আবোওয়াঃ ডিজিটাল ডেস্ক- হলা ৫ আগস্ট, পুরুলিয়া জেলারেনাঃ রাকাব বির টঠা করকটা আতোরে হুলগৗরিয়ৗ খেলু মুরমু উইহৗর বাথান আর ভারত জাকাত মাঝি পারগানা মহল পুরুলিয়া জেলা কুমুট আঃ কুরুমুটুতে হুলগৗরিয়ৗ খেলু মুরমু ঞুতুম উনুইহৗর চাটান জাঁকজমক আতে উঢৗও এনা। অনা উনুইহৗর চাটান মানত্ সালাঃ উঢৗও কেদায় ভারত জাকাত মাঝি পারগানা মহল পুরুলিয়া জেলা পারগানা বাবা রতনলাল হাঁসদা গোমকে। অনালেকাতে পারমেন হলানা মাহাদ পুরুলিয়া জেলা রেন সানাম আদিবাসী খেরোওয়াল কোঠেন গে মিৎ ঞুম হালাং মাহা লেকাতে নাগামরে খদা তাঁহেনা মেনতেহঁ সেটের লেন দিশুওয়ৗ কো মুদ্রে আয়মা হড়াঃ মচারেগে নংকান কাথা গুরলৗও রাকাব্ এনা।
আর অনা নাগামরেন সৗখি লেকাতে তাঁহেয়েনাকো সেটের তাঁহেলেন ভারত জাকাত মাঝি পারগানা মহল পুরুলিয়া জেলা পারগানা বাবা রতনলাল হাঁসদা, করকটা রেন মাঝিবাবা দুর্গাদাস মুরমু, কাশীপুর বিধান সভারেন বিধায়ক মানতান কমলাকান্ত হাঁসদা, পুরুলিয়া জুওয়ৗন মহলরেন পারসেৎ মানতান রাজেন টুডু, তেলকুপি বারনী সমিতিরেন মাড়তে সুৎরেৎ বেল টুডু, আযোদিয়ৗ বুরু ঘাট পারগানা মানতান শ্যামসুন্দর মান্ডি, লালপুর মহাত্মা গান্ধী কলেজ রেন প্রফেশর শশীকান্ত মুরমু, বাঁকুড়া জেলা গোডেৎ বিপ্লব সরেন, পুরুলিয়া জেলা গোডেৎ গনপতি কিস্কু, পুরুলিয়া জেলা পারানিক বিভাস চন্দ্র হেম্ব্রম, পুরুলিয়া জেলা জগ-পারগানা অলোক হেম্ব্রম, মানভুম জেলারেন খঁদরঁদিয়ৗ, নাগামিয়ৗ,অনলিয়ৗ দিলীপ গোস্বামী,সাহিত্য মন্দির পাথামরেন সাসাপড়াওয়িচ্ জগন্নাথ দত্ত, সময় আর সন্ধিক্ষন পাথামরেন সাসাপড়াওয়িচ্ মাধব চন্দ্র মন্ডল, কেশরগড় এস.কে. বিদ্যাপীঠ রেন মারাং মাচেৎ মানতান প্রবোধ পাল, খেরওয়াল উইহৗর বাথান রেন সুৎরেৎ মানতান মহাবীর মুরমু,যশোদা মুরমু, বিষোদা মুরমু সাঁওতে জেলারেন পারগানা বাবা আর মাঝি হপন কো।
আখড়ারে পুরুলিয়া জেলা পারগানা বাবা রতনলাল হাঁসদা- ফুরগাল লৗড়হৗইরে হুলগৗরিয়ৗ খেলু মুরমু আঃ এনেম ইদিকাতেৎ অড়ে অড়পাৎ এ লৗই সদর কেদা। অনাবেগর নংকান হুলগৗরিয়ৗকো দিশৗকাতেৎ আদিবাসী কোওয়াঃ জুমিৎ রেনাঃ লৗগ্তি মেনাঃ আকাদা মেনতেহঁয় রড় তরা কেদা। তবে অকয়াঃহঁ ঞুতুম বাং সদর কাতেগে পারগানা বাবা কাঁহিশ আড়াংতেয় লৗই আকাদায় বাংমা নংকান সমাজ সুসৗর কৗমিরে লৗই কাতেহঁ মিৎ-বার আদিবাসী রাজঅৗরি নেতা মন্ত্রী কোওয়াঃ গড় বাং ঞামঃ কানা। তবে চেৎ রাজঅৗরি খৗতির আদিবাসি নেতা মন্ত্রী কদ রাজঅৗরি রেনাঃ দলদাস রেকো পরিনত কানা ? -নংকান কুকলিগে দিশম হড় তালারেয় দহ কেদা।
