(হুডিঞ মাছা কৗহ্নি)
হুল
সেতাঃ পিয়ৗং পায়াং দারোগা মহেশলাল দত্ত দ সান্তাল কৗইদিকো ভাগলপুর জেহেল তেয় মহন্ডা আকাৎ কোওয়া। উনি সাঁওতে মেনায়া সুদখোর মহাজন কেনারাম ভগত। কৗইদি লেকাতে মেনাঃক্ কোওয়া, গোরভু , হাড়মা আর উনিরেন হপন চৗমপৗয় আরহঁ সাঁওতে মিৎবার হড়। আডি উসৗরা সেটেরঃ হোয়োঃ আ। ওনা আসতে জোর মাছাকো লাহা চালাঃ কানা ।
আচকাগে পাঁচ কৗঠিয়ৗ রেয়াঃ বাড়ে বুটৗ ডাহার রে দুঁঙ্গুত দুঙ্গুত হড় ডাহার। রেত্ তেপেৎ কো এসেত্ আকাৎ , ঞেল কাতে দারোগা দয় আসবাসাও এনা আর কেনারাম দয় লুপুচ্ লুপুচ্ এনা। নিত দ পাসেচ্ চেৎ চ হোয়োঃ। এনহঁ ওনকো তালা বল ইদি কাতে, কৗইদি নিয়ৗকিন লাহা চালাঃ কানা। দারোগা মহেশলাল দত্ত আর কেনারাম ভগত দ বাড়ে দারে বুটৗরে দুড়ুপ্ আকান বারয়া যুওয়ৗন কড়ারে নজর পাড়াওএনা। আদ দারোগা য়ে মেন গৎ কেদা , "এ য়া নন্ডে চেৎ পে চেকায়েদা। বাডায়াপে , দেশদ্রোহী মেনতেঞ এরেস্ট দাড়েয়াপেয়া ।" ওন্ডে জারোওয়া আকান হড়কো মুদরে মিৎ হড়ে মেন কেদা , "এ য়া সেতা রাজ সামাং রে মানত উদুগমে। এনতে নিয়ৗ লাহা অকয় হঁ সেতা বাকো মেন আকাওদেয়া। আদ আরহঁ দারোগায় মেনকেদা ,"আবেন দ অকয় য়া? "উনকিন যুওয়ৗন কড়া কিন মেন কেদা , " ইঞ দ সিদু , ইঞ দ কানহু " আদ দারোগা মহেশলাল দত্ত দয় মেন কেদা , " আলিঞাঃক্ ডাহার আড়াঃক্ কাতালিঞ পে , আর নন্ডে ভিড় ভাঙ্গাও পে। উনরে সিদু - কানহু কিন মেন কেদা , "পৌহিল রে কৗয়দি আড়াঃ কাকো মে , এনতে ওনকো দ বিন দোষ তেম সাপ্ আকা্ৎ কোওয়া।" মেনখান দারোগা দ কৗইদি আড়াঃ বায় লৗগিদঃ কান তাঁহেনা। আর ওনা ঞেল কাতে ওঁন্ডে জারোওয়া আকান হড়গে ওনকো কৗইদি রাড়াকো এহপ্ এন খান দারোগায় মেনকেদা ," চেলে আপে দ সরকার চেতান হাঁতপে লাগাওয়া ? " আপে সানাম দ জেল রেপে সাড়াওঃক্আ । " অনা কাথা আজ্ঁম কাতে হড়কো দ আডিকো লাঁন্দা কেদা। আর মিৎ হড়ে মেন কেদা, "ঞেলেয়ৗঞ সরকার বাহাদুর উনৗঃ হড় তল লৗগিৎ অকারে আছা বাবেরে ঞামা।"
কৗয়দি ক রাড়ায়েৎকো অকতে রে গোরভু মাঝি দ যতখন তায়ম উতৗরকো রাড়া কেদেয়া। উনি দ কেনারাম ভগত চেতান রে আডি এদরে তাঁহেকান তায়া। এনতে বিন দোষ তেয়ে ফাসাও লেদেয়া। আর ঞেলেমে রাড়া ঞামগৎ কেৎ সাঁওতে মিৎ হড়াঃ কৗপি রেচ্ কাতে উনি কেনারাম আঁ হটঃ রেয়ে মাঃ কেদেয়া আরে সুমর উতৗর কেদেয়া। নোওয়া ঞেলকাতে অঁডেন হড়দ মিৎ ঘৗড়িচ্ , লৗগিৎ যত হড়কো আসবাসাও এনা। আদ আরহঁ কো উমঝৗও গৎ এন খানকো মেনকেদা , " দারোগা গজেপে , দারোগা গজেপে । " আর ঞেলেনা উনি হঁ কো সুমৗর কেদেয়া। উনরে গোরভুয় হ হ গৎ কেদা , - " দিশমরে দারোগা বৗনুঃ কোওয়া। হৗকিম বৗনুঃক্ কোওয়া। সরকার বৗনুগেয়া। আবো দিশমরে তেহেঞ আবোওয়াঃ রাজ”। অনা আঁজম কাতে হড়কো দ সেরমা অড়েজঃ লেকাকো হ হ গৎ কেদা , হুল .... হুল ....... হুল........ ।
.webp)
