11 July, World Population Day দিসৗ কাতে
ডাঃ সুরেন্দ্রনাথ মান্ডি
ধৗরতি রেনাঃ গুট অত্ হাসা ভিতরিরে সায়কাড়া বার হিঁস গে আবো ভারত দিশম রে মেনাঃ আ। মেনখান অনা সাঁও সাঁওতেগে ধৗরতিরেন গুট হড় লেখা শায়কাড়া গেল তুরুই হিঁস গে আবো ভারত দিশম রে তাকো গিরৗবাস। মিৎটান হিসৗব খন বাডায়ঃ কানা জে, ভারত দিশম ২০২৭ সাল ভিতরিরে চীন দিশম তালম পারম কাতে হড়লেখা লেকাতে পোয়লো উতৗর ঠাঁও এ হামেটা। সাগাল সাগাল মৗনমি কোওয়াঃ নুনৗ চাপ রেয়াঃ কৗউডি-সামাজিয়ৗ রে আয়মা লেকানাঃ এঁটকেটঁড়ে-য় তেয়ারা, বিশেষ কায়তে রেঁগেচ্ আনাট রেবোন পাড়া-আ।
মৗনমি জানাম বৗড় টেকাও দারাম লৗগিৎ আয়মা সেরমা লাহা খন গে আবো দিসম দ লৗগয়ৗপাড়াওরে মেনায়া। হড়ম-সাঁওয়ার আর পুরিবার ভৗলৗই ডিপার্ট হঁ আয়মা লেকাতে মৗনমি জানাম বৗড়, টেকাও দারাম লৗগিৎ চেঁহগাও বাড়হাও কুরকুমুটুয়রে মেনায়া। অনারেয়াঃ মুড়ুৎ মেনেৎ তেয়ার দ – ‘সি –পুরুষ জুদি কিন হোয়োঃ সমঝদার, পুরিকল্পনায়াকিন পুরিবার’ দিশম লাহান্তি লৗগিৎ তে, আঁপড়ে নাপায় তাঁহেন লৗগিৎ তে, কৗউডি-সামাজিয়ৗ উৎনৗও লৗগিৎ তে পুরিবার পুরিকল্পনা, মেনমা – মিৎটান বাংখান বারয়া খন বৗড়তি গিদৗর পিদৗর হেও-হবর জং আন দ বাংখান বাংতেৎ গে। সানাম সরকারি সাঁওয়ার তালমা হাঁসপাতালরে গিদরৗ জানাম টেকাও-দারাম রেনাঃ আয়মা লেকানা পান্থা করেনাঃ পরামেশ, সঁজগ্ সুবিসতা ঞামঃ আ।
২০১১ সাল রেনাঃ সেনসাস লেকাতে ভারত দিশম রেন মৗনমিয়াঃ লেখাদ পেরাই ১২১ কোটি লেকা, জাঁহা দ ধৗরতি জাকাত রেন মৗনমি কোওয়াঃ গুট্ লেখা লেকাতে শায়কাড়া ১৬ হিঁস। ২০০১ সাল খন ২০১১ সাল হৗবিচ্ মৗনমি বৗড়ঃ রেনাঃ হার দ শায়কাড়া ১.৭৬ হিঁস, আর নংকাগে হোয় ইদি লেনখান আবো দিশম নংকানাঃ তে ধৗরতি জাকাত রে সরেশঃ আ, জাঁহারেনাঃ হামালতেৎ গঃ হোয়োঃ তাবোনা ভারত দিশম রেন মিমিৎ মৗনমি কো। হামাল কুর কুরু গঃ খন দ অকয় হঁ রিহৗয় বাংবন ঞামা। মৗনমি জাঁহাতিনৗ বোন বাড়ঃ আ, অনকাগে বাড়ঃ আ কৗমি বাং জুটৗওয়ান হড় কোওয়াঃ লেখা, বৗড়িচ্ শিখনৗৎ, মনে-জিউয়িরে আঁধা-পৗতিয়ৗও এমান এমান আর ঝতম খন বতরানাঃ দ হোয়োঃ কানা- দিশমরে জমাঃ ঞুয়ৗ রেনাঃ আকাল হোয়োঃ আ। নিতঃ ২০২০ সাল রেগে ভারত দিশম রেন মৗনমি কোওয়াঃ লেখা দ ১৩০ কোটিয় পারম গৎ আকাদা। উইহৗর বাড়া লেখান বতর গে আইকাঃ আ, চেৎ হাহাং কার দিন রেবন সেটেরঃ কানা।
মৗনমি জানাম- বৗড় টেকাও দারাম লৗগিৎ তেদ মেনখান ঢের্ টেক্ ঝঁক্ বৗনুঃ আকাদা। বাড়ায় লৗগতিঃ কানা সুমুং নোওয়া লৗগিৎ তে চেৎ চিকৗয় হোয় আবনা আর নোওয়া করেনাঃ পরামেশ সে সঁজক-সুবিসতা কদ ঞামঃ আ স্বাস্থ্য কেন্দ্র, মেনমা হাঁসপাতাল করেগে। নঅ নোওয়াকো পান্থা করেনাঃ কাথা দবন আঁজম আকাৎ গেয়া, জেলেকা- ‘ওরালপিল’, মেনমা আয়ো কুখি ভিতরিরে জ-জৗলি জাতে আল সাবঃ মা রেনাঃ বড়ি, জাঁহাদ জম হোয়োঃ। অনকাগে কোপারটি, কন্ডোম রেনাঃ বেওহার। নোওয়া কদ সরকারি সাঁওয়ার তালমা সে হাঁসপাতাল খন বেগর গনং তেগে ঞামঃ আ নাওয়া বাপলা কিন সি-পুরুষ কো আর ধৗরতি পুরিরে গিদরৗ বাংকো আগু লৗগিদঃ কানা, ওনকোদ নঅ নোওয়া স্থায়ী পান্থা রেনাঃ হঁ দাও ক হাতাও দাড়েয়াঃ আ, অনা কদ হোয়োঃ কানা আয়ো হড় কদ ‘লাইগেসন’, আর বাবা হড় ক খান ‘ভেসেক্ টমি’। নোওয়া বারয়া পান্থা হাতাও সে করাও অচো লৗগিৎ তে খরচ পৗতি মা বাংগে লাগাঃ, বরংচ্ সরকারি অনুদান হঁ ঞামঃ আ। নোওয়াকিন হুডিঞ অপারেশন তে হড়ম রেনাঃ জাঁহান খুতি বাং হোয়োঃ আ। হড়ম’-দাড়ে সাঁওতে, ভুঁপুজৗও দাড়ে হঁ বৗজায় তাঁহেনা।