নঁতে কাশীপুর বিধান সভারেন বিধায়ক মানতান কমলাকান্ত হাঁসদা লৗই আকাদায় বাংমা- নঁডে আয়াঃ যাঁহান রাজঅৗরি সে বিধায়ক লেকাতে উপরুম দ মারাং উপরুম দ বাং কান তায়া, আয়াঃ সেটের তাঁহেনদ মিৎ আদিবাসী সানতাড় লেকাতেগে। নোওয়া হঁয় রড় তরা আকাদা বাংমা যাঁহারেগে নংকা আদিবাসী কোওয়াঃ সমাজ সুসৗর কৗমিরে দেলায় ঞামা অঁডেগে সহর সেটেরঃ আয়।
লালপুর মহাত্মা গান্ধী কলেজ রেন প্রফেশর শশীকান্ত মুরমু ফুরগৗল লৗড়হৗইরে হুলগৗরিয়ৗ খেলু মুরমু আঃ এনেম আয়াঃ রড় তালাতে সাব রাকাব আকাদায়। অনা সাঁওতে নোওয়াহঁয় সাব আকাদা বাংমা হুলগৗরিয়ৗ খেলু মুরমু লেকান আরহঁ আয়মা হুলগৗরিয়ৗ গে নাগাম সাকামরে ঠাঁও বাংকো ঞাম আকাদা আর ওনকোওয়াঃ উইহৗর ভাবনাহঁ বাং হাতাও আকানা। অনা ইদিকাতেৎ মানতান মুরমু গোমকে দুখ হঁয় সদর আকাদা। তবে নাহা অকতরেহঁ হুলগৗরিয়ৗ খেলু মুরমুওয়াঃ উইহৗর ভাবনা সামাং রে দহ কাতে নিৎরেন জুওয়ৗন কোঠেন লাহা হিজুঃ লৗগিৎ আরদাশ এ আড়তি তরা কেদা।
আখড়ারে সেটের তাঁহেলেন বাঁকুড়া জেলা গোডেৎ বিপ্লব সরেন লল আড়াংতেগেয় রড় তরা কেদা বাংমা আইদৗর দ কয় তেদো বাং ঞাম আ, লৗড়হৗই তালাতেগে ছিনগৗও হাতাও হোয়োঃআ। আর লৗড়হৗই লৗগিৎ তেদ মাড়াং জুমিদঃ হোয়োঃ আ মেনতেহঁয় বাঁখেড় তরা কেদা।
পুরুলিয়া জুওয়ৗন মহলরেন পারসেৎ মানতান রাজেন টুডু গোমকেয় লৗই তরা কেদায় বাংমা নিৎ হঁ আদিবাসী কো আয়মা সেনতেকো এড়ে অচোঃ কানা। নোওয়া লৗইতে নাহাঃরেন যুওয়ৗন কো লাহা হিজুঃ রেনাঃ কাথায় রড় কেদা। অনা সাঁওতে নোওয়া হঁয় লৗই তরাও আকাদা বাংমা সানামকো জুমিৎ কাতেগে লৗড়হৗই হোয়োঃআ।
আখড়া মুচৗৎ হৗবিচ্ ঞেল আকানা- উন অকতে উনৗঃ দাঃ জৗড়ি রেহঁ সেটের আকান হড় হাঁডে নাঁডে চাতম উমুল উমুল তেহঁ গালচিয়ৗ কোওয়াঃ কাথাকো আঁজম আকাদা আর আখড়া মুচৗৎ-কাতেৎ গে যে যার অড়াঃ কো রুওয়ৗড় এনা। তবে হড় হপনাঃ নংকান জুমিৎ ঞেল কাতেৎ রাজঅৗরি মহল রেহঁ হাঁডে নাঁডে ফাসার ফুসুর এহব গৎ আকানা মেনতেহঁ বাডায় ঞামঃ কানা।
.webp)
.webp)
