(হুডিঞ মাছা কৗহ্নি)
হাকোলাৎ
রামলাল টুডু
উনদ দাঁশায়বঁগা। দাশ দ বাপলা তায়ম নাওয়া নাওয়া হিরিয় চালাও আকানা নৗইহৗরতে। সাঁগে বাখোল রেতায় নৗইহৗর। মিৎঘৗড়িচ্ দুড়ুব জিরৗউ তায়ম হানা বাখোল নওয়া বাখোলে হিরি কেৎ কতে লগনগে অড়াঃ রুয়ৗড় কাথায় লৗইপসাঃ আদেয়া হানহারতেৎ । ইনৗ অক্তদ হানহারতেৎ বেগর অকয়হঁ অড়াঃরেদ বাংক তাঁহেকানা। হানহারতেৎ এ লৗইকেদা- সেঁড়াবৗসয়ৗম অক্তে বিন জমতেদ চেকাতেলিঞ বিদৗবেনা জাঁওয়ায় ? নে সুনুম , তোপো হিজুঃবেন। দাকাদ ইসিন আকানা, আবেন তোপো রুয়ৗড়তে চঁদা আকাৎ উতুহঁ ইসিনঃআ ।
দাশ দ মানে মানেতে সুনুম আর গামছা সাব কাতে সোররেয়াঃ গাডাতে গল-গলতে তোপোনে মহডায়েনা। হরধারে খেতখন মিৎটাং কঁগ্ উডৗউ ঞেলতেয় হিদিচ্ এনা ; চেদাঃ কঁগ্ দ খেত তালারেয় তাঁহেকানা ? চালাও কাতেয় ঞেলেৎ কওয়া খেতরে দাঃ আঁজেৎ আকানতে মিৎ ঠেনদ হাকো ক চিলবিলৗঃ কানা। লভ্ বায় সাম্বড়াও দাড়েয়াৎতে মিৎলাৎ গানদয় সাব্ কেৎ কওয়া। অৗরুব্ ফারচা কাতে মুরুৎ সাকামরেয় রেৎ পটম কাৎ কতে তোপোকাতে অড়াঃ এ রুয়ৗড়েনা। হানহারতেৎ এ মেতায়কানা- বারয়া পেয়া হাকো লিঞ সাব্ আকাৎ কওয়া মাসে লাৎ গৎ কাক বেন ।
হানহারতেৎহঁ উনকুদ লাৎ পটম কাতে চুলহৗরেয় খাঁজ কাৎ কতে দাশ দ দাকায় লো আদেয়া। লল চুলহৗরে হাকোহঁ চাঁড়তেক ইসিন এনতে রল্ কাতে চুলহৗ বুটৗরেগেয় রাড়েচ্ হচ আক কানা। থুতি-গালমারাওতে দাশ এমঃ দয় হিড়িঞ আকাদা। দাশ দ দাকায় লাপেৎ এদা আর হাকোলাৎ এ কয়ঃ আঃ কানা। লাজাওতে কয়হঁ বায় কয় দাড়েয়াঃ কানা। অনকান অক্তে আচকাগে মিৎটাং গালমারাও এ ছাঁদাকেদা। হানহারতেৎ এ মেতায়কানা , আঁজমেদাবেন গগ --- তোপোন খন রুয়ৗড় অক্তে হরধারে বৗরুবুটৗ ঠেন মিৎ মারাং জাম্বড়ো লিঞ ঞামলেদেয়া। যেলেকা মটা অনকাগে জেলেঞ ।
---- তিনৗঃ মারাং জাম্বড়ো জাঁওয়ায় ?
দমেগেয় জেলেঞা। নঃঅয় অৗলিঞ ঠেনখন অনে হাকোলাৎ মেনাঃ উনৗঃ জেলেঞদয় হোয়োঃ গেয়া। হাকোলাৎ আঁজমকাতে হানহারতেৎ দয় মেনগৎ কেদা- জারে জারে এ জাঁওয়ায় হাকোলাৎ এমঃ মালিঞ হিড়িঞ আকাৎ ; হাপে হাপে আলবেন বেরেৎ আ। মেনকাতে বুলুং মৗরিচ্ সালাঃ সিপি কাতে দাশয় এমাদেয়া হাকোলাৎ ।
টাটকা বুরধি খৗতির দাশ দ বায় ফাসুড়লেনা "হাকোলাৎ " ।।
