আবোওয়াঃ ডিজিটাল ডেস্ক- আযোদিয়ৗ বুরু আঁজম সাঁওতে তামাম সানতাড়াঃ মেৎরে বুরু সেঁদরা, সুতৗন টাঁডি, ল-বির বৗইসি কাথা কগে ঝালকাও রাকাব গদঃ আ। মেনখান সাঁও সাঁওতে নংকান কাথাহঁ নেবেতার রাকাব হিজুঃ কানা বাংমা সেদায় রেনাঃ আযোদিয়ৗ নাহাঃ উকুর। বাং ঞেলঃআ সেদায় লেকা আযোদিয়ৗ বুরু গাজাড়, বাংকো ঞেল ঞামঃ আ সেদায় লেকা জিব-জিয়ৗলি কো। বা-বার সেরমা ধৗরতি জাকাত করোনা ভাইরাস খৗতির লক ডাউনতে দেশ-দিশম রেন হড় বুরু সেঁদরা হঁ বাংকো হেচ্ দাড়েয়াকাদা। অনাবেগর প্রশাসনিয়ৗ হঁ বুরু বলন মানা গেয়া মেনতে সালকে সাল আইন এ জৗরি আগুয় এদা।
নংকান আয়মা লেকান অজেতে নিৎ আযোদিয়ৗ বুরু লৗইতে চেৎ কাথা গে অকয়াঃ মচারেহঁ বাং আঁজম কানা। সেদায় লেকা আযোদিয়ৗ বুরু লৗইতে অকয়া মচারেহঁ সেরেঞ বাং আঁজম আ, আযোদিয়ৗ বুরু লৗইতে নেবেতার বাং আঁজমা সুয়ুড় গল, রৗস্কৗ পেরেচ্ হাহাল, বাং আঁজমঃ আ টামাক সাডে। নাহাঃ অনলিয়ৗ কো মুদ্রেহঁ আযোদিয়ৗ বুরু লৗইতে মিৎ বার বুরু-বর্নন চিতৗর সাব রাকাব লেন রেহঁ নিতাঃ বুরু-আনাট লৗইতে অনলিয়ৗ কোওয়াঃ কলম ডগতে অনকান চিতৗর বাং ঞেল ঞামঃ কানা। মিৎ কাথাতে লৗই গানঃ আ সেদায় লেকা আযোদিয়ৗ বুরু লৗইতে নেবেতার অনকান চারচাও দ বাং ঞেলঃ গঃ কানা। নিৎ এখেন ঞেলঃ গঃ কানা মিৎ-বার আযোদিয়ৗ বুরু বাঞ্চাও দরদিয়ৗ কোওয়াঃ “ তালা বিররে রাঃ ” লেকা আবস্থা তাকো। কুকলি রাকাব কানা তবে চেৎ সানতাড় কো তালারে আযোদিয়ৗ বুরু রেনাঃ যাঁহা গরব তাঁহে কানা অনাদ বৗই বৗইতেকো হিড়িঞ এদা ? আযোদিয়ৗ বুরু লৗইতে তাঁহেকানা তিনৗ আরিচৗলি, লেগচার-নেমাচার, তিনৗঃ সেরেঞ, তিনৗঃ অনল, তিনৗঃ কৗহনি, গাম কৗহনি এমান এমান। কুকলি রাকাব কানা নিৎ রেন সানতাড় কো মুদ্রে নোওয়া চারচাও কো হিড়িঞ ইদি লেখান ‘খেরওয়াল’ মেনতে উপরুম তাঁহেন তাকোওয়া তো ?
নোওয়া কো দিশ-হুদিশ কাতেগে আযোদিয়ৗ বুরু বাঞ্চাও দরদিয়ৗ কো আযোদিয়ৗ বুরু বাঞ্চাও লৗগিৎ মিৎ জৗরুড়ৗন গাপাল মারাও আখড়া কো দহ আকাদা। বাডায় আকানা গাপা ১১ জুলাই সিঁগৗড় ৭ বাজা খন এহব আ। আর নোওয়া গাপাল মারাও আখড়া দ Arsal bati potob ghanronj নোওয়া ফেসবুক তালাতে সদরঃ আ। নোওয়া গাপাল মারাও আখড়া সানাম কো ঞেল লৗগিৎ আরদাশ হঁক দহ আকাদা।
নোওয়া গাপাল মারাও আখড়ারে সেলেদ্ কো তাঁহেন কানা মানতান গুলান মুরমু, মানতান সুপেন হেম্ব্রম, মানতান শ্যামসুন্দর মান্ডি, মানতান রাজেন টুডু আর প্রফেশর শশীকান্ত মুরমু।
বাডায় আকানা গাপাল মারাও আখড়া তালাতে আযোদিয়ৗ বুরু রেনাঃ নিতৗঃ চেৎ আনাট, ঠুড়গৗ পাওয়ার প্রজেক্ট হুয় লেনখান আদিবাসী সান্তাড় কোওয়া তিনৗঃ লাভ সে, চেৎ খুতি হুয় দাড়েয়াঃআ, নোওয়া মাড়াং পাওয়ার প্রজেক্ট খন আদিবাসী সান্তাড় কোওয়া তিনৗ লাভ সে চেৎ খুতি হুয় আকানা, দাঃ-হাসা-বির-বুরু চেৎ লেকারে বাঞ্চাও দহ হোয়ো আঃ আর বির-বুরু আইন এমান নংকান সাতাম ইদিকাতেৎ গেকো গালচ্ আ মেনতে বাডায় আকানা।
