গুলন চন্দ্র মুরমু,পুরুলিয়া:- বাঘমুন্ডী রেঞ্জ অফিসার আলমগীর হক্ আঃ, হলা ৭ জুলাই আচ্কাগে বদলি ঞেলতে আযোদিয়ৗ রেন আদিবাসী হড়াঃ মনেরে দুখ চিতৗর ঞেল এনা। আলমগীর হক্ বদলি কাতে পুরুলিয়া টাউন তে আর উনি বদলতে মনোজ কুমার মল্লয় হেচ্ এনা মেনতে বাডায় আকানা।
বাডায় আকানা দিনকালম গে ২০২০ সালরেনাঃ জুন চাঁদরে আলমগীর হক্ বাঘমুন্ডি রেঞ্জ অফিসার লেকাতে বাহাল লেনায়। অনাতায়ম খনগে এলাকারেন
আদিবাসী সানতাড় কো সাঁওতে গৗহির সৗগৗই হঁ ঞেল গৎ লেনা। রেঞ্জার সাহেব হঁ আদিবাসী সান্তাড়াঃ দা্ঃ হাসা, বির-বুরু রেনাঃ আইদৗর দহ লৗগিৎ কৗমি রেনাঃ কুরুমুটু হঁয় এহব
গৎ লেদা। মেনখান মিৎ সেরমা তেগে নংকান মিৎ ভৗগি অফিসার আঃ আচ্কা বদলি ঞেলতে আযোদিয়ৗ বুরু হড় ঠেন আয়মা কুকলি রাকাব গৎ আকানা।
বাডায় আকানা নে-হালেগে
ভারত জাকাত মাঝি পারগানা মহল পুরুলিয়া জেলা কুমুট পাহটা খন বাঘমুন্ডী রেঞ্জ অফিসার ঠেন বামনি ফলস্ রে অ-আদিবাসী কোওয়াঃ
দকান-পাট রেনাঃ রমরমা ঞেলতে অলবেল তালাতে অভিযোগ ক বাডায় অচো লেদেয়া। মাঝি পারগানা
মহলাঃ দাবী লেকাতে তাঁহেকানা বাংমা বামনি ফলস্ এলাকারে আদিবাসী বেগর অকয়হঁ
রুজি-রজগার আলক দাড়েয়ামা। বনাধিকার আইন লেকাতে রেঞ্জ অফিসার মাঝি পারগানা মহলাঃ অনা দাবীয় মানাও বাতাও লেদা।
তবে চেৎ অনা রেনাঃ গে মাশুল লেখা হুয় এন তায়া বাঘমুন্ডী রেঞ্জ অফিসার আলমগীর হক্ আঃ ? আযোদিয়ৗ রেন আদিবাসী হড় ঠেন নিৎ নংকান কুকলি গে রাকাব হিজুঃ কানা। কুকলি
রাকাব কান তাকোওয়া তবে চেৎ আদিবাসী সানতাড় কোওয়াঃ ভৗলৗই কৗমি খৗতির গে নংকান কুড়ৗই এ ঞাম কেদা? আরহঁ কুকলি রাকাব কানা তবে চেৎ আদিবাসী সানতাড়
কোওয়াঃ ভৗলৗই কৗমি বাং কো ঞেল সাহাও দাড়েয়াৎ তেগে হক্ সাহেব আটুপৗটু ক বদলি কেদেয়া পুরুলিয়া টাউনতে?
আচ্কাগে চেদাঃ বাঘমুন্ডী রেঞ্জ অফিসার আলমগীর হক্ সাহেব বদলি হুয় এনা অনা কুকলি হঁক রাকাব আকাদা। তবে প্রশাশন সেন গে কৗটুব ক উদুঃ এদা আযোদিয়ৗ বুরু হড় দ।
