(হুডিঞ মাছা কৗহ্নি)
আঁগিভার
আকাশ মুর্মু
"হঁ হঁ ইঞ দ কৗড়মি পে ঞাম আকাদিঞৗ ,চেদপে মনেঞা ইঞা ,হেঁ! লাজাও বাং তাম ,মঁজতে দহ রেনাঃ মুরৗদ বাং তাঁহেন খান দহ কিদিঞাম চেদাঃ?
"মিৎ সাঁহেৎতে পিয়ায় রড় থিরেনতে , রিমিলে রড় কেদা অন্তর রেনাঃ দুক কষ্ট অন্তর রে দাপাল কাতেৎ বৗই বৗইতেয় মেন কেদা" ঠিক গেয়া গো ! ঠিক গেয়া ! ভাড়া অড়াঃরে তাঁহেনগে যুদি বেশেম বুজৗ ,তবে চলো গো ইদি দরা মেয়াঞ।
"রিমিলে বুঝৗও কেদা ,আয়াঃ এঁটকে টঁড়ে ,বেশ বৗড়িজ বুঝৗও লৗগিদ হড়গে বৗনুঃ কোওয়া।
দিশৗ কেদায় মিদ বার চাঁদো মাড়াং রেনাঃ কাথা ,কাথা কাথাতে জানাম আয়োয় মেনলেদা-"হেঁ বেটা হেঁ ! আমদম চৗকরিয়দাসে ,বেশ বৗড়িজেম বুঝৗওইঞ গেয়া ? "কলেজ পাড়হাঃ মিশরৗতে মেনলেদা ,"হেঁ দা নেতার দম রুহেদ গেয়া ! "নতে মিৎ সের্মা আওরি মারেঃ জুরিয় মেনলেদা ,নুকু সাঁওদো অহঞ তাঁহে কঃআ।
নতে কালা নংকা হড় লেকা বাবা হ মেনায়া ? যতনাঃ বুজ কাতে রেহ বায় রড় দাড়েয়াঃ? অকয় পাহটায় রড়া।
অলঃ পাড়হাও সেড়া কাতে ফরেস্ট ডিপার্টমেন্টরেন সাব ইন্সপেক্টর হুই কাতে রেহ ,জীব জিয়ৗলীয় বুঝৗও দাড়েয়াকোওয়া, মেনখান আপনারাঃ ঘারঞ্জ সামটাও দ নিত হঁ বায় দাড়ে আকাদা।
অক্ত দ নিজেরাঃ নিয়ৗম তেগে পারম চালাঃ কানা।
নতে রিমিল হঁ কংসাবতি ডিভিশন রেনাঃ কোয়ার্টার রে মঁজ গে মেনায়া ,কুড়ৗই ক ঞাম সাঁও তেগে জানাম অড়াঃ হয় কুলৗ অক্তরেগে। আচ্ বৗহুয়াঃ খজ হয় পুরৗওয়া রৗস্কৗ মনেতেগে।
এনহো মনেয় ঞাম তাকোয়া অনকা দ বায় বুজৗ ,বুঝৗও আকাদায় কৗউডি বেগর দুলৗড় বৗনুঃ আ সিবিল বৗনুঃ আ।
অকয়াঃ কাথায় আঁজমা ? জানাম আয়োয়াঃ কাথায় আঁজম লেখান এরায় রৗগিঃ আ,এরা হাঃ কাথা আঁজম লেখান জানাম আয়োয় উসৗদঃ আ।
আচলেকাতেদ অহগেয় তাড়াম দাড়েয়াঃ আ।
সের্মা আচুরেনা বাখোলরে ভৗরিয়ৗ আতেৎ নাওয়া হড় ক হেচ এনা।
মেনখান অন্তর রেনাঃ হিংসৗ কৗফৗরি দ সুই আর সুতৗম লেকা সৗগৗই কাতে গে তাঁহেয়ানা।
অন্তর রেনাঃ দুক হবর দহ কাতে রেহঁ মেৎ আর মচারেদ সুক আর রৗস্কৗ গে ঝালকাঃ তায়া।
ডিউটি কহ মঁজগেয় করাও আ।
ঞিদৗ ডিউটি পাড়াওয়েন তায়া , চেদ মনে তেচং অকয় হ বায় সাওলেৎ কোয়া মোটর সাইকেল আতেয় অডকেনা।
আচুরঃ জায়গায় আচুরেনা, ঞেলাঃ জায়গায় ঞেল কেদা।
ডিউটি গৗডি হঁ ঠিক ঠাক গেয়া।
রুওয়ৗড়ঃ অক্ত বীর পারম বাড়ে দারে সুর রেগে হেড লাইট বৗড়িজেন তায়া আদ তিঙ্গু বেগর উপৗয় হঁ বৗনুঃ তায়া সাঁওতে ভোকসেল লাইট আগু হয় হিড়িং আকাদা ,চেদে চিকৗয়া উইহৗর উইহরৗ তেগে জৗপিদ লাঠা লাঠা মেৎ সিগৗরেট রেনাঃ ধুঁগৗতে চেঠায় লৗগিদে রিকৗকেদা । মেনখান অক্ত দ জৗনিচ্ রিমিলাঃ বা়ং তাঁহে কান,।
লাইটার জুল সাঁও তেগে হৗতি শুঁড়রেয় বেধাও এনা। সেতাঃ খবর পাশনাওয়েনা "হৗতি হামলাতে মিৎ ফরেস্ট অফিসারে বঙ্গা তালায়েনা"। ডিপার্টমেন্ট রেনাঃ আন অৗরি লেকা সানাম কৗমি পারমেনা । সানামাঃ সামাং দারাম ঞেল কাতেৎ অৗন অৗরি লেকাতে লৗটু অফিসার ক চৗকরি সাকাম সাঁওতে মুর্মু বাখোল রেনাঃ আংগিভার পিয়ৗ আঃ তি রেকো চাল হটো কাদা ।
