জুমিৎ দাড়েতে রেচ্‌ অচোলেন হাসা কো দখল রুওয়ৗড় কেদা আদিবাসীকো

আবোওয়াঃ ডিজিটাল ডেস্ক- লৗই গানঃ আ জুমিৎ গে দাড়ে, দাড়েগে ধন। আর নোওয়া জুমিৎ দাড়েতেগে রেচ্‌ অচোলেন হাসা কো দখল রুওয়ৗড় কেদা ফুলো-ঝানো সাঁওতা সুসৗর গাঁওতা। বাডায় আকানা পুরুব বর্ধমান জেলা রেনাঃ সাতগেছিয়া-১ নং গ্রাম পঞ্চায়েৎ রেন উপ প্রধান সঞ্জীব বাঁসফোর আর সাতগেছিয়া স্পোর্টিং ক্লাব রেন কৗমিয়ৗকো বঁগা তালা আকান ধানু মুরমু আঃ বর্গা হাসা কো রেচ্‌ লেৎ হাতাও লেৎ তায়া ।

অনাগে হলা ২৮ জুলাই ফুলো-ঝানো সাঁওতা সুসৗর গাঁওতা আর দিশম আদিবাসী সুসৗর গাঁওতা আঃ কুরুমুটুতে ধানু মুরমু হপন সুদীপ্ত মুরমু লৗগিৎতে দহড়া গারতেকো দখল রুওয়ৗড় কেদা। বাডায় আকানা নোওয়া জুমিৎ গড়রে তাঁহেকানা কো ভারত জাকাত মাঝি পারগানা মহল, আসেকা, সৗরি ধরম বৗইসি, খেরওয়াল জুমিৎ গাঁওতা, মাঝি হপন অর্গানাইজেশন এমান ঞুতুমান গাঁওতা কো। 

নোওয়ারে সেটের কো তাঁহেকানা দিশম আদিবাসী সুসৗর গাঁওতা রেন সেক্রেটারী মানতান লবান হাঁসদা, ফুলো-ঝানো সাঁওতা সুসৗর গাঁওতারেন সেক্রেটারী মানতানিয়ৗ বাসন্তী মান্ডি, ভারত জাকাত মাঝি পারগানা মহল জেলা পারগানা বাবা বিজয় চন্দ্র সরেন, আসেকা রেন ভাইস চেয়ারম্যান রামদাস কিস্কু, সৗরি ধরম বৗইসি খন সমাই কিস্কু এমান।