সান্তাড় হপন কওয়াঃ হুল ভগ্নাডিখন এহব্‌ কাতে আযোদিয়ৗ বুরু সুতৗনটাঁডি

সান্তাড় হপন কওয়াঃ হুল ভগ্নাডিখন এহব্‌ কাতে আযোদিয়ৗ বুরু সুতৗনটাঁডি

 সতন কুমার সরেন

 

নিতঃ মিৎ মিৎতেবন ঞেললেগে ভগ্নাডিহখন এহবকাতে আযোদিয়ৗ সুতৗন টাঁডি হাবিজ সান্তাড়হপনক চেৎ খাতির ক হুললেদা আর নিতহঁক হুলেৎ কানগেয়া। ভারতদিশম ফুর্গৗল মাড়াং ইংরেজককশাসনেৎ তাঁহেকানা, উনকুদ ভারতরেন আদিবাসীক চেতান আডি রডচ কচলনক চালাওলেৎআ।

 

১৭৯৩ সালরে যখন লর্ড কর্নওয়ালিসদ চিরস্থায়ী বন্দোবস্ত অৗইনএ জারি কেৎখান আদিবাসীক চেতানরে দিন দিনতে রডচকচলন বৗড়তিয়েনা। অনাখৗতির সিপাহী বিদ্রোহ রেয়াঃ মাড়াংরে  ইংরেজ কওয়া বিরুদরে ১৮৫৫ সালরে বর্তমান ঝাড়খন্ড পনত সাহেবগঞ্জ জেলারেয়াঃ ভগ্নাডি আতুরেন সিধু মুরমু আর কানহু মুরমুআঃ আয়ুরতে  ১৮৫৫ সালরেয়াঃ  ৩০ জুন 'হুল' কিন হহলেদা। আদিবাসীকওয়াঃ হক-অৗইদৗর লৗগিদ,সুদখোর মহাজনাঃ রডচ কচলন খন বাঁঞ্চা লৗগিদ, আর মিৎটান স্বাধীন সান্তাড় পনত হুয়ুঃমা নআকগে অনা হুলরেয়া যশদ তাঁহেকানা। 

 

 ১৮৫৫ সাল ৩০ জুন ভগ্নাডিরে হাজার হাজার সান্তাড় হুলগৗরিয়ৗক জিউয়ীক এমলেদা। অনা হুলরে বাড়ায়ঞাম আকানা কড়াহপন সাঁওতে তিরলৗ কওয়াঃহঁ এনেমদ বাংকমা। উনকু মুদরে ফুলো ঝানআঃ ঞুতুম বাং লৗই লেখানগে বাংগানআ।  নআ হুলদ  ১৮৫৫ সাল ৩০ জুনখন  এহবকাতে  ১৮৫৬ সালরেয়াঃ নভেম্বর চাঁদরে মুচেৎ লেনা। সান্তাড়হুলরেয়া সেঁগেল এলাংদ ইংরেজ সরকারা রাজবাখোল হৗবিচ সেনলেনা। অনাতে ইংরেজ সরকারদ  সাঁন্তাড় কওয়াঃ ঝত আনাট ক সঃসেটেজ কাতে ঞেল কেদায় আর উন অক্তরেন ম্যাজিসট্রেট  এডন সাহেবদ সান্তাড়কআঃ রেঁগেজ-রাবাং রেয়াঃকাথায় আঁজমকেদা। সান্তাড় কওয়াঃ মনে ভূলৗউ লৗগিদ বৃটিশ সরকারদ মিৎটৗন স্বাধীন পনত এ ঘোষনা কেদা,যাঁহাদ দৗমিনীকোহ ক সে সান্তালপরগনা ঞুতুমতেক ছৗটিয়ৗরলেদা। ১৮৫৫ সালরে  বৃটিশ সরকারদ আদিবাসীকয়াঃ জমিজায়গা  অ-আদিবাসীক আলক হাতাওদাড়েয়াঃমা অনাতে  SPT Act এ চৗলুকেদা।

 

