আবোওয়াঃ ডিজিটাল ডেস্ক- সাধু রামচাঁদ মুরমু দ সান্তাড়ী সাঁওহেদ্ রেন মাহাকবি। সান্তাড়ী সাঁওহেদ্ রে উনিয়াঃ অসাম্ভেড় এনেম তায়। এনহঁ উনি লৗইতে আয়মা সাঁওহেদ্ দরদিয়ৗ কোওয়াঃ মনেরেহঁ অকালেকাচং হিদিচ্ ঞেল আকানা। তবে নে-হালেগে পছিম বাংলা পনৎ সরকার পাহটা খন সাধু রামচাঁদ মুরমু ঞুতুম তে ঝাড়গ্রামরে বিশ্ববিদ্যালয় বেনাও রাকাব রেনাঃ কাথা বাখেড় কাতে সাধু রামচাঁদ মুরমু মিৎ মারাং সন্মান এম চাল হোয় এনা মেনতে আয়মা সাঁওহেদ্ দরদিয়ৗ কোগেকো বাতাও আকাদা।
নঁতে ‘সাধু রামচাঁদ মুরমু মেমোরিয়াল ট্রাস্ট অ্যান্ড রিসার্চ সেন্টার’ রেনাঃ তাড়াম ডাহার হঁ এহবেনা। বাডায় আকানা পারমেন ৩ জুলাই ঝাড়গ্রাম জেলা বেলপাহাড়ি ব্লক রেনাঃ শিলদৗ কমিউনিটি হলরে মিৎ সভারে গাপালমারাও কাতে ‘সাধু রামচাঁদ মুরমু মেমোরিয়াল ট্রাস্ট অ্যান্ড রিসার্চ সেন্টার’ ঞুতুমতে মিৎ কুমুট বেনাও রাকাবেনা। অনা নাওয়া ট্রাস্টরেন জেনারেল সেক্রেটারী লেকাতে বাছনাও আকানায় মানতান কার্তিক হাঁসদা। মানতান হাঁসদা লৗই সাডে আকাদায়- সানতাড়ি মাহাকবি সাধু রামচাঁদ মুরমুওয়াঃ সাঁওহেদ্ কৗমি জতন-জগাও-দহ সাঁও সাঁওতে উনিয়াঃ জিয়ন,সাঁওহেদ্ সিরজৗও, দরশন উইহৗর-ভাবনা লৗইতে খঁদরঁদ গে নোওয়া ট্রাস্ট রেনাঃ জঁস। অনা কুমুটরেন তালমা সভাপতি লেকাতে বাছনাও আকানায় সাঁওহেদিয়ৗ পূর্ণচন্দ্র সরেন। অনাবেগর কুমুটরে মেনাঃ আকাৎ কোওয়া সাঁওহেদিয়ৗ কলেন্দ্রনাথ মান্ডি, খঁদরঁদিয়ৗ শচীন মান্ডি, সাঁওতা সুসারিয়ৗ অজিত কুমার সরেন এমানকো।
ইনা হিলোঃ ট্রাস্ট বেনাও লাসাড়হেৎতে বর্ধমান, ঝাড়গ্রাম, পছিম মিদিনপুর, বাঁকুড়া, পুরুলিয়া, হাওড়া, কলকাতা এমন চেৎ ঝাড়খন্ড পনৎ খনহঁ আয়মা মাড়তে কো সেটের লেনা মেনতে বাডায় আকানা।
