নংকানাঃ বিনিড পান্থা আর সেচেৎ রেয়াঃ অৗন অৗরিগে রেঁগেজ গিদৗর কয়াঃ আখির জিয়নরে জাঁগেদারামে সির্জৗউ এদা
সতন কুমার সরেন
হলা ২০/৭/২০২১ পছিমবাংলা মধ্যশিক্ষা পর্ষদদ ২০২১ সালেরেয়াঃ মাধ্যমিক বিনিড রেয়াঃ অর্জয় উছৗন কেদা। অনারে ঞেল এনা গুট নাম্বার ৭০০ ভিতিররে ৬৯৭ নাম্বার ঞামকাতে ৭৯ গটাং পাঠুয়ৗ পোয়লো ঠাঁও কো হামেট আকাদা। আর এমনি পাশমা যাঁহা তিনৗঃ ফরম্ ক পেরেজ লেদা ঝতগেক পাশ কাৎ কআ। মানে ফেলদ মিৎটাংহঁ বাং। আডি হাহাড়াঃ, যাঁহাদ পছিমবাংলা মধ্যশিক্ষা পর্ষদ নাগামে সির্জৗউ কেদা। যাঁহাদ নআ ভারত দিশমরেদ জৗনিজ আদ অনকা অর্জদ অকা বিনিড রেঁহ বাং হুয় আকানা।
সানাম গেবন বাডায়া নেশদ কোরোনা আজার খৗতির বিনিড বাং হুয়লেনা। অনাতে পর্ষদে ঠাড়গটাকেদা যে নুকু গিদৗরাঃ নাইন ক্লাসরেয়া বিনিডরেয়াঃ অর্জ চেতানরেগে নআ মাধ্যমিকরেয়াঃ অর্জদ করাও হুয়ুঃআ। অনাতে পনতরেয়াঃ স্কুলকগে দায়ীত্বক ঞামকেদা উনকু গিদৗরাঃ নাইন ক্লাসরেয়াঃ নম্বর ভেজা। পর্ষদ আঃ হুকুম লেকাতেগে ঝত স্কুল নম্বরক কোলকেদা। চেৎলেকা নম্বর ক ভেজাকেদা সানামকবন বুঝৗউঞাম দাড়েয়াঃ কানগেয়া। অনাতে পনতরেন সানাম হাই স্কুলকরেন মাচেৎ কদ সারহাও লেকানাঃ গেক কৗমি আকাদা। উনকুদ পর্ষদ চেতানরেদ চেৎহঁ মেমেন রেয়াঃদ বৗনুঃ তাকআ। পনতরে ৭৯ গটাং পাঠুয়ৗ পৈল ধাপক আমেট কেদা। নআদ পনতরেয়াঃ মিৎ নাগাম,আর ঝতগে পাশ ।
নিতঃ কুকলি হিজুঃকানা নুকু গিদৗরক নংকাকাতে আরহঁ তায়নমসেন বাক পিছলৗ কাককানা তো? চেদাঃসে কোনো বিনিডগে বাং হুয়লেনা,বিনৗঃ বিনিডতেগে খৗচলৗঃ খৗচলৗঃ নম্বরক ঞামকেদা। আর গিদৗরক সাঁওতে গিদৗররেন আয়োবাবা কহঁ ঢাক লেকাক ফুলৗউ গৎ আকানা। মেনখান তুনখি-তলাস কাতে ঞেল লেখান বাড়ায় ঞামঃআ যে নআ বিনিডরেক পাশকেদ প্রায় ২৫% গিদৗরগে আকয়াঃ ঞুতুম সে ঠিকানা ভৗগিলেকাতে ইংরেজীতে বাক অল দাড়েয়াআ। পাড়হাওমা আডি সৗগিঞ রেয়াঃ কাথা। আর নতেদ খৗচলাঃ খৗচলৗ নাম্বারক ঞাম কেদা। জিউনরেয়াঃ পৈল বিনিডরে নংকাকাতে পাশকাক, নুকুগিদৗর আখিররে তিনৗঃঝৗলক সেন দাড়েয়াঃ আ কুকলি হিজুঃকানা। উচ্চমাধ্যমিক রেয়াঃ গানাডিক পারমদাড়েয়াঃ ত ? চেদাঃসে নআ থকরেন গিদৗরদ প্রায় ঝতহড়গে রেঁগেজ অরেজ অড়াঃরেন,আতু-অড়াঃরেন গিদৗর কানাক,মিৎধৗউতে পাশকেৎক বাজার-শাহাররেন গিদৗরসাঁও নাম্বার লেকাতে মৗনদ মিৎ গেতাকআ। নাম্বার লেকাতেগে হাঁ উচ্চমাধ্যমিকরেক ভর্তিআ। উচ্চমাধ্যমিক রেয়াঃ যা সিলেবাস তাতে নুকুমা থগে বাক ঞাম।
কুকলি হিজুঃকানা নুকুগিদৗর বিনিড এমকাতে উচ্চমাধ্যমিক রেয়াঃ গানাডিক দন পারমকেয়া ত ? সে অঁডেগে অলঃজিউনদ মুচেদঃ তাকয়া
? মাধ্যমিক পর্ষদ আঃ নআ বিনিডরেয়াঃ পান্থাগে জৗনিজচং রেঁগেজ অরেজ অড়াঃরেন গিদৗরক আখিররে কাড়াং কাড়াং ঞুতৗৎরে বৗয় ঠেলাউ গিডি কাককানা ত? আর অৗনআরিমাত সানামাঃগে উনকু বাবুক হেমাল অড়াঃরে দুড়ুপ কাতেক বেনাওএদা।
আকরেন গিদৗর পিদৗরমাত বেসরকারী ভৗগিভৗগি স্কুলকরেক পাড়হাও হেৎকআ। রেঁগেজ অরেজ হড়াঃমা অনা দাড়েমা বৗনুঃতাক ,বুলুং কিরিঞ লৗগিদ পুইষৗ বাং জুটৗউ আককানা,চিকৗতে প্রাইভেট সে বেসরকারী করেদক পাড়হাও দাড়েয়া আকয়া।
.webp)
.webp)
