বৗইসি লেকাতে ছৗতিক সাঁও বাপ্‌লাতে সানতাড় সমাজ খুতিঃ আ

  অল তালাতে কাথা রাপাচাঃ

 সাতাম- বৗইসি লেকাতে ছৗতিক সাঁও বাপ্‌লাতে সানতাড় সমাজ খুতিঃ আ

 সানতাড় কুড়ি ছৗতিক সাঁও জাঁওয়ায় কাতেৎ সে সানতাড় কড়া ছৗতিক বৗহু আগু কাতেৎ- অকাটাঃ তে বেশি খুতিঃ কানা। যাঁহাটা গে মিৎ পাহটা অল মে-

 

পাহটা- সানতাড় কুড়ি ছৗতিক সাঁও জাঁওয়ায় কাতেৎ  সানতাড় সমাজ বেশি খুতিঃ কানা

 কাঁসাই-কুঁয়ৗরি

  

জোহার-   পোয়লোতে “আবোওয়াঃ কাথা” ডিজিটাল ডেস্ক রে অকত নৗপিত নংকান কাথা রাপাচাঃ সাপড়াও খৗতির সাসাপড়াওকো আডি আডি গুন মান জোহার ইঞ চাল আকোওয়া। জোহার ইঞ চাল আকোওয়া যাঁহায়দ নোওয়া সাকাম বন ঞেল এদা। গৗহির আঁশ ইঞ দহয় এদা- নংকা কাতে রাপাচাঃ তালাতেগে  আবোওয়াঃ সাঁওতা আডি গান গে সাফা আ। আবোরেন নাহাঃ হাপেন দিনরেন বাবু-মৗই তাকো ঠেন ফারচা দিশৗ উদুঃ ডাহার বন চাল দাড়েয়াঃ আ।

বৗইসি য়াঃ কাথা লেকাতে মানাও বাতাও কাতে  ইঞ দঞ মেনা সানতাড় কুড়ি কো ছৗতিক কড়া কোঠেন জাঁওয়ায় অঃ কান তেগে সাঁওতারে আডি মারাং আনাট সিরজৗঃ কানা-

১। সাঁওতারেন কুড়ি হপন দারে লেকাগে সাঁওতারেনাঃ হয়-হিঁসিদ্‌, দাঃ-হাসা, যাঃ-যতন, সহাগ-দুলৗড়তে হারা-বুরুঃ কানায় আর যখন জ-বিলিঃ কানা, উনদ  এটাঃ জৗতি- সাঁতারেন হড়-ক জম জমঃ কানা। মেনদ কৗমি ঞাম যোগ্য কানায় সে চৗকরী-বৗকরী ঞাম কাতে আরজাও এৎ টাকা-পয়সা-হড়ম দাড়েদ সাঁওতারে বাং তাঁহেন কানা। নোওয়াদ সাঁওতারেনাঃ মিৎ মারাং আনাট কান গেয়া।

২। নংকান বে-জৗতি কান কুড়ি হপন রেন আয়ো-বাবা আঃ অ-মত তেগে হোয়োঃ কানা। অনাতে নংকান আয়ো-বাবা সে ঘাঁরঞ্জ রেন সানাম হড়াঃ উনি কুড়ি গিদৗর আঃ কৗই খৗতির মেৎদাঃ জরঃ কানা। সাঁওতারেনাঃ আয়মা কৗমিরে সদর সামাং বাংকো হিজুঃ আ, অনাতে উনকু হড় কঠেন খন হঁ সাঁওতা লাহান্তিরে গড় বায় ঞাম এদা।

৩। আডি অকত সাঁওরেন হড়াঃ রড়-মাগাল, রডচ্‌-রিডেৎ বাংকো সাহাও দাড়েয়াঃ কান খৗতির নংকান ঘাঁরঞ্জরেন হড়-ক এটাঃ সেন-ক মঁহডাঃ কানা। নোওয়াহঁ আর মিৎটাং আনাট কান গেয়া।

