আবোওয়াঃ ডিজিটাল ডেস্ক- আদিবাসী কোঠেন ফেক এসটি সার্টিফিকেট ইস্যু নিৎ হুদ্গৗও রাকাব সেঁগেল লেকান আনাট সিরজৗও আকানা। অ-আদিবাসী কো হানতে নাতে খন এসটি সার্টিফিকেট জোগাড় কাতে ইস্কুল, কলেজ, ইউনিভার্সিটি, মেডিকেল, ইঞ্জিনিয়ারিং, টিচার্স ট্রেনিং সাঁওতে নানাহুনৗর চৗকরি রেহঁ আদিবাসীয়াঃ রাখা দহ জোড়োরে সুজুগ-সুবিধা কো ছিনগৗও হাতাও এদা। অনাতে অলঃ পাড়হাও সেঁড়া কাতেৎ হঁ অনাকো জায়গারে সৗরিন আদিবাসী কো তায়ম অচোঃ কানা আরকো নিশড়ৗও অচোঃ কানা। নংকান নিশড়ৗও আর রডচ্ অচো কান রেনাঃ রড় দারাম বাডায় অচোয় লৗগিৎ গে ওয়েস্ট বেঙ্গল সিডিউল্ড ট্রাইব ওয়েলফেয়ার অ্যাসোসিয়েশন সরাসরি তেহেঞ ৪ জুলাই মিৎ সাঁওতে জমাঃ প্রতিমন্ত্রী জোৎস্না মান্ডি আর বিধায়ক মৃত্যুঞ্জয় মুরমু সাঁও কো ঞাপাম-রপড় এনা।
এহব রেগে অ্যাসোসিয়েশন পাহটা খন প্রতিমন্ত্রী জোৎস্না মান্ডি আর বিধায়ক মৃত্যুঞ্জয় মুরমু বাহা থুপনৗ তে গুন মানাও সারহাও কো চাল আৎ কিনৗ। অনাতায়ম বাঁকুড়া জেলা চাঁগা অ্যাসোসিয়েশন পাহটা খন অলবেল তালাতে স্মারক লিপি হঁক চাল আৎ কিনৗ। বাডায় আকানা ফেক এসটি সার্টিফিকেট ইদিকাতে অ্যাসোসিয়েশন সাঁও আয়মা খন গাপাল মারাও কাতে বানা হড়গে আদিবাসী সাঁও তাঁহেনাকিন আর নোওয়া লৗইতে বিধানসভা রেহঁ কাথাকিন রাকাবা মেনতেগে আশ্বাস কিন এম আকাদা।
নোওয়া ঞাপাম-রপড় আখড়ারে বাঁকুড়া জেলা চাঁগা অ্যাসোসিয়েশন পাহটা খন সেটের কো তাঁহেকানা সহ-সম্পাদক মানতান নিবারন কিস্কু, কোষাধ্যক্ষ মানতান যতীন্দ্রনাথ কিস্কু, রৗসিয়ৗ লেকাতে কানাই লাল মুরমু, অরুন কুমার মান্ডি, বিমল মান্ডি, গোপাল চন্দ্র মুরমু, দিলেশ্বর মান্ডি, লখিন্দর হাঁসদা, মনসুখ মান্ডি আর সহদেব বাস্কে এমান।
