বৗইসি লেকাতে ছৗতিক সাঁও বাপ্‌লাতে সানতাড় সমাজ খুতিঃ আ

 

কাথা রাপাচাঃ

সাতাম- বৗইসি লেকাতে ছৗতিক সাঁও বাপ্‌লাতে সানতাড় সমাজ খুতিঃ আ 

 সানতাড় কুড়ি ছৗতিক সাঁও জাঁওয়ায় কাতেৎ সে সানতাড় কড়া ছৗতিক বৗহু আগু কাতেৎ- অকাটাঃ তে বেশি খুতিঃ কানা। যাঁহাটা গে মিৎ পাহটা অল মে-

পাহটা- সানতাড় কড়া ছৗতিক বৗহু অৗগু কাতে সানতাড় সমাজ বেশি খুতিঃ কানা

রামলাল টুডু

  

জোহার-  সানতাড় সমাজরেয়াঃ অৗন-অৗরিচৗলি, লায়-লাকচার, বিহৗ-বাপলা, ছৗটয়ৗর-ভাঁডান, আচার-বিচৗর, বঁগাবুরু এমানক সানাম সমাজখন যুদৗ আর সরেশ খনহঁ সরেশ গেয়া। নওয়া করোনা আজাররে আবোনাঃ সৗগুন লটাদাঃ বিন জপটেৎতে চাল সেরওয়া লেকাতে তিনৗঃ সরেশ অনাদ পালেন যত কগেবন বুজ তিয়োঃ আকাদা। অনকান সমাজরেন যাঁহায় সানতাড়ক পাড়হাও তেক পনডেৎ আকানরেহঁ সমাজরেয়াঃ স:স: (সামাজিক সচেতনতা) বৗনুঃ তাকোওয়া ; অনকান সানতাড় কড়াকগে ছৗতিক বৗহু অৗগুকাতে সমাজদ বেশিক খুতিয়েদা। আর নংকান বাপলাকদ হাসালালা রেঁগেচ্ মুরুখ কড়া ছৗতিক বৗহুক বাপলা অৗগু আকাৎ কওয়া নংকান বেওরাদ পালেন সবরনাখা গিতিলরে আদ্ সুই পাঁজা লেকাগে। ছৗতিক বৗহু অৗগুদ অলবেলতে অৗকিলান সে আপনার জাঁগাতে তিঁগু কেটেচ্ আন কড়াক মুদরেগে জৗসতি ঞেলঃ কানতে অন্তেগেঞ আৎরেয়েদা।

 

 পোয়লো দ লৗই গানঃআ,ছৗতিক বৗহু বাপলা অৗগু খৗতির আব সমাজরেন কুড়িয়াঃ থৗরিদাকা যায়যুগ লৗগিৎ হিরিজঃআ। বাপলা তায়ম আব সমাজরেয়াঃ সেরওয়া-অৗরিচৗলি,নেয়াম-ধরম,বিহৗ-বাপলা,ছৗটয়ৗর-ভাঁডান,বঁগাবুরু এমানকরে নায়-নেমাচার করাও-ধরাও যতরেগে তাবন অড়াঃ কিমিন সে বৗহু ভরসা। উনি ছৗতিকবৗহু ভরসাতেদ জৗনিচ্ অনাক অকাটাঃ লাকচার-অৗরিচৗলিগে বাং সুসৗর সামটাঃআ। বাতাও কিদৗঞ ইটৗ-সিমিটতে বেনাও দলান অড়াঃ ; এন্তেরেহঁ যাঁহান সৗগুন কৗমি মাড়াং ছঁচ্-ছড়া,গেচ্-গুরিচদ লাগাঃগেয়া। উনি ছৗতিক বৗহু গুরিচ্ জটেৎতে তি বাং শগ্ তায়াত ? হেওয়ামা বৗনুঃগে আদমকদ মেৎতেহঁ বাংক ঞেল আকাদা আবনাঃ লায়-লাকচার অৗরিচৗলি। বাহা-সহরায় বঁগা ঞুতুম ভিতৗর চডর হৗঁডিহঁ জৗনিচ্ অহঁয় দহকেয়া। খানগে বঁগা দেবাসেবা ঞুম-ঞামরে এঁটকে টঁড়ে সিরজৗঃআ। লাজাও আর পৗউরৗ-হৗঁডি শ বেজারতে আতো দিশম হিজুঃ সেনঃক কম ইদিয়া।