অনাতে আদিবাসী কওয়াঃ হুলদ কৗটিজ হৗপিদলেন রেঁহ বৃটিশকআঃ রডচকচলনদ বাং কমলেনা। অনাতে সান্তাড় কওয়াঃ  হুল সেঁগেলরেয়াঃ এলাংদ গটা ভারত ডৗহিএনা। বৃটিশ বিরুদরে ভারতীয়কদ আডিক লৗড়হৗই কেদা। মুচেৎরে বৗইবৗইতে বৃটিশকদ নআ দিশমখন দৗড়তেক বাধ্যএনা।  ১৯৪৭ সাল ১৫ আগষ্ট ভারত

 ভারত ফুর্গৗল এনা।

 

 ভারত ফুর্গৗল তায়নম  ১৯৫০সালরে ভারতরেয়াঃ সংবিধান বেনাওএনা। সমাজরেন লাতার গাঁতাক হড়ক লৗগিদ রাখাদহ আইন সংবিধানরে অলমেনাঃ আ। অনাতে  ভারতরেন তপসিলিজাতি আর তপসিলি উপজাতি গাঁতাকরেন হড়ক সরকার পাহটাখন ভেগারতে  সুযোগ-সুবিধাক ঞামমা অলমেনাঃআ। অনাতে ভারতরেয়াঃ লোকসভা ও বিধানসভাকরেহঁ তপঃজাতি আর তপঃউপঃজাতিকরেন হড়ক প্রতিনিধি মেনাঃকআ।  তপঃজাতি,তপঃউপঃজাতি হড়কয়াঃ উৎনৗউ লৗগিদ  আডিরকম পরিকল্পনা হাতাওকাতে উৎনৗউ করেয়াঃ কাথা সংবিধানরে অলমেনাঃআ ।

সংবিধানরে অলমেনাঃ অৗরিলেকাতেগে।  

 

দিশমগুরু শিবুসরেনাঃ উদগৗউতে ঝাড়খন্ড আন্দোলন সে ভিনৗ পনত লৗগিদ  হুল এহবলেনা,হুলতেগে তেহেঞ অলগ ঝাড়খন্ড পনত হুয় আকানা। সংবিধানরেয়াঃ অৗন আরি লেকাতেগে সান্তাড়ক জানাম পৗরশী সংবিধানরেয়া ইরৗল আনাঃথকরে সেলেদঃমা গটাদিশম আঁদোড়ক এহবলেদা। মুচেৎরে সরকার অনামানাওবাতাওতেয় বাধ্যলেনা

 আবওয়াঃ জানাম পৗরশী ২০০৩ সালরে ২২ ডিসেম্বর সংবিধানরেয়াঃ ইরৗল আনাঃ থকরে সেলেদএনা। মেনখান অনা ঞামকাতেহঁ  সান্তাড়কওয়াঃ হুলদ বাং হৗপিদ আকানা।

 

 নিতঃকাথা হুয়ুঃকানা যে ভারতখন বৃটিশক চালাও আকানরেহঁ উনকুওয়াঃ রডচ কচল রেয়া ইতৗদ নআ ভারত দিশমরেক এর অট আকাদা। যেলেকা বৃটিশক আদিবাসীক চেতান  রডচ কচলনক চালাওলেদা ঠিক অনকাগে  আব দিশমরেন হেঁদেহারতা বৃটিশক আব দিশমরে রাজপাটরে দুড়ুপমেনাঃক সান্তাড়কয়াঃ সে আদিবাসী কওয়াঃ হক অৗইদারক রেজরেয়াঃক করুমুটুয়েদা। সংবিধানরে আদিবাসীকয়াঃ অৗনআরিক পাল্টাওকাতে আদিবাসীক হক অৗইদৗরখন অচঃক লাগিদক করুমুটুএদা। তেঁহেঞ ঞেল ঞামঃকানা আদিবাসীক তিনৗঃ কষ্টকাতে বহঃরেয়াঃ উদগৗর দাঃ জাঁগারে জরঃকাতে খেৎ বৗদক বেনাওলেদা।অনাক খেৎ বৗদকহঁ সরকার হামেট এদায়। অনাকরে কলকারখানাই বেনাওএদা। ঞেলঃকানা ভারতরেয়া আডি পনতকরেগে যেলেকা উত্তরপ্রদেশ, মধ্যপ্রদেশ, বিহার, ঝাড়খন্ডে করে হাজারহাজার আদিবাসীক ভিটৗ ছাড়া কানাক। উনকুওয়াঃ হাসাক জোরকাতেক দখলেৎ তাকওয়া,এমনচেৎ যাঁহা যাঁহাকরেক জাঁগেদারামেৎ খান উনকুচেতান গুলিচালাওহঁ তি বাং থারথারাঃ কান তাকওআ।

