্গিভার হাতাও হুয়ুঃআ ।
দিসৗ দহয়মা ---
" মিৎটাং দারে ,মিৎটাং জিউয়ী
দারে রহয়মে, জিউয়ী বাঞ্চাওমে।"
.webp)
.webp)