৪। নাগাম রেনাঃ সাকাম অটাঃ লেখান বন ঞেলা সাঁওতারেন কুড়ি হপন দ গরব আন গেয়াকো। অনাতেগে হুলগৗরিয়ৗ বাবা তিলকৗ, সিধু-কানু-চাঁদ-ভাইরো, বীর বিরসা এমান এটাঃ এটাঃ জৗতি কোওয়াঃ সাঁওতারেন তিরলৗ কো চেতান নিশড়ৗও নাহাচার ঞেলতে আকোওয়াঃ হড়ম মায়াং লল লেন তাকোওয়া। তিরলৗ কো চেতান ভরম নাশাও বিরুধরে গার্জাও লেনাকো। তাহলে নুকু গরব আন তিরলৗ তেহেঞ কো সাঁওতা বাহরে আ- এনখান হুলগৗরিয়ৗ কোওয়াঃ কুকমু রে কুয়ৗ বাংকো জৎ আ কানাতো? নেঃএ সোরদিন রায়গঞ্জ রেবোন ঞেল আকাদা পো-পোনয়া কুড়ি-হপনাঃ ভরম নাসাও লেৎ তাকোরে সাঁওতারেন হড় রৗগি-কাঁহিশতে রায়গঞ্জ বাজার অকালেকা দাল রৗপুদ্‌ কাতেৎ কো ছিং ছৗতুর লেদা। আদ নংকান তিরলৗ কো বেজাতঃ রে, নাহাঃরেন হুলগৗরিয়ৗ কোওয়াঃ কৗপি বাং থবড়ঃ কানাতো ?

৫। নঁতে সাঁওতারেনাঃ Damage Control লৗগিৎ “জিউয়েৎ ভাঁডান” কৗমি হরাবন সাব এদা। মেনখান নংকান কুড়ি হপন দারায়তে সাঁওতা ধাসাও কৗমি হরা দ লেতাড় গে তাঁহেন কানা। মেনদ সাঁওতা বাহরে কান রেহঁ জৗতি উপরুম (এসটি) দ তাঁহেন কান গেয়া। তায়মতে অনা উপরুম তেগে হাসা-ভিটা-মৗটি খন সানামাঃ আইদৗর গে তাঁহেন কান তায়া। আর নংকা কাতেগে ছৗতিক ঠেন আবোওয়াঃ ভিটা-মৗটি দিন দিনতে চালাঃ কানা। নংকা কাতে আদিবাসী কো নিপুচঃ রেনাঃ মারাং হরা কানা। ঝাড়খন্ড পনৎ রে শায়কাড়া ৮০ হিঁস আদিবাসী কোওয়াঃ ভিটৗ-হাসা তাঁহেকানা। নিত আডিটাং হাসাগে নংকা কাতে ছৗতিক কোওয়াঃ গবলরে চালাও আকানা। লৗই আকো নিতৗ রাঁচি টাউন দ মুন্ডা হড়াঃ জায়গা তাঁহেকানা, নিৎ অঁডে মুন্ডৗ সে আর যাঁহায় আদিবাসী গে দূরবীনতে ঞেল লাগাঃ আ।

মুচৗৎরে মেনাঞ নংকান ছৗতিক বৗহুরেন ‘গিদরৗদ’ আপাৎ- আঃ উপরুম ছৗতিক (জেনারেল) গে হোয়োঃ রেনাঃ কাথা কানা, মেনখান আডি কৌশলতে এসটি সার্টিফিকেট কো ঞাম অচো এৎ কোওয়া। মেনদ খাতা কলমরে নংকান কুড়ি হপন দ ডিভোর্স কুড়ি হপন মেন কাতে পেপার কো সাবমিট এদা। গিদরৗ রেন ভরসা নুই কুড়িগে খান এসটি সার্টিফিকেট আডি আলগাতয় ঞাম এদা।

অনাতেঞ মেনা সানতাড় কুড়ি ছৗতিক ঠেন জাঁওয়ায় কাতেৎ সানতাড় সমাজ রেনাঃ বৗড়তি খুতিঃ কানা।

-জোহার