যুগ জিয়ন মুরমু
তেহেঞ ৯ আগস্ট জেগেত আদিবাসী মাহা। আদিবাসী কোঠেন নোওয়া মাহাদ মিৎ গরবান মাহা কানা। অনাতে জেগেত জাকাতরে নোওয়া আদিবাসী মাহা মানাওয়ঃ কানা। নোওয়া লৗগিৎ আয়মা ক্লাব, গাঁওতা,সংগঠন এমান লাহা খনগে সাজাও সাপড়াও কাতেকো তাঁহে কানা। তবে লক ডাউন খৗতির আদম কদ কোভিড রেনাঃ অৗন অৗরি লেকাতে জাঁকজমক আতেগেকো মানাও এদা আদম কদ ওয়েবনার তালাতেহঁ কো মানাও এদা।
বাডায় আকানা জেগেত জাকাতরে নানাহুনৗর জৗতি তালারে আয় উমৗন ৫৫ কোটি আদিবাসী হড় কো বাস এদা। জেগেত রে ৯০ গটাং দিশমরে আদিবাসী কোওয়াঃ লেখা আডি ঢের গেয়া। নোওয়াহঁ বাডায় আকানা বাংমা আদিবাসী কোওয়াঃ ৫ হাজার গটাং ভিনৗ ভিনৗ লায়লেগচার মেনাঃ তাকোওয়া। নোওয়া ভারত দিশম রেহঁ আয় উমৗন ১০ কোটি ৪০ লাখ খনহঁ ঢের আদিবাসী মেনাঃ আকাৎ কোওয়া আর পছিম বাংলারে আয় উমৗন ৬০ লাখ চেতান আদিবাসী মেনাঃ আকাৎ কোওয়া।
জেগেত আদিবাসী মাহা মানাও রেনাঃ মুড়ুৎ যঁশ গে কানা আদিবাসী কো আকোওয়াঃ লায়লেগচার উপরুম এম আর অনা বাঞ্চাও দহয়, হাসা-ভাষা-ধরম রেনাঃ হক-আইদৗর ঞাম, বির-বুরু রেনাঃ আইদৗর আর দিশমরেন নাগৗরিয়ৗ লেকাতে সিক্রিতি ঞাম নংকান নানাহুনৗর দাবী সাব রাকাব।
মেনখান ঞেলঃ গঃ কানা আয়মা অজে আর অনহেঁড়াতে আদিবাসী কো লায়লেগচার, সেচেৎ এমান তেকো তায়ম ইদিকান গেয়া। হাসা-ভাষা-ধরম রেনাঃ হক-আইদৗর ঞাম আর বির-বুরু রেনাঃ আইদৗর ঞাম খন হঁক নিশড়ৗও অচো কানা। মিৎ হিসৗব খন বাডায় আকানা বাংমা ২৬৮০ গটাং আদিবাসী কোওয়াঃ ভাষা নিত ‘ডেঞ্জার জোনরে’ মেনাঃ আকাদা। ১৯০১ খন ২০০০ সাল নোওয়া মিৎ শায় সেরমারে ৬০০ গটাং ভাষা আৎ উতৗর আকানা। নংকাগে চালাও ইদিলেনখান হাপেন আর চেৎ তাঁহেনা। অলগুরু পন্ডেত রঘুনাথ মুরমু আঃ কাথা লেকাতে লৗই গানঃআ- “অল মেনাঃ তামা/ রড় মেনাঃ তামা/ ধরম মেনাঃ তামা/ আমহঁ মেনাম। অলেম আৎ লেরে/ রড়েম আৎ লেরে। ধরমেম আৎলেরে/ আম হঁম আদ”।
অনাতে তেহেঞা মাহারে নোওয়া গে লৗই গঃ আ- জেগেত আদিবাসী মাহা মানাও তালাতে আদিবাসীয়াঃ হক-আইদৗর দিন দিনতে যুদি বাং পুরুন ইদিঃ আ বরং আদ্ ইদিঃ আ এনখান ‘জেগেত আদিবাসী মাহা’দ বাঁখেড় সুমুং গে তাঁহেনা আর সারেচ্ তাঁহেয়েন আদিবাসী কোগে যাঁহা তিন দিন সারেচ্-বারেচ্ কো তাঁহেনা উন দিন কো মানাও ইদিয়া। অনা তায়মদ………।
.webp)
.webp)
