আবোওয়াঃ ডিডিটাল ডেস্ক- গটা পছিমবাংলা রেনাঃ সানাম এলাকারেগে ফেক এসটি তেকো পেরেচ্ চাবাঃ কানা। আরহঁ ওনকোওয়াঃ নাহাচার দিনকে দিন বাড়হাও চালাঃ কানা। সেচেৎ, সাঁওয়ার, হর-ডাহার, ঞু-দাঃ এমান করে খন এহব কাতে নানাহুনৗর কৗমি রেনাঃ সুযুগ-সুবিধা খন আডি কৗডরৗই ভাবতে আদিবাসীকো নিশড়ৗও অচোঃ কানা। আদিবাসী কোওয়াঃ সংবিধান রেনাঃ হৗটিঞ জুড়ু ঞাম লৗগিৎ তে আর হক-আইদৗর ঞাম লৗগিৎ তেহঁ আডি কাঠ-কয়লা রাপাঃ হোয়োঃ কানা এমন চেৎ হান্তে-নাতে খন কো লেন অচো কানা। মেনখান মেৎ সামাংরেগে অ-আদিবাসী কো এসটি সার্টিফিকেট ঞাম কাতে আদিবাসী কোওয়াঃ হক-জুড়ুরে সুযুগ-সুবিধা কো হাতাওয়েৎ গেয়া। অনাতে অলঃপাড়হাও সাঁওতে নানাহুনৗর চৗকরি করেহঁ সৗরিন আদিবাসী কদ কো তায়ম আর নিশড়ৗও অচঃকানা।
নোওয়া নিসড়ৗও, নাহাচার আর রডচ্ অচোঃকান বিরুধরে রড়দারাম বাডায় অচো লৗগিৎ গে ওয়েস্টবেঙ্গল সিডিউল্ড ট্রাইব ওয়েল ফেয়ার অ্যাসোসিয়েশন মেদিনীপুর জেলা চাঁগা পাহটা খন হলা ৪ জুলাই কেশিয়াড়ী রেন এম.এল.এ. মানতান পরেশ মুরমু সাঁও ঞাপাম-রপড় এনা কো। এহবরেগে অ্যাসোসিয়েশন পাহটা খন মানতান মুরমু গোমকে বাহা থুপনৗ আর মৗন সাকাম কো চাল আদেয়া। বাডায় আকানা বাংমা বার ঘন্টা খন হঁ চেতান গাপাল মারাও কাতে মানতান মুরমু আশ্বাস এ এমাৎ কোওয়া জে আরহঁ আদিবাসী এম.এল.এ. আর এম.পি. কো সাঁও নোওয়া বাখরাতে গাপালমারাও কাতে বিধানসভারে কাথায় রাকাবা।
নোওয়া ঞাপাম-রপড় আখড়ারে সেটের কো তাঁহেকানা মেদিনীপুর জেলা চাঁগা রেন সভাপতি মানতান বিনয় কৃষ্ণ মান্ডি, সেক্রেটারী জলেশ্বর মুরমু, অ্যাস-সেক্রেটারী মানতান চারু চাঁদ হাঁসদা কোষাধ্যক্ষ উপেন্দ্রনাথ মুরমু, শিক্ষা কর্মাধ্যক্ষা মামনি মান্ডি, রৗসিয়ৗ কো মুদ্রে গনেশ হাঁসদা, ভোলানাথ মান্ডি, সাহেব রাম মান্ডি, অরুন কুমার হাঁসদা, শুভঙ্কর মান্ডি, বিশ্বজিৎ মুরমু, কুনারাম টুডু, কৃষ্ণ হাঁসদা এমান কো।
ঞেলঃ কানা ওয়েস্টবেঙ্গল সিডিউল্ড ট্রাইব ওয়েল ফেয়ার অ্যাসোসিয়েশন ফেক সার্টিফিকেট লৗইতে মিৎ মিৎ তে সানাম আদিবাসী এম.এল.এ. আর এম.পি. কো সাঁও এ ঞাপাম রপড় কানা। বিধায়ক কহঁ আশ্বাস কো এমঃ কানা বাংমা বিধানসভারে নোওয়া ইদিকাতে কাথাকো রাকাবা। তবে চেৎ আদিবাসীকো বিধানসভা অধিবেশন হৗবিচ্ তাঁগি তাঁড়ারেগে তাঁহেন হোয়োঃ তাকোওয়া? কুকলি তাঁহেন কান গেয়া।
