(হুডিঞ কৗহ্নি)
আম দিশৗতে
আকাশ মুরমু
"জয় হিন্দ ,বন্দেমাতরম ,ভারত মাতা কি! জয় ",গাদেল হড়াঃ কোরাসতে বাহাগাড় আতু দ কাল কালাঃ কানা। হড় আর হড় ,উনাঃ হড়াঃ সাডে,"সেরমা মুর্মু অমর রহে ,অমর রহে ! ভারত মাতা কি ! জয় "।কুলহি রিপেচিরেৎ হড় সামাংরে চালাঃ কান INDIAN ARMY আঃ গৗডি বৗই বৗইতে গাইড ইদিয়েদায় স্টেট পুলিশাঃ গৗডি, বাঁক পারমেনা নুলকুপ সেটেরেনা,অনা পরেগে বারয়া হাসা অড়াঃ,কুলহি সেন দেয়া আকাদ অড়াঃ দ টিন তে দালব আকাদ বাংলা অড়াঃ কানা , তালামালা দুয়ৗর রে বললেন খান গে লেঙ্গা পাহটা খাপরা অড়াঃ ,ঠিক অনা উল্টৗরেগে ভিৎ খন দালব আঁড়গ আকাদ বুসুব সৗড়িম ,যাহারেদ গৗই ডাঁঙ্গরি মেরম ক দহ কোওয়া ,সামাং বাড়গে সেন মাৎ বাতাতে এসেৎ আকাদ হু্ডিঞ ঘারঞ্জরেগে সেরমা মুর্মু আঃ জানাম ভিটৗ।
বাহা সাজাও গৗডি খন জিওয়ি বৗতি ইড়িচ আকান সেরমা মুরমু আঃ কফিন ছাটকা রে বল সাঁওতেগে আপাতাঃ জিওয়ি রে জাওরা আকান মেৎ দাঃ ঝারনা গাডা লেকা লিঙ্গিয়েনা ,গরবে বুঝৗও রেহঁ সুক্ কুকমু রেনাঃ বেনাও পাকা দালান সামাংরে লাঁদুড়ঃ ,সাফাগেয় ঞেল ঞাম কেদা । আঁজম আকাদ হিলঃ খন গে জানাম আয়ো আঃ মেৎ দাঃ ঝারনা গাডা লেকা লিঙ্গিন কানা, চেঠাঃ খান গে কড়াম চেটাঃ আতেয় হমরেদা "বাঞ খজলেদা বেটা পাকা দালান ! বাঞ খজ লেদা বেটা জিল দাকা তোয়া দাহে ! অকা জনম রেনাঃ পাপ কুড়ৗয়েম সং আদিঞৗ চাঁদো ! যাহাম খজ কেয়া অনাঞ এমাম কেয়া ,এনহ বেটা তিঞ দ রুওয়ৗড় কায়মে, রুওয়ৗড় কায়মে ! ইঞ হঁ তাঁগিঞ মে, ইঞ হঁঞ চালাঃ আ , ইঞ বাখান চিকৗম তাঁহেনা বাবা, চিকৗম তাঁহেনা "। আড়াং বন্ধয়েন তায়া ,সুরসুপুর হড় ক সাহাও দাড়ে ক এমায় কানা।
নঁতে হুডিঞ মৗইয়াঃ রাঃ হমর গটা ছাটকাগে থির থারেনা , ছাটকা রে হুডিং পিন জালাই গিডি রেহ সাডে আঁজমঃ আ। জানাম আয়োয়াঃ মেৎ দাঃ বায় জদ দাড়েয়াদ রেহঁ ধৗরতি আয়ো বানচাও খৗতির বৗইরি কোওয়াঃ সেঁগেল টুটিতে তে জিওয়ি বৗতি ইড়িজেন তায়া বারগেল পে সের্মা উমের রে। ফরমালিটি ক পুরুনেনতে জায়জুগ লৗগিদ বৗগিয়াদায় জানাম ভিটৗ সাঁওতে নোয়া ধুড়ি ধৗরতি। মেনখান হড় ক হিড়িঞ রেহঁ ধৗরতি আয়ো খদা দহ কেদায় উনিয়াঃ বীর কাথা সোনা আখর তে।
সিরজনিয়ৗ আঃ অল পুথিরে অকয়াঃ অকা চরিৎ অকয়ে মেন কেয়া? স্টেট সরকার মা সাদের মিশরৗ চৗকরি কাগজে সাব আদেয়া। মেনখান বাজার হানা সা ঝারনাবেড়া আতুরেন পিয়ো মৗইয়ৗঃ মডঃমডঃ লঃ কান জিওয়ি সেঁগেল অকয়ে ইড়িজ তায়া,ঝারনা গাডা লেকা লিঁগিন কান মেৎ দাঃ চিকৗতে হাওয়েদঃ তায়া। টিভি রে খবর ঞেল খনগে পৗতিয়ৗও বাং হেজ আকান তায়া ,মেনখান সৗরিয়াঃ দ এড়েয় মেতাঃ আ চিকৗতে। দিশৗয়ায় বারে বারে সেদায় রপড় কাথা,ঞেলায় ঘানে ঘানে মারে মেসেজ , ফোটো গ্যালারিরে ফোটো। সাব রাকাবায় সেল ফোন পালে সেরমা হাঃ কল গে হেজ এনা ,হুনৗং রপড় রপড়তেয় মেতায় কানা ,তিকিন তারাসিঞ নিচল বেড়া আম সাঁও ঞাপামঃইঞ চালাঃ আ,আপে গাডা ধারে ,নেঁডা কাথা আলম হিড়িঞা হোয়সে ! মেসকজ লাঁন্দা কাতেৎ পিয়োয় মেন তাঁহেদ , ইঞ দঞ অহকেয়া,আয়োয় রুহেদা। আর হঁয় দিশৗয়া সারপ্রাইজ এমঃ কাথা ,হুনৗং কুকমু তাঁহে কানা ফৗগুন বোঙ্গা রেনাঃ সৗগুন দিন। মেনখান নংকান সারপ্রাইজেয় ঞামা নোয়া দ ভাবনাতেহঁ বায় ভাবনালেনা। তিরে হরঃ আদে তাঁহে রুপৗ চুড়ি সাব কাতেৎ মেৎ রেনাঃ মেৎ দাঃ আরহ সিড্গির আঁড়গয়েন তায়। হানা নাওয়া উইহৗরতে হড়মো লুহুজুরি চাবায়েন তায়া ,উনিদ হাসপাতালরেক ভর্তি কেদেয়া। চেঠা এনায়, সের্মা আচুরেনা।
নঁতে গাঁওতা কড়াক সেরমা দিশৗতে গরবতে আতু বলঃরে আয়া মুঠৗন ক বৗইসাও আকাদা। হান্তে সরেন বাখোলরে পিয়ো মৗই লৗগিদ পে়ড়া ক দারামেদ কোওয়া,হেজ এনায় জিয়ৗড় কিস্কু ! ব্যাঙ্গালোররেয় তাঁহেনা লৗটু ইঞ্জিনিয়ার কানায় ,বি. এস.সি পাশ চরক পিয়ো ঞেলতেগেয় কুশিয়েনা। কাথা ক মাড়াং কেদা ,মেনখান পিয়ো মৗই গেয় বাং কেদা। আডি ক বুঝৗও কেদেয়া ,বাং বেগর চেৎ গে বায় মেন লেদা। চিকৗতেয় হিড়িঞা সিয়াচেন চেতান রেনাঃ সেলফি ফোটো ,গটাগেত মেশা মেনাঃ তায়া সেরমা হাঃ সৗরি দুলৗড়। সরেন বাখোলরেন সাদের হপনরা গ বাবা দাদা হিলি সাদের বয়হা অকয় হঁ বাকো জোর লেদেয়া।
সেরমা হাঃ মেন কাথাগে নিত আয়াঃ তাড়াম ডাহার ,"সাঁওতারে তাঁহে কাতেদ নাসে রেহঁ সাঁওতা দ সুসৗর মে ,দাডেঃ খানিঞ হাপেন দিনরে রেগেঁজ অড়েজ গরিব দুখিরেন গিদৗর পিদৗর কঞ শিখনৗৎ কোওয়া ,মিটাং স্কুলেঞ বেনাওয়া অঁডে আমেম পাড়হাও কোয়া ",নোওয়া কাথা ক উনদ পিয়ো বায় কুশিয়াঃ তাঁহে , ভেনতা কাতেয় মেন তাঁহে "আর্মি বৗগিমে , social worker গে বেনাঃ মে "। সেরমা লাঁন্দা কাতেৎ কাথায় বদল তাঁহে । মেনখান নিৎ দ নোওয়া মিটাংগে দিশৗ তায় ,সেরমা যাহা কুকমুয় ঞেল লেদা অনায় পূরুন তায়া । আপাৎ সাঁও গালমারাও কাতেৎ খবরে ভেজা কেদা বাহাগাড় আতু মঁড়ে হড় সাঁওতে সেরমা অড়াঃ রেহঁ । সের্মা আচুর তেগে সেরমা হাঃ মুঠৗন তায়োমরে বেনাও রাকাবেনা স্কুল। গিদরৗ ক ভুরতিয়েনা ,আতুরেন অলঃ কড়াকড়ি ক গড় আয়া। সের্মা আচুর সাঁওতে আয়মা গে লৗটু স্কুল ক চালাঃ কানা আরহঁ নাওয়াতেক ভুরতিঃ কানা । কাথা পাশনাও আকানা আয়মা হড়ক গড় আয়া। সেরমা হাঃ কুকমুয় পুরুন আকাদা, নোওয়া দিশৗতেগে পিয়ো নিৎ হঁ কুশি রৗস্কৗ তেগে জিয়নে খান্ডাওয়েদা।
