আবোওয়াঃ ডিজিটাল ডেস্ক- সি. পি. আর. এস. (মানবাধিকার সংগঠন) আর তমলুক রৗস্কৗ মহল আঃ জুগুৎ তে হলা ৪ জুলাই পুরব মিদিনপুর জিলৗ রেনাঃ তমলুক ডাক কর্মী ভবন রে মৗন মানত্ সালাঃ হুলমাহা উনুইহৗর গাপালমারাও আখড়া হুয় পারমেনা।
আখড়ারে সানতাড় হুল রেয়াঃ ভাবনা লৗইতে অড়ে-অড়পাত গালমারাও হোয় এনা মেনতে বাডায় আকানা। ভারত রেনাঃ নাগাম রে ‘সানতাড় হুল’ পোয়লো হুল লেকাতে স্বীকৃতিয় ঞাম মায় সাঁওতে পনৎ রে এন.আই অ্যাক্ট লেকাতে হুলমাহারে ছুটি রেনাঃ দাবী হঁ রাকাব হেচ্ আকানা। অনা বেগর হুল অকতে মানওয়ারী আইদৗর আর নিতঃ মানওয়ৗরী আইদৗর অকালেকা লোসোপোঁডো কানা বিশেষ কায়তে আদিবাসী আইদৗর নোওয়াকো আতে আডি ঠাম ঠাম গাপাল মারাও হুয় আকানা মেনতে বাডায় ঞাম আকানা।
নোওয়া আখড়া রেনাঃ গালমারাওরে কো সেলেৎ লেনা মানতান দেবেন্দ্রনাথ হেম্ব্রম, প্রদীপ দাস, প্রফেশর মঙ্গল নায়েক, প্রফেশর সঞ্জীব কুইলা, ডাঃ সুরেন্দ্রনাথ মান্ডি, মানিক মাইতি, প্রনব মাইতি, তপন জানা, অমূল্য রতন হাঁসদা আর শিবরাম মুরমু এমান এমান গোমকে কো।