 

তাহলে ঞেলমা ফুর্গৗল মাড়াং বৃটিশ সরকার যেলেকা আদিবাসীকআঃ অৎ-হাসা জোরকাতেক দখলেৎতাঁহে নেতারহঁ অনা চিতৗরগে ঞেলঞামঃকানা।  এমনচেৎ আদিবাসীক যাঁহা জমি পাট্টাক এমাৎক তাঁহেন অনাহঁ উনকুঠেন খনক রেজ হাতাওএদা। যাঁহাযাঁহাকরে ঞেল ঞামঃকানা নুনৗদিন কষ্ট কাতেকক বেনাওলেদা আকগেক চাষ আগুএদা অনাকহঁ উনকু ঞুতুমতে বাকরেকর্ড কাতাক কানা। মিৎকাথাতে মেনগানঃআ আদিবাসীক জল, জমি, জঙ্গলরেয়াঃ হক অৗদৗরখন অচঃক হুয়ুঃকানা। অনাতে আডি পনত করেগে ঞেলঞামঃকানা আদিবাসী কওয়াঃ গাঁওতাক হুলক এহব আকাদা। যদিও নেতারদ কৗপি তারওয়াড়ে আতেদ বাংক হুলএদা।   সংবিধানরেয়াঃ অৗনআরি মানাও বাতাও কাতেগেক প্রতিবাদ এদা। আদিবাসীক বাঞ্চা লৗগিদক হুলএদা,হক-অৗইদৗর লাগিদক হুলএদা। নিত নিয়ৗঅক্তরে যাঁহাদ বাংমেনলেখানগে বাংগানঃআ।

 

 যেমন পছিমবাংলারেগে আডি যৗসতি ঞেলঞামঃকানা আদিবাসীকআঃ caste certificate অ-আদিাসীক কুডৗম হরতেক ঞামএদা। আর আদিবাসীকওয়াঃ রাখাদহ জুড়ুরে ভাগক বৗইসৗউক এহবআকাদা।  ঞেল ঞামঃ কানা কলেজ, বিশ্ববিদ্যালয় করে ভর্তিরেয়াঃ লিষ্টকরেহঁ আডি সাঁগে অ-আদিবাসীকআঃ ঞুতুম ঞেল ঞামঃ কানা। এমনচেৎ পনত সরকার,কেন্দ্র সরকারাঃ চৗকরী পরীক্ষা করেহঁ উনকু অ-আদিবাসীক আদিবাসীকাতে পরীক্ষারেক দুড়ুপকানা আর  আদিবাসী বেকার গিদৗরকক এড়ে অচঃকানা।  নআক ঞেলকাতে মনেহুয়ুঃকানা যে আদিবাসীকদ ঝত সেনতে মুচেৎ করেয়া মিৎটান ষড়যন্ত্র চালাঃকানা। নআক বিরুদরেহঁ সান্তাড় আদিবাসীকদ থিরবাক তাঁহে আকানা হুলক এহব আকাদা। নআ মুদরে KSSG,পছিমবাংলা আদিবাসী কল্যান সমিতি,ভারতজাকাৎ মাঝি পারগানা মহল এমান এমান গাঁওতাক।

 

 আদিবাসীক সে সান্তাড়ক লৗগিদ যেলেকা তিলকা, সিধু, কানুহু, ফলো ঝান, বৗজৗল এমান হুলগৗরিয়ৗক রডচ কচলন  বিরুদরে যেলেকাক গার্জাওলেনা জিউয়ীক এমলেদা। তিলকৗ, সিধু,কানহু, বৗজৗলতেক সান্তাড় আদিবাসীক তালারে বানুঃকরেহঁ  হাজারহাজার তিলকা,সিধু,কানহু বৗজৗলক জানাম আকানা। বারেবারে হাজার হাজার আদিবাসীক আকওয়াঃ হক-অৗইদৗর লৗগিদক গার্জাআ। তিসহঁ  আদিবাসীকদ বাক থামাও দাড়েয়াকআ।

