আবোওয়া ডিজিটাল ডেস্ক- হলা ১৭ জুলাই বাঁকুড়া জিলৗ আফগারী পুলিশ মিৎ বার আদিবাসী হড় আতোরে চুওয়ৗন পৗউরৗ বিরুধরে তুনখি-তলাশ কো চালাও কেদা মেনতে বাডায় আকানা। মিৎ-বার অড়াঃরেদ পৗউরৗ কো ঞাম লেৎতে কো দুল গিডি বাড়াও আকাৎ তাকোওয়া।
নোওয়া তুনখি-তলাশ ইদিকাতে শোস্যালমিডিয়ারে হড় তালারে বার-পে রকম কাথা রাকাব হেচ্ এনা। মিৎ হৗটিঞ দক মেমেন কানা বাংমা পুলিশাঃ নংকান কৗমি হরা আরহঁ লাহা খন লৗগ্তি তাঁহে কানা। বিলম কাতেহঁ আফগারী দপতর নংকান কৗমি হরারেয় আঁড়গ আকানা নোওয়াদ সমাজ চেতাওনা রেনাঃ গে নাপায় চিনহৗ কানা মেনতেকো মনেয়াকাদা। চেদাঃ সে ওনকো কোওয়াঃ মেনদ নোওয়া চুওয়ৗন পৗউরৗ খৗতির আয়মা তিরলৗ গে জিয়ন রেনাঃ তালামালা রেগেকো রাঁডিঃ কানা। আডিগান বাবু-মৗই তাকো কৗটিচ্ রেগেকো টুওয়ৗরঃ কানা। অনবেগর চুওয়ৗন পৗউরৗ খৗতির গে আয়মা পৗঠুওয়ৗ কোওয়াঃ অলঃ জিয়ন তালা হররেগে কেচেদঃ কান তাকোওয়া। নংকান আয়মা কাথাগেকো সাব রাকাব আকাদা।
নঁতে আদম কদ কো মেমেন কানা বাংমা সানতাড় আতোরেগে হোয়ঃ কানতেগে তেহেঞ পুলিশ নোওয়াকো ঞেল ঞাম এদা মেনখান হাঁডে-নাঁডে হর ধারে করে উনাঃ উনাঃ রঙিন পৗউরৗ দকান মেনাঃ আকাদা অনাদ চেদাঃ বাংকো বনদ দাড়েয়াঃ কানা? উনদ আফগারী পুলিশ অকারেকো তাঁহেন কানা? অনাকঁহ বনদ রেনাঃ লৗগতি মেনাঃ আকাদা মেনতে কো মনেয়াকাদা।
তবে আয়মা হড় গে নংকান কৗমি হরা ঞেলতে বাঁকুড়া জিলৗ আফগারী পুলিশ কো সারহাও আকাৎ কোওয়া। অনা সাঁওতে নিত আতো আতো জুয়ৗ এনেচ্ আডি ঢের বৗড়তি আকানা, অনা সেনহঁ পুলিশ নজর কো এম লেখান নাপায় কঃআ মেনতে আয়মা হড়গেকো লৗই সদর আকাদা।
.webp)