 

 অনাতায়ম গিদৗর-পিদৗরক হোয়লেনখান উনকুহঁ আতো-অড়াঃ খন সাহারেক হারাবুরুঃআ। "আয়ো কলেগে পৗহিল বিরদৗগাঢ়"-- কাথালেকাতে জানাম আয়োগে সানতাড় রড় বায় বাডায়খান গিদরৗকহঁ বাংক সেঁড়ায়া। তায়মতে রড় আঁজম ঞাম কাতেরেহঁ বাং পুস্টৗউতে বাংক রড়তে রড় আর অল তাবন আদঃআ।

 

উনকুরেন পাড়হাঃ বৗবু-মৗইতাক "জৗতিয়ৗরি উপরুম সাকাম" (Caste Certificate) তাঁহেন তাকতে আয়মা বিনিডরেগে পোয়লো, দশার,তেসার ঠাঁওক হামেটা সানতাড় ঞুতুমতে ;মেনখান পেপার-টিভিরেন খবরিয়ৗক সানতাড় রড়তে বাংক তেলা রুয়ৗড় দাড়েয়াকআ। আবরেন বঁগা ঞুতুম, অৗরিচৗলি বাং বাডায় কাতেহঁ সানতাড় মেনতে লেখাকাতে, লেখা রেদবন সাঁগেঃ কান রেহঁ তায়মতে সমাজ লাহান্তিরেদ বাংক পান্তে মিদঃআ। উনকু তুলুচ্ হাপেন ভায়াদ্-ভায়াদ্ হিঁসৗ-সুয়ৗ সিরজৗঃ আ।

 

 বৗবু-মৗইক হারালেন তাকখান কোর্টরে বাপলা কাতে মিৎ-বার সোপোর গাতেক পৗর্টি (ভজ) এমকাতেগে সৗগুন কৗমিক সুসৗরা। সানতাড় সমাজরেন মৗঝি,নায়কে,পারানিক,গডেত,আতো মড়েহড়াঃ সাগাড় অৗগু মৗঝি অৗরি যতগে লহজুরি চালাঃ আ। নায়কে বাবাআঃ সুনুম সিঁদুর টিডৗঃ বাদালতে উনদ বাঁম্বড়ে ঠৗকুর বৗনিজ অৗগুকাতে ভিতৗররেহঁ সরস্বতী,লক্ষী, দুর্গৗ এমান এমান বঁগাবুরুক এহবা। ভিতৗরখন আবরেন বঁগাবুরু দক বাহেরঃ আ।

 

 ছৗতিক বৗহু অৗগুখৗতির গুরুগমকেয়াঃ কাথালেকা -- অল,রড়, ধরম, অৗরিচৗলি সানামগে বৗই-বৗইতে আদঃ আ।  উনকুআঃ বংশ মা সানতাড় সমাজখন সৗঁগিঞ চালাঃগে; নংকা- নংকাতে তিনৗঃ পিড়হি সমাজখন ছুডৗরঃ আ অহঁবন লৗইকেয়া ? নংকাতে আবনাঃ সমাজ মুডরুচ্ আজার লেকা মুডরুজঃ তাবনা।

 অনাতেঞ মনেয়া ছৗতিক বৗহু বাপলা অৗগু কাতে সানতাড় সমাজ যতখন জৗসতি খুতিঃ কানা। -জোহার