আবোওয়াঃ ডিজিটাল ডেস্কঃ- নিত আদিবাসী কোওয়াঃ বহঃ লল রেনাঃ অজেদ মিৎ টাংগে অ-আদিবাসীকো, আদিবাসী কান- নংকাগে অভিযোগ রাকাব কেদায় ওয়েস্টবেঙ্গল সিডিউল্ড ট্রাইব ওয়েল ফেয়ার অ্যাসোসিয়েশন। অ্যাসোসিয়েশন সদর এদায় বাংমা গটা পনৎরে ফেক এসটি সার্টিফিকেট কোওয়াঃ হিসৗব আদি ঢের বৗড়তি কান তেগে আদিবাসী কো তালারে মিৎ মারাং আনাট সিরজৗও আকানা। সেচেৎ-সাঁওয়ার আর বিধায়ক লেকান ঠাঁও রেহঁ আদিবাসী কোওয়াঃ জুড়ুরে অ-আদিবাসীকো ঞেলঃগঃ কানা। আর অনাতেগে সৗরিন আদিবাসীকো নিশড়ৗও অচোঃকানা। ফেক এসটি সার্টিফিকেট হৗথিয়ৗও কাতে আ-আদিবাসী কো সৗরিন আদিবাসী কোওয়াঃ জমি-জমা হঁক হৗথিয়ৗও দাড়েয়াঃআ মেনতে আয়মা আদিবাসীকো তালারেগে ধাদস বলওয়াকানা।
১৬ আগস্ট খন দুওয়ৗররে সরকার প্রকল্প তালাতে আদিবাসীকো লৗগিৎ কাস্ট সার্টিফিকেট এমঃ রেনাঃ পান্থা এহব আকানা অনাতেহঁ আদিবাসীকো, অ-আদিবাসীকো এসটি সার্টিফিকেট কো অডক দাড়েয়াঃআ মেনতে ধাদস আকানা।
পারমেন অতেমাহা হিলোঃ দক্ষিন দিনাজপুররে বুনিয়াদপুর এলাকারেন পুরপ্রধান অখিল চন্দ্র বর্মন তি-তিতে আয়উমান ৫০ খন ৬০ গটাং তিরলৗ জাল কাস্ট সার্টিফিকেট বেনাও অকতেগে পাকড়াও কেৎ কোওয়ায় মেনতে খবররে সদর আকানা। হলা কলকাতারে ট্রাইবস অ্যাডভাইজারি কমিটি রেনাঃ মিটিং রেহঁ মানতানিয়ৗ মুখিয়ৗমন্ত্রী ঠেন মিৎ বার গটাং বিধায়ক বিধায়িকাকো ফেক এসটি সার্টিফিকেট ইস্যু লৗইতে কাথাকো রাকাব আকাদা। অনা মিটিং রেগে মুখিয়ৗমন্ত্রী সেটের তাঁহেকান মুড়ুৎ সুচিব নোওয়া ইদিকাতে তুনখি-তলাশ লৗগিৎ দায়ভার এ লাদেয়াদেয়া। ফেক এসটি সার্টিফিকেট ইস্যু লৗইতে সানাম আদিবাসী সমাজ আর আদিবাসী রাজঅৗরিরেহঁ মিৎ মারাং আঁদোড় ঞেলঃ কানা মেনতেগে অ্যাসোসিয়েশন এ দাবী আকাদা।
উত্তর দিনাজপুর জেলারেন জেলা শাসনিয়ৗ, রায়গঞ্জ রেন মহকুমা শাসনিয়ৗ, প্রকল্প অধিকর্তা সাঁওতে জেলা কল্যান অধিকর্তা অনগ্রসর শ্রেনি কল্যান আর উপজাতি উন্নয়ন অধিকর্তা সাঁও ঞাপাম রপড় কাতে তি-তিতে স্মারকলিপি কো এম চাল আকাৎ কোওয়া। নোওয়া স্মারকলিপি এম আখড়ারে সেটেরকো তাঁহেকানা উত্তর দিনাজপুর জেলা চাঁগা রেন সভাপতি মানতান বাবলু মার্ডি, সহ-সভাপতি রমেন মার্ডি, সহ-সম্পাদক অনুপ কেরকেট্টা, কোষাধ্যক্ষ কমল মার্ডি, সহ- কোষাধ্যক্ষ মনিকা মার্ডি, রমেশ মুরমু, পাউলুস মুরমু, বিপ্লব সরেন, ভানু হেম্ব্রম, মিঠুন হাঁসদা, দিলীপ টপ্প আর উত্তর দিনাজপুর জেলা উপদেষ্টা মানতান দিলীপ কিস্কু এমানকো।
.webp)
.webp)