 আদিবাসীকআঃ লৗড়হৗই ,উলগুলৗন, হুল রেয়াঃদ মুচেৎবৗনুঃআ।

 

তেহেঞ পুরুলিয়ৗরেয়াঃ আযোদিয়ৗরে সরকার  ঠুড়গা পাম্প স্টোরেজ প্রকল্প বেনাওলাগিদতে আযোদিয়ৗ বুরুরেয়া লৗটুলটুৗ দারেক মাঃকাতে আযোদিয়ৗবুরু উজৗড় লৗগিদ এ কুরুমুটুআকাদা। অনাখৗতির দিশমরেন সান্তাড়হড়ক গার্জৗওএদা, হুলসৗইক এহব আকাদা । আরহঁ আযোদিয়ৗরেগে হুল ক এহব আকাদা যাঁহাদ তামাম সান্তাড় জৗতিয়াঃ জৗতিয়ৗরী ঠাঁও সুতৗনটাঁডি আযোদিয়ৗরে কিছু বৗড়িজ মনেয়ান হড় অনাক দখল লৗগিদঃকানা।

 

 সানামকগেবন বাড়ায়া আযোদিয়ৗ সেঁদরা তিনৗঃযুগ যুগখন আবরেন হাপড়ামকক সেঁন্দারা আগুআকাদা, অনাহঁ সরকার আইনকাতে বন্দ লৗগিদঃ কানায়। অঁডেনাঃ সুতৗনটাঁডিরে আবোরেন মাঝি পারগানাক যুগযুগধরে ল বীর বৗইসি ক  দুড়ুপহেজ আকানা,সাঁওতারেয়াঃ বুগিবৗড়িজক তুলৗজখা কাতে অৗনআরিক তলেৎ তাহেন,সাঁওতারেয়াঃ আনাটকক সলহেয়েৎ তাঁহেন। অনকানাঃ জৗতিয়ৗরী ঠাঁও দিকুক আমেট আ,আবওয়াঃ লৗইলাকচার আদঃআ নআদ সানতাড় আদিবাসীক তিসহঁবাংক মানাও বাতাও দাড়েয়াঃ। অনাতে আযোদিয়ৗরেঁহ নআকরেনাঃ বিরুদরে আন্দোড় কুমুট বেরেদ আকানা,আর পুরুলিয়ৗ জুয়ৗন জুমিৎগাঁওতাহঁ নআ ইদিকাতেয় রড়দারাম এদা। অনাতে দেলা হুলগৗরিয়ৗ কক হহয়েদকানা দিশমরেন সান্তাড়হপনক আযোদিয়ৗ বুরুবন বাঁঞ্চাওআ,আবয়াঃ সুতৗনটাঁডিবন বাঁঞ্চাওআ, দে আরহঁবন হুল আ।

 

আদিবাসী সান্তাড়কদ হানে ১৮৫৫ সালরে ভগ্নাডিরে হুলক এহবলেদা নিতঃহঁ সান্তাড়ক পুরুলিয়ৗরেয়াঃ আযোদিয়ৗরে হুল সেঁগেলদ বৗই বৗইতে জুলুঃ এহব আকানা। সান্তাড়কদ দিশম ফুর্গৗল মাড়াংহঁ আকয়াঃ  হক অৗইদার জৗত ধরম বাঁঞ্চাও লৗগিদ তিলকৗ সিধু কানহু ফুলো ঝান ক হুললেদা । নিতঃ সান্তাড় হুলরেয়াঃ ১৬৭ সের্মা হুয় পারমকাতেহঁ ফুর্গৗল দিশমরেন তিলকৗ সিধু কানহু তেকহঁ আযোদিয়ৗরে বুরুরে হুলক  হহয়েদা ।  আযোদিয়ৗ বুরুদেবন বাঞ্চাওআ, সুতৗনটাঁডি বন বাঞ্চাওআ, সান্তাড়াঃ লৗইলাগচার বাবন লটমঅচঃআ সান্তাড়ক তালারে হুলসৗই আড়াং তারকঃকানা,  গটাদিশম রাঁওয়াঃকানা-

 " আযোদিয়ৗরে বৗইরীক মাডারাঃকান
      এভেনঃপেহো আদিবাসীক
        সেতাঃ হিজুঃকান,
             দে এভেনঃ পে”।